रसुवाको भोटेकोशी क्षेत्रमा आएको बाढी–पहिरोमा ज्यान गुमाएका मृतकको सम्झना गर्दै नेपालगन्ज–१८ कारकाँदोस्थित राधाकृष्ण मन्दिरमा यस वर्षको श्रीकृष्ण जन्माष्टमी विशेष रूपमा मनाइएको छ । त्यसक्रममा शुक्रवार मृतक आत्माको चिरशान्तिको कामना र देशमा सुख, शान्ति तथा समृद्धिको प्रार्थनासहित मन्दिर परिसरमा २ लाख ७५ हजार बत्ती प्रज्वलन गरिएको होछ ।
श्रीकृष्ण जन्माष्टमीको अवसरमा मन्दिरमा ठूलो संख्यामा भक्तजन पुगेका थिए । बिहानैदेखि दर्शन तथा पूजाआराधना गर्न भक्तजन आउने क्रम सुरु भएको थियो । साँझपख भने मन्दिर परिसरमा भक्तजनको भीड अझ बढेको थियो । रातिसम्मै दर्शन र पूजाआराधना गर्नेको लर्को लागेको थियो ।
मन्दिर व्यवस्थापन समितिका सचिव कपिल नेपालका अनुसार, यसपटकको बत्ती प्रज्वलनलाई विपद्मा ज्यान गुमाएकाप्रति श्रद्धाञ्जलीसँग जोडिएको हो । ‘मृतक आत्माप्रति श्रद्धाञ्जली अर्पण गर्दै उनीहरूको चिरशान्ति र देशवासीको सुख–समृद्धिको कामनाका लागि बत्ती बालिएको हो,’ उनले दैनिक नेपालगन्जसँग भने ।
जन्माष्टमीका दिन राधाकृष्ण मन्दिरमा भगवान् श्रीकृष्णको मूर्ति पूजासँगै राधारानीको पूजा–आराधना गरिएको थियो । दिनभर भजन–कीर्तन चले । विभिन्न धार्मिक अनुष्ठानसमेत आयोजना गरिए । भक्तजनले श्रद्धा र भक्तिभावका साथ भगवान् श्रीकृष्णको आराधना गरेका थिए ।
मन्दिर व्यवस्थापन समितिका अनुसार, यस अवसरमा करिब ८५ हजारभन्दा बढी भक्तजनले मन्दिरमा आवागमन गरेका थिए । बिहानैदेखि सुरु भएको भक्तजनको चहलपहल साँझसम्म निरन्तर रह्यो । ठूलो संख्यामा भक्तजनको उपस्थितिका कारण मन्दिर परिसर दिनभर व्यस्त बनेको थियो ।
बाढी–पहिरोमा ज्यान गुमाएकाको सम्झनामा गरिएको बत्ती प्रज्वलनले यस वर्षको जन्माष्टमीलाई धार्मिक अनुष्ठानमा मात्र सीमित नराखी विपद्को पीडासँग जोडेको थियो । मन्दिरमा जम्मा भएका भक्तजनले मृतकको चिरशान्तिको कामना गर्दै देशमा शान्ति, सुख र समृद्धिको प्रार्थना गरेका थिए ।
श्रीकृष्ण जन्माष्टमी हिन्दू धर्मावलम्बीले भगवान् विष्णुको आठौँ अवतारका रूपमा मानिने भगवान् श्रीकृष्णको जन्मोत्सवका रूपमा मनाउने पर्व हो । यस दिन भगवान् श्रीकृष्णको जन्म भएको धार्मिक विश्वासका आधारमा रातिसम्म पूजा, आराधना र भजन–कीर्तन गर्ने चलन छ ।
धार्मिक मान्यताअनुसार, श्रीकृष्णको जीवन प्रेम, करुणा, कर्तव्य र सत्यको मार्गमा अघि बढ्न प्रेरित गर्ने उदाहरणका रूपमा लिइन्छ । अन्यायमाथि न्याय, अधर्ममाथि धर्म र अन्धकारमाथि सत्यको विजयको सन्देश दिने पर्वका रूपमा पनि जन्माष्टमीलाई लिइन्छ । त्यसैले यो पर्व धार्मिक आस्थासँगै सदाचार, प्रेम र आपसी सद्भावको महत्व सम्झाउने अवसरका रूपमा मनाइन्छ ।
कारकाँदोको राधाकृष्ण मन्दिरमा भएको जन्माष्टमीमा धार्मिक आस्था र भक्तिभावसँगै विपदमा ज्यान गुमाएकाप्रति श्रद्धा व्यक्त गरिएको थियो । देशमा सुख, शान्ति, स्वास्थ्य र समृद्धिको सामूहिक कामना गरिएको थियो । ‘आज दान दक्षिणाबाट प्राप्त सबै रकम, खर्च कटाएर प्रधानमन्त्री राहत कोषमा जम्मा गर्ने निर्णय पनि मन्दिर व्यवस्थापन समितिले गरेको’ सचिव नेपालले जानकारी दिएका छन् ।
