मेहेन्दीको रंगसँगै आर्थिक आत्मनिर्भरताको चेतना
श्रावणको हरियाली र चाडपर्वको उत्साहसँगै, महिलाको आर्थिक सशक्तिकरणलाई जोड दिने उद्देश्यसहित सञ्चालन भइरहेको ‘भरोसा मेहेन्दी उत्सव’ नेपालगन्जमा जारी छ । विहीवारदेखि सुरु भएको यस सप्ताहव्यापी उत्सवमा हालसम्म ३ सय ५० महिलाको सहभागिता भएको आयोजकले जनाएको छ ।
‘मेहेन्दीमा सजिएर श्रावण मनाऔं’ भन्ने आकर्षक नारासहित सुरु गरिएको यो उत्सव भरोसा बहुउद्देश्यीय सहकारी संस्था लिमिटेडको तर्फबाट तेस्रो संस्करणको रूपमा आयोजना गरिएको हो ।
रंगीन मेहेन्दीसँगै वित्तीय चेतनाको समिश्रण
सामाजिक सौन्दर्यको प्रतीक मानिने मेहेन्दीलाई सहकारीले यसपालि महिलामा वित्तीय साक्षरतासँग जोड्दै अर्थपूर्ण बनाएको छ । आयोजक संस्था ‘भरोसा’ का सिइओ तेजबहादुर रावलका अनुसार, ‘यो उत्सवले केवल मेहेन्दीको सौन्दर्यमा मात्र केन्द्रित होइन, महिलामा आर्थिक जिम्मेवारी, बचतको महत्व तथा सहकारी प्रणालीप्रति विश्वास बढाउने प्रयास पनि हो ।’
उनले दैनिक नेपालगन्जको जिज्ञासामा भने, ‘महिलाका लागि आर्थिक भरोसा विकास गर्न सहकारीमार्फत सचेतना फैलाउनु आजको आवश्यकता हो । हामी मेहेन्दीको माध्यमबाट साँस्कृतिक उमंग र सहकारी शिक्षालाई जोडिरहेका छौं ।’
मेहेन्दी – संस्कार, सौन्दर्य र सशक्तिकरणको संगम
श्रावण महिनाको सांस्कृतिक महत्त्वसँग जोडिएको मेहेन्दी अब महिला सशक्तिकरणको प्रतीक बन्दै गएको छ । सहकारी संस्थाको यस्तो अभिनव पहलले ग्रामीण तथा शहरी महिलाहरूमा बचत र लगानीबारे जानकार बनाउने दिशामा ठूलो भूमिका खेलेको स्थानीय महिलाहरू बताउँछन् ।
कार्यक्रम अन्तर्गत वित्तीय संवाद, सहकारी परिचय सत्र, महिला उद्यमीहरूको अनुभव आदान–प्रदान, तथा सांस्कृतिक प्रस्तुति समेत समावेश गरिएको छ । आयोजकले जानकारी गराएअनुसार, उत्सव भोलि विहीवारसम्म सञ्चालन हुनेछ ।
सिइओ रावलका अनुसार, भरोसा सहकारीले सुरु गरेको यो प्रकारको चाड–संस्कारसँग जोडिएको वित्तीय सचेतना कार्यक्रमले महिलाको जीवनमा दीर्घकालीन आर्थिक भरोसा र आत्मनिर्भरताको बीउ रोप्ने अपेक्षा गरिएको छ ।
