बर्दियामा युवालाई नेतृत्व विकास र सामाजिक रूपान्तरणका अभियानमा जोड्ने उद्देश्यले पालिकास्तरमा पूर्वसहभागी युवा क्लब गठन थालिएको छ । यसक्रममा बढैयाताल गाउँपालिका र गुलरिया नगरपालिकामा पालिकास्तरीय पूर्वसहभागी युवा क्लब गठन गरिएको छ ।
गुलरिया नगरपालिकाका ८ वटा वडाबाट ३१ जना किशोरकिशोरी तथा युवाको सहभागितामा दिपा चन्दको संयोजकत्वमा २५ सदस्यीय संयुक्त पूर्वसहभागी युवा क्लब गठन गरिएको हो । क्लब गठनसँगै सहभागीलाई उनीहरुको भूमिका र जिम्मेवारीबारे अभिमुखीकरणसमेत दिइएको थियो ।
पूर्वसहभागी युवालाई संगठित गर्दै उनीहरुको नेतृत्व क्षमता विकास गर्ने, सार्थक सहभागिता बढाउने र सञ्जाल विस्तार गर्ने उद्देश्यले क्लब गठन गरिएको हो । युवालाई पैरवी तथा अभियान निर्माणमा सक्रिय बनाउने लक्ष्य पनि राखिएको छ । यसबाट समुदायमा सकारात्मक सामाजिक रूपान्तरणका लागि युवाको भूमिका बढाउने अपेक्षा गरिएको छ ।
बाँके युनेस्को क्लबका अध्यक्ष प्रवेज अली सिद्दिकीले बर्दियाका सातवटै स्थानीय तहमा रहेका विभिन्न क्लबका पूर्वसदस्यलाई क्रमशः पूर्वसहभागी युवा क्लबमार्फत संगठित र जोड्दै लैजाने बताए । उनका अनुसार यस पहलले विभिन्न पालिका र स्थानीय तहमा रहेका पूर्वसहभागी युवाबीच समन्वय र सहकार्यको आधार तयार गर्नेछ ।
‘बर्दियाका सातवटै स्थानीय तहका विभिन्न क्लबका पूर्वसदस्यहरूलाई क्रमशः पूर्वसहभागी युवा क्लबमार्फत संगठित र जोड्दै लैजानेछौं,’ सिद्दिकीले दैनिक नेपालगन्जसँग भने ।
गुलरियामा भएको कार्यक्रममा सहभागी युवालाई स्थानीय सरकारसँग सहकार्य गरेर समुदायमा रचनात्मक काम गर्नसमेत प्रेरित गरिएको थियो । पालिकाका उपप्रमुख सावित्रा गौतमले युवाले नेतृत्व र जिम्मेवारीलाई आत्मसात गर्दै समुदायमा देखिने तथा दिगो परिवर्तनका लागि सक्रिय हुनुपर्ने बताइन् ।
बढैयाताल गाउँपालिकाकी उपाध्यक्ष लक्ष्मी कुमारी अधिकारीले पनि युवालाई सकारात्मक कार्यमा जोडिन आग्रह गरिन् । स्थानीय सरकार र युवाबीचको सहकार्यलाई थप बलियो बनाएर समुदाय विकासमा रचनात्मक योगदान पु¥याउनुपर्नेमा उनले जोड दिइन् ।
पालिकाका उपप्रमुख र उपाध्यक्षले युवालाई नेतृत्व, जिम्मेवारी र सकारात्मक कार्यलाई आत्मसात गर्दै समुदायमा देखिने तथा दिगो परिवर्तनका लागि सक्रिय भूमिका निर्वाह गर्न प्रेरित गरेका थिए । उनीहरुले स्थानीय सरकार र युवाबीचको सहकार्यलाई अझ सुदृढ गर्दै समुदाय विकासमा रचनात्मक योगदान पु¥याउन आग्रह गरेका थिए ।
गुलरिया नगरपालिकाको कार्यक्रममा महिला तथा बालबालिका विकास शाखा प्रमुख गीता बकावल र शिक्षा शाखाका प्रतिनिधि पुष्पलाल शर्मा लगायत विभिन्न सरोकारवालाको सहभागिता थियो । कार्यक्रममा मील अफिसर धिरज कुमार चौधरी र प्रोजेक्ट प्रोटेक्सन अफिसर बिजय शर्माको पनि उपस्थिति थियो ।
गुलरियामा पूर्वसहभागी युवा क्लब गठनका क्रममा नगमा मनिहार र रामकली थारुको महत्वपूर्ण भूमिका रहेको थियो । बढैयातालमा फिल्ड सुपरभाइजर रामबहादुर थारु र भगवती बीकेको पनि सहभागिता थियो ।
कार्यक्रमको सहजीकरण सुरक्षित भविष्य परियोजनाका परियोजना संयोजकद्वय मनोज पौडेल र गोविन्द प्रसाद लामिछानेले गरेका थिए । उनीहरुले क्लबको उद्देश्य, सदस्यको भूमिका, नेतृत्व विकास, पैरवी तथा अभियान निर्माणलगायत विषयमा सहभागीलाई सहजीकरण गरेका थिए ।
सुरक्षित भविष्य परियोजना प्लान इन्टरनेशनल नेपाल, बाँके युनेस्को क्लब र राधाकृष्ण थारु जनसेवा केन्द्रको संयुक्त साझेदारीमा बर्दियाका सातवटा पालिकामा सञ्चालन हुँदै आएको छ । यही परियोजनाअन्तर्गत पूर्वसहभागी युवालाई पालिकास्तरमा संगठित गर्ने काम अघि बढाइएको हो ।
