मकर सक्रान्ति एवं माघी पर्वको अवसरमा कसौंधन वैश्य समाज जिल्ला कार्य समिति, नेपालगन्ज उप–महानगरपालिकाले असहाय तथा विपन्न व्यक्तिहरूका लागि खाद्यान्न सहयोग गरेको छ ।
समाजले मानवसेवा आश्रम, नेपालगन्जमा आश्रित असहायहरूलाई लक्षित गर्दै चामल, दाल, तरकारी तथा अन्य दैनिक उपभोग्य खाद्य सामग्री सहयोग स्वरूप हस्तान्तरण गरेको हो ।
सहयोग सामग्री समाजका अध्यक्ष सन्तोषकुमार बैश्य, कानुनी सल्लाहकार अधिवक्ता विनोदकुमार गुप्ता, सदस्य माधव प्रसाद वैश्य र महिला मञ्चकी सह–सचिव अनुपमा वैश्यसहितको उपस्थितिमा मानवसेवा आश्रमका प्रतिनिधिलाई प्रदान गरिएको थियो ।
‘माघी केवल पर्व मात्र नभई आपसी सहयोग, सद्भाव र मानवताको सन्देश दिने अवसर भएकोले समाजले यो पहल लिएको हो,’ अध्यक्ष बैश्यले दैनिक नेपालगन्जसँग भने, ‘आगामी दिनमा पनि सामाजिक उत्तरदायित्व अन्तर्गत यस्ता सहयोगात्मक कार्यक्रमलाई निरन्तरता दिनेछ ।’
मानवसेवा आश्रमका प्रतिनिधिले करौंधन वैश्य समाजको सहयोगप्रति आभार व्यक्त गर्दै यस्ता सहयोगले आश्रममा आश्रित असहाय, बेसहारा तथा दुःखी व्यक्तिहरूलाई ठूलो राहत पुग्ने बताए ।
