नेपालगन्जको न्यूरोडमा ब्याडमिन्टन ट्रेनिङ सेन्टर सञ्चालनमा आएको छ । नेपालगन्ज उपमहानगरपालिका वडा नम्बर ४ ले निर्माण गरेको गौतम बुद्ध ब्याडमिन्टन कोर्ट तथा ट्रेनिङ सेन्टरलाई सञ्चालनमा ल्याइएको हो ।
‘सम्बद्ध प्राविधिकहरुसँगको सहकार्यमा यहाँ प्रतियोगितासँगै ब्याडमिन्टन तालिम सञ्चालन गरिनेछ,’ शनिवार कोर्ट तथा ट्रेनिङ सेन्टरको नगर प्रमुख प्रशान्त विष्टले उद्घाटन गरेपछि वडाध्यक्ष गोपाल पुनले भने ।
वडाध्यक्ष पुनले गौतम बुद्ध ब्याडमिन्टन कोर्ट तथा ट्रेनिङ सेन्टर वडा नम्बर ४ को गौरबको आयोजना भएको बताए । प्रदेश सरकारको सहयोगसहित करीब ३० लाख लागतमा तयार भएको ब्याडमिन्टन कोर्ट तथा ट्रेनिङ सेन्टर निर्माण वडाध्यक्ष पुनले बताए ।
ब्याडमिन्टन प्रशिक्षक अनिल लाखेले नेपालगन्जमा स्थानीय सरकारले सञ्चालनमा ल्याएको ब्याडमिन्टन कोर्ट तथा ट्रेनिङ सेन्टरले खेलाडी उत्पादनमा सहयोग पुग्ने विश्वास व्यक्त गरे । यसअघि वडा नम्बर १ वाटरपार्कमा पनि ब्याडमिन्टन कोर्ट तथा ट्रेनिङ सेन्टर निर्माण भई सञ्चालनमा आइसकेको छ ।
ब्याडमिन्टन कोर्ट उद्घाटनसँगै वडा कार्यालयको आयोजनामा वडा स्तरीय खुला ब्याडमिन्टन प्रतियोगिता गरिएको छ । प्रतियोगितामा लोकेश चौधरी प्रथम, आर्यन राना द्वितीय तथा अभय राजवंशी र संस्कार केसी तृतीय भएका छन् ।
प्रतियोगिताका विजयी खेलाडीलाई नगर प्रमुख विष्ट, प्रमुख प्रशासकीय अधिकृत रामहरि शर्मा, वडा अध्यक्ष पुन लगायतले शिल्ड र ट्रफी प्रदान गरेका थिए । यसैगरी उदियमान सर्वोत्कृष्ट खेलाडीको पुरस्कार दिवस मल्ल र सुयोग्य श्रेष्ठलाई प्रदान गरिएको छ ।
