सकिंदै ‘रजिष्ट्रेशन’ को समयसीमा
नेपालगन्जमा आयोजना हुने ‘साइकल उत्सव’ का क्रममा हुने टुर दि ठाकुरद्वाराको रुट तय भएसँगै सहभागी यात्रुको ‘रजिष्ट्रेशन’ मिति आज विहीवार सकिंदैछ ।
नेपालगन्ज साइक्लिङ्ग क्लबको आयोजनामा आगामी फागुन ७, ८ र ९ हुने ‘साइकल उत्सव’ का क्रममा हुने टुर दि ठाकुरद्वाराका कार्यक्रम संयोजक प्रदीप सापकोटाका अनुसार सहभागिताका लागि नाम दर्ता अनिवार्य छ । ‘रजिष्ट्रेशन अनिवार्य रहेकाले हामीले सकेसम्म धेरै सहभागितामा जोड दिएका छौं,’ क्लबका निवर्तमान अध्यक्ष समेत रहेका संयोजक सापकोटाले दैनिक नेपालगन्जसँग भने, ‘गत वर्षको तुलनामा यसपटक सहभागिता बढ्ने निश्चित छ ।’
गतवर्ष भारतीय र चिनियासहित झण्डै २ सय साइकल यात्रु सहभागी भएको जानकारी दिंदै तत्कालिन क्लब अध्यक्षसमेत रहेका सापकोटाले यसपटक २ सयबढीको सहभागिता सुनिश्चित भइसकेको बताए । ‘समय अझै छ, यात्रु बढ्ने अपेक्षा गरिएको छ,’ आन्तरिक पर्यटन प्रवद्र्धनसँगै साइकल यात्रीहरू मनोरञ्जनात्मक सुविधा रहेको टुर दि ठाकुरद्वारामा यसपटक बाँके निकुन्जको राइडिङ्गलाई जोडिएको जानकारी दिंदै कार्यक्रम संयोजक सापकोटाले भने, ‘यात्रालाई अझै आकर्षक बनाउँदै लगिएको छ ।’
नेपालगन्ज स्थित प्रसिद्ध शक्तिपिठ बागेश्वरी मन्दिरबाट सुरु हुने टुर दि ठाकुरद्वाराको मनोरम साइकल यात्रा सदरलाइन, त्रिभुवनचोक चारवाहिनी हुँदै गणेशमान चोक पुगेर सुर्खेतरोडको बाटो कारकाँदो चोक बाइपास हुँदै कान्ति ताल, कम्दी मिलन चोकको कम्दी लायन्स पार्कको बाटो डुडुवा किनारको प्राकृतिक दृश्यावलोकन गर्दै साइकल यात्रीहरूले मनोरम यात्रा गर्नेछन् ।
क्लब अध्यक्ष कविराम बुढाथोकीका अनुसार, यात्रुहरुलाई त्यहाँबाट पिपरी चोक हुँदै कोहलपुर गोलपार्क चप्परगौढीबाट खर्कवार पिकनिक पार्क पुगेर नेपाली सेनाको ‘बडाभोज’ मा सरिक गरिदैछ । बाँके राष्ट्रिय निकुञ्जको सँगको सहकार्यमा साइकल यात्रीहरूलाई हात्तीले स्कटिङ्ग गर्दै निकुञ्ज भित्रबाट सुतैयाताल मिनी गाभरमा रात्रीबास व्यवस्थापन मिलाइएको उनले बताए ।
रात्रीबासमा विविध मनोरञ्जनात्मक सांस्कृतिक प्रस्तुतिहरूको भव्य आयोजना गरिएको फेष्टिबलका संयोजक सापकोटाले बताए । टुर दि ठाकुरद्वाराले बाँकेको आन्तरिक पर्यटन र राष्ट्रिय निकुञ्जलाई प्रवर्धनको लक्ष्य लिएको उनको भनाइ छ । भोलिपल्ट विहान गाभरबाट च्यामा चोक डिगिया हुँदै सम्झना चोक बाँसगढीको पूर्व–पश्चिम राजमार्ग हुँदै भुरेगाउँ पुगेर ठाकुरद्वारा मन्दिर दर्शन गर्ने कार्यक्रम तय भएको कार्यक्रम संयोजक सापकोटाले जानकारी दिए ।
‘यसका लागि आवश्यक तयारीमा टिम सक्रिय छ,’ प्रचार संयोजक बिष्णु कंडेलले दैनिक नेपालगन्जसँग भने, ‘विहीवारसम्म रजिष्ट्रेसनको समय पनि रहेकाले यो उत्सवमा सहभागिताको अवसर छ ।’
