नेपालगन्ज उपमहानगरपालिका वडा नम्बर ६ मा रहेको सामुदायिक विद्यालय फुल्टेक्रा माविका विद्यार्थीहरूका बीचमा भएको हाजिरी जवाफ प्रतियोगितामा शैलेश्वरी सदन समुहले प्रथम स्थान हासिल गरेको छ ।
नेपालगन्ज उपमहानगरपालिका वडा नम्बर ६ को सहयोगमा नाइस नेपालगन्जले आयोजना गरेको अन्तर बिद्यालय स्तरीय हाजिरी जवाफ प्रतियोगितामा सहभागी ७ समुहलाई पछि पार्दै शैलेश्वरी प्रथम स्थान हासिल गरेको हो । यसैगरी प्रतियोगिताको द्वितिय स्थान स्वर्गद्वारा सदनले हात पारेको छ । यसैगरी तृतीय स्थान बागेश्वरी सदन र सान्त्वना स्थान केदारेश्वर सदनले हासिल गरेको छ ।
वातावरण, सरसफाई र सामान्य ज्ञानका बिषयमा प्रश्नहरू तयार गरिएका थिए । एउटा समुहमा ३ जना बिद्यार्थीहरूको सहभागिता रहेकोमा प्रथम, द्धितिय, तृतीय र सान्त्वना स्थान प्राप्त गर्न सफल समुहका प्रतियोगिहरूले क्रमशः मेडल, पुरस्कार र प्रमाण पत्र प्राप्त गरेका छन् ।
प्रतियोगिताका बिजेता र सहभागिलाई मेडल, पुरस्कार र प्रमाण पत्र कार्यक्रमका प्रमुख अतिथि वडा अध्यक्ष शमिर प्रताप सिंह, वडा सचिब मदन रावत, फल्टेक्रा माबिका प्रधानाध्यापक शान्ति कडेंल, बास नेपालका केन्द्रीय कार्यवाहक अध्यक्ष शिव कुमार बर्मा लगायत अतिथिहरूले वितरण गरेका थिए ।
प्रतियोगिताको समापनमा बोल्दै वडा अध्यक्ष समिर प्रताप सिंहले अतिरिक्त क्रियाकलापले बिद्यार्थीहरूको सर्वागीण बिकासमा टेवा पुग्ने बताए । प्रतियोगितामा सहभागिता जनाएका विद्यार्थीहरूलाई बधाई ज्ञापन गर्दै सबै विद्यार्थीहरूले अतिरिक्त क्रियाकलापमा चासो राख्न उनले अनुरोध गरे । फुल्टेक्रा मावि वडा भित्रको एक मात्र सामुदायिक बिद्यालय भएकाले बिद्यालयको शैक्षिक गुणस्तर सुधारका लागि आवश्यकता अनुसार वडाले सहयोग गर्ने उनको भनाइ थियो । उनले वडाको लक्षित बर्ग उत्थान कार्यक्रम अन्तरगत नाइस नेपालगन्जले गरेको हाजिरी जवाफ प्रतियोगिता प्रभावकारी भएको जनाए ।
कार्यक्रममा बोल्दै वडा सचिव मदन रावतले विद्यालयलाई अतिरिक्त क्रियाकलाप नियमित सञ्चालन गर्न अनुरोध गरे । प्रतियोगितामा सहभागी बिद्यार्थीहरूले गरेको प्रदर्शन उत्कृष्ट रहेको भन्दै निरन्तर विद्यालयको आन्तरीक कार्यक्रमहरूमा सबैले सहभागिता जनाउन बिद्यार्थीहरूलाई अनुरोध गरे । विद्यार्थीहरूको प्रतिभा प्रस्फुटन गर्ने माध्यम हाजिरी जवाफ प्रतियोगिता प्रभावकारी भएको उनको भनाइ थियो । कार्यक्रममा फुल्टेक्रा माबिका प्रधानाध्यापक शान्ति कडेंल, बास नेपालका केन्द्रीय कार्य वाहक अध्यक्ष शिव कुमार बर्माले बोलेका थिए ।
नाइस नेपालगन्जका अध्यक्ष हेमराज भट्टको अध्यक्षतामा भएको प्रतियोगिताको सञ्चालन नाइस नेपालगन्जका रबिन्द्र बोहराले गरेका थिए । नाइस नेपालगन्जका सदस्य मन भण्डारीले स्वागत तथा उद्देश्य माथि प्रकाश पारेको कार्यक्रममा अतिथिहरूलाई ब्याच बितरण नाइसका सदस्य रमिता शाहले गरेका थिए ।
वडा नम्बर ६ को हडिया बाबा मन्दिर प्राङ्गणमा भएको प्रतियोगितामा सहभागी विद्यार्थीहरूले प्रतियोगितामा सहभागिता जनाउन पाएकोमा खुसी ब्यक्त गरेका थिए । प्रतियोगितामा प्रथम स्थान हासिल गर्न सफल शैलेश्वरी सदनमा गोमा त्रिपाठी, शितल बैष्य र बिशाल केसी, यसैगरी द्धितिय स्थान हासिल गर्न सफल स्वर्गद्वारी सदनमा साजिदा बानो अन्सारी, अरूणीमा पुन र दिलिप नेपाली , तृतीय स्थान हासिल गर्न सफल बागेश्वरी सदनमा मुस्कान बानो, आँचल तेली र दिपेन्द्र मौर्य र सान्त्वना स्थान हासिल गर्न सफल केदारेश्वर सदनमा गोबिन्द्र सिंह, रोहनी खड्का र सवनम मागवान रहेका थिए । ८ वठा समुहका २४ जना प्रतियोगी सहित कार्यक्रममा १५५ जनाको सहभागिता रहेको थियो ।
