‘निकै वर्षको सपना पुरा भयो, अब प्रतिष्पर्धा हुन्छ,’ अध्यक्ष थापा
बाँकेमै पहिलो सी–डिभीजन क्लबका नेपालगन्ज एघार स्पोर्टिङ क्लबले सफलता हासिल गरेको छ ।
राजधानी काठमाडौंस्थित, एन्फा ग्राउण्डमा भएको सी–डिभिजन क्यालिफायर प्रतियोगितामा शुक्रवार भएको क्वार्टरफाइनल खेलमा मसुरिया फुटबल क्लबलाई पछाडी पार्दै नेपालगन्जले उक्त सफलता हासिल गरेको हो ।
नेपालगन्ज–११ स्पोर्टस क्लब र सिन्धुपाल्चोक फुटबल क्लब शहिद स्मारक सी डिभिजन लिग छनोटको फाइनलमा प्रवेश गरेका छन् । साथै फाइनल प्रवेश गरेसँगै दुवै टोली सी डिभिजन लिगका लागि छनोट समेत भएका हुन् ।
शुक्रबार भएको दिनको पहिलो सेमिफाइनलमा नेपालगन्जले मसुरिया फुटबल एकेडेमीलाई १–० को साँघुरो अन्तरले हराउँदै फाइनलमा आफ्नो स्थान सुरक्षित गर्न सफल भयो ।
त्यस्तै शुक्रबार नै भएको अर्को सेमिफाइनलमा सिन्धुपाल्चोकले शिवशक्ति युवा क्लबलाई ४–२ को अन्तरले हराउँदै फाइनलमा प्रवेश गर्यो । अब मंसिर २८ गते आइतबार हुने फाइनलमा नेपालगन्ज र सिन्धुपाल्चोक उपाधिका लागि भिड्नेछन् ।
‘फाइनल उपाधिभन्दा हामीलाई सी–डिभीजनमा क्यालिफायर हुनुनै ऐतिहासिक उपलब्धी हो,’ नेपालगन्ज–११ का अध्यक्ष घनश्याम थापाले उत्साहित हुँदै दैनिक नेपालगन्जसँग भने, ‘निकै वर्षको सपना पुरा भयो, अब प्रतिष्पर्धा हुन्छ ।’ अध्यक्ष थापाले लुम्बिनीमै बाँके र नेपालगन्जको यो उपलब्धीलाई संस्थागत गर्दै अगाडी बढ्न्ु आफ्नो चुनौती भएको बताए । ‘यसलाई नेपालगन्ज उप–महानगरपालिका र कोहलपुर नगरपालिकाले स्वामित्व लिएर हामीलाई हौसला बढाउनुपर्छ,’ अध्यक्ष थापाले बाँके जिल्ला फुटबल संघको सहयोग पाउन अझै नसकिएको गुनासो गर्दै भने । ‘बाँके जिल्ला फुटबल संघ राजनीति गर्नमात्रै पक्कै होइन, फुटबलका लागि काम गर्नेलाई प्रोत्साहन र सहयोग पनि गर्नुपर्छ,’ अध्यक्ष थापाको भनाइ छ ।
नेपालगन्ज–११ का प्रशिक्षक जनक केसीले फाइनल उपाधिका लागि पनि टिम तयार रहेको बताए । उनका अनुसार, नेपालगन्जका खेलाडीले लगातार ५ खेल जित्दै सी–डिभीजनमा आफ्नो नाम दर्ज गराएका हुन् । ‘यो ऐतिहासिक उपलब्धी हो,’ उपाधि लिएर नेपालगन्जमा उत्सव मनाउन चाहेको बताउँदै प्रशिक्षक केसीले भने, ‘यो बाँके, नेपालगन्जमात्रै होइन, लुम्बिनीकै जीत हो ।’
