रसुवा भोटेकोसी बाढीमा ज्यान गुमाएका, बेपत्ता भएका, घाइते तथा प्रभावित परिवारका लागि नेपालगन्जका अस्पतालले ६० लाख ७८ हजार ५ सय १३ रुपैयाँ सहयोग गरेका छन् । आधा दर्जनभन्दा बढी अस्पतालले प्रधानमन्त्री दैवी प्रकोप उद्धार कोषमा रकम जम्मा गरेका हुन् ।
बाढीबाट प्रभावितको उद्धार, राहत र पुनःस्थापनामा सघाउने उद्देश्यले अस्पतालहरूले आफ्नो सामाजिक उत्तरदायित्वअन्तर्गत सहयोग रकम उपलब्ध गराएका हुन् । विपद्को समयमा राज्यको राहत प्रयासमा साथ दिनुपर्ने भन्दै विभिन्न अस्पतालले व्यक्तिगत तथा संस्थागत पहलमा रकम जम्मा गरेका छन् ।
सबैभन्दा ठूलो रकम नेपालगन्ज मेडिकल कलेज शिक्षण अस्पताल कोहलपुरले उपलब्ध गराएको छ । अस्पतालले बाढीपीडितका लागि प्रधानमन्त्री दैवी प्रकोप उद्धार कोषमा २५ लाख रुपैयाँ जम्मा गरेको हो ।
सञ्जीवनी कलेज अफ मेडिकल साइसेन्स प्रालि नेपालगन्जले पनि २५ लाख रुपैयाँ कोषमा जम्मा गरेको छ ।
यसैगरी फत्तेबाल आँखा अस्पताल नेपालगन्जले ५ लाख ११ हजार रुपैयाँ सहयोग गरेको छ । अस्पतालका प्रबन्ध निर्देशक डा. कौशलकुमार बर्माका अनुसार, अस्पतालमा आबद्ध समाजसेवी, कार्यरत कर्मचारी र अस्पतालको तर्फबाट रकम जम्मा गर्ने निर्णय गरिएको हो । सामाजिक उत्तरदायित्वलाई ध्यानमा राखेर बाढीपीडितका लागि सहयोग गर्ने निर्णय गरिएको उनले बताए ।
नेपालगन्जको एचसीआरसी अस्पतालले २ लाख ५० हजार रुपैयाँ प्रदान गरेको छ । अस्पताल परिवारका तर्फबाट उक्त रकम सहयोग गरिएको हो । अस्पतालका प्रमुख डा. कुमार सान शाहले विपदमा परेका परिवारलाई सहयोगबाट केही भए पनि राहत पुग्ने विश्वास व्यक्त गरे । प्रभावित परिवारप्रति ऐक्यबद्धता जनाउँदै राहत र पुनःस्थापनाका काममा सक्दो सहयोग गर्ने प्रतिबद्धता पनि अस्पतालले जनाएको छ ।
सेन्ट्रल सिटी अस्पताल नेपालगन्जले पनि बाढीपीडितका लागि २ लाख १ सय ११ रुपैयाँ सहयोग गरेको छ । अस्पतालले रकम प्रधानमन्त्री दैवी प्रकोप उद्धार कोषमा जम्मा गरेको हो । बाढीमा ज्यान गुमाएका, बेपत्ता भएका तथा घाइते भएका व्यक्तिका परिवार र अन्य प्रभावितलाई राहत पुग्ने उद्देश्यले सहयोग गरिएको अस्पतालले जनाएको छ ।
अस्पतालका प्रमुख डा. दिपेश गुप्ताले विपद्को समयमा पीडितको पक्षमा उभिन रकम सहयोग गरिएको बताए । सरकारले बाढी प्रभावितका लागि राहत र उद्धारको काम गरिरहेका बेला आफ्नो संस्थाबाट पनि साथ दिने उद्देश्यले सहयोग गरिएको उनको भनाइ छ ।
नेपालगन्ज न्यूरो अस्पतालले १ लाख १६ हजार ५ सय १३ रुपैयाँ प्रधानमन्त्री दैवी प्रकोप उद्धार कोषमा जम्मा गरेको छ । अस्पतालका सञ्चालक डा. जोशन न्यौपानेले विपद्को समयमा सरकारको राहत प्रयासलाई हौसला दिन र बाढीपीडितलाई सहयोग पु¥याउन रकम उपलब्ध गराइएको बताए ।
त्यसैगरी सागर अस्पताल नेपालगन्जले १ लाख १ हजार रुपैयाँ कोषमा जम्मा गरेको छ । अस्पतालका सञ्चालक डा. गोपाल सागर डिसीले कठिन परिस्थितिमा बाढीबाट प्रभावित नागरिकलाई राहत उपलब्ध गराउन सहयोग गरिएको बताए ।
लाइफ लाइन जनरल अस्पताल नेपालगन्जले पनि बाढीपीडितका लागि १ लाख रुपैयाँ सहयोग गरेको छ । अस्पतालका सञ्चालक डा. प्रतिक श्रेष्ठका अनुसार, उक्त रकम प्रधानमन्त्री दैवी प्रकोप उद्धार कोषमा जम्मा गरिएको हो ।
भोटेकोसीमा आएको बाढीले मानवीय क्षतिसँगै ठूलो भौतिक क्षति पु¥याएको छ । विपद्मा ज्यान गुमाउने र बेपत्ता हुनेका परिवार तथा घाइते र प्रभावित परिवारलाई राहत तथा पुनःस्थापनाको आवश्यकता रहेको अवस्थामा नेपालगन्जका अस्पतालले सरकारको उद्धार कोषमा रकम जम्मा गरेका हुन् । अस्पतालहरूले विपद्को समयमा निजी क्षेत्र तथा स्वास्थ्य संस्थाबाट हुने सहयोगले प्रभावित परिवारको राहत प्रयासमा थप टेवा पुग्ने बताएका छन् ।
त्यसैबीच, आज सोमवार नेपाल सरकारले भोटेकोसीमा आएको बाढीले मानवीय क्षतिप्रति राष्ट्रिय शोक घोषणा गरेको छ ।
