सीमामा तस्करी नियन्त्रणका लागि सञ्चालन भइरहेको निगरानी अभियानका क्रममा सशस्त्र सीमा बल (एसएसबी) ४२औँ वाहिनीले नेपालमा उत्पादित मेघाश्री गुटखा बरामद गरेको जनाएको छ ।
दुई छुट्टाछुट्टै कारबाही गर्दै एसएसबीले नेपालतर्फ ल्याइदै गरेको १५० एएच क्षमताका चार थान एक्साइड कम्पनीका लेड एसिड ब्याट्री र भारततिर तस्करी भइरहेको गुटखा बरामद गरेको हो । दुवै घटनामा पक्राउ परेका व्यक्तिसहित बरामद सामग्री आवश्यक कानुनी कारबाहीका लागि रुपैडिहा भन्सार कार्यालयलाई बुझाइएको त्यहाँबाट भारतीय पत्रकार सुरेन्द्र मधेसियाले दैनिक नेपालगन्जलाई जानकारी दिएका हुन् ।
एसएसबीका अनुसार पहिलो घटना रुपैडिहा सीमा चौकीमा नियमित जाँचका क्रममा भएको हो । सीमा हुँदै नेपालतर्फ जाँदै गरेको एउटा ई–रिक्सामाथि शंका लागेपछि सुरक्षाकर्मीले विस्तृत जाँच गरेका थिए । यात्रु बस्ने सिटमुनि बनाइएको गोप्य खाल्डोको सूक्ष्म निरीक्षण गरेका थिए । त्यही स्थानबाट चार थान १५० एएच क्षमताका एक्साइड कम्पनीका लेड एसिड ब्याट्री बरामद भएको एसएसबीले जनाएको छ ।
पक्राउ परेका ई–रिक्सा चालकले आफ्नो नाम अरमान दर्जी, बाबु बब्लु दर्जी, नेपाल बाँके जिल्ला, नेपालगन्ज उपमहानगरपालिका–११ निवासी रहेको बताएका छन् । सोधपुछका क्रममा उनले रुपैडिहाको चकिया मोड निवासी अमिनले ती ब्याट्री नेपालगन्जस्थित पाठक ब्याट्री पसलसम्म पु¥याउन दिएको स्वीकार गरेका थिए । उनले ढुवानीबापतको पारिश्रमिक पहिले नै प्राप्त गरिसकेको समेत बताएका छन् ।
यसैबीच, एसएसबीको अर्को टोलीले निर्धारित मार्गभन्दा बाहिरको बाटो प्रयोग गरेर आइरहेको भारतीय नम्बर प्लेटको मोटरसाइकललाई रोकी जाँच गरेको थियो । जाँचका क्रममा मोटरसाइकलमा राखिएका दुई बोराबाट नेपालमा उत्पादित मेघाश्री गुटखा बरामद भएको थियो ।
उक्त मोटरसाइकल चालक १९ वर्षीय अज्जन रहेको खुलेको छ । उनी बहराइच जिल्लाको नानपारास्थित किला मोहल्लाका बासिन्दा हुन् । गुटखासहित मोटरसाइकल पनि नियन्त्रणमा लिएर कानुनी प्रक्रिया अघि बढाइएको एसएसबीले जनाएको छ ।
एसएसबी ४२औँ वाहिनीका कमान्डेन्ट गिरीश चन्द पाण्डेयले सीमा क्षेत्रमा तस्करी नियन्त्रणका लागि नियमित रूपमा कडा निगरानी, गस्ती र सघन जाँच अभियान सञ्चालन भइरहेको बताए । उनले भने, ‘भारत–नेपाल सीमा क्षेत्रमा तस्करी रोक्न एसएसबीले निरन्तर सघन निगरानी, गस्ती र जाँच अभियान सञ्चालन गरिरहेको छ । त्यसकै परिणामस्वरूप तस्करीका प्रयास लगातार असफल भइरहेका छन् ।’
उनका अनुसार, बरामद गरिएका चार थान लेड एसिड ब्याट्री, मेघाश्री गुटखा, भारतीय नम्बरको मोटरसाइकल तथा दुवै आरोपीलाई आवश्यक कानुनी कारबाहीका लागि रुपैडिहा भन्सार कार्यालयको जिम्मा लगाइएको छ । सीमा क्षेत्रमा हुने अवैध ओसारपसार नियन्त्रणलाई अझ प्रभावकारी बनाउन एसएसबीले आगामी दिनमा पनि निगरानीलाई थप कडाइका साथ निरन्तरता दिने जनाएको छ ।
