एक्सेस प्लानेट संस्थाले अपाङता भएका महिलाहरुको न्यायमा पहुँचका लागि आवश्यकताबारे छलफल कार्यक्रम आयोजना गरेको छ। यस कार्यक्रममा अधिवक्ता बसन्त गौतमले न्याय प्रणालीमा सुधार गर्नका लागि अपाङता मैत्री संरचना, व्यवहार र व्यवस्थापनको आवश्यक्तामा विशेष जोड दिएका थिए।
कार्यक्रममा सहभागी साथी संस्थाकी पवित्रा बोहरा भने, “हामीले बिना विभेद सबैलाई सहयोग गर्दै आएको छौं, तर अपाङता भएका महिलाहरुको मुद्दा प्रायः अगाडि आउँदैन। यसले न्यायमा पहुँचमा बाधा पुर्याउँछ। यसैले, समाजमा सचेतना फैलाउन र न्यायालयका संरचनाहरु अपाङता मैत्री बनाउन आवश्यक छ।”
महिला सेलकी दिलसरा रानाले अपाङता भएका व्यक्तिहरूलाई हिंसा भएको मुद्दा नआएको उल्लेख गर्दै भनिन्, “गत वर्ष बोल्न नसक्ने युवतीको प्रेम विवाहका कारण विवाद भएको थियो, जसलाई हामीले मिलापत्र गराएर हल गर्यौं। अहिले ती युवती राम्रोसँग बसिरहेकी छिन्।”
सरकारी वकिल भानू चौधरीले अपाङता भएका महिलाहरुलाई न्याय दिलाउनका लागि सजिलो नहुने कुरा उल्लेख गर्दै भने, “यसका लागि फास्ट ट्रयाक सिस्टमको अवलम्बन र सम्बन्धित निकायका भौतिक संरचनाहरु अपाङता मैत्री बनाउन पहल गर्नु अनिवार्य छ।”
कार्यक्रममा आयोजक संस्थाकी गायत्री रिमालले यस छलफलको मुख्य उद्देश्य अपाङता भएका महिलाहरुको न्यायमा पहुँचलाई बढाउनु रहेको बताइन्। उनले थप भनिन्, “हामीले यो विषयमा गम्भीरताका साथ ध्यान दिनु पर्छ र सबै सरोकारवाला निकायलाई एकै ठाउँमा ल्याउनुपर्छ।”
यस छलफलले अपाङता भएका महिलाहरुको अधिकार र न्यायका लागि थप पहलको आवश्यकता भएको स्पष्ट पार्दै, सशक्त र समावेशी समाजको निर्माणमा सहयोग पुर्याउने मार्ग खुला गरिरहेको छ। यसरी, अपाङता भएका महिलाहरुको न्यायमा पहुँचका लागि आवाज उठाउने यो प्रयास प्रशंसनीय रहेको छ।
