परम्परागत हुलाक सेवालाई आधुनिक, प्रविधिमैत्री र जनमैत्री बनाउँदै समयसापेक्ष रूपान्तरण गर्नुपर्नेमा नेपालगञ्जमा आयोजित एक अन्तरक्रिया कार्यक्रममा जोड दिइएको छ ।
हुलाक सेवा विभागको आयोजनामा बिहीबार सम्पन्न द्रुत डाँक सेवासम्बन्धी अन्तरक्रियामा सहभागी सरोकारवालाहरूले सेवा विस्तार, गुणस्तर सुधार र विश्वसनीयता अभिवृद्धिका विषयमा गहन छलफल गरेका हुन् ।
जिल्ला हुलाक कार्यालय बाँकेको समन्वयमा भएको कार्यक्रममा सरकारी निकाय, स्थानीय तह, सेवाग्राही र सरोकारवालाहरूबीच हुलाक सेवाको वर्तमान अवस्था, चुनौती र सम्भावनाबारे खुला बहस भएको थियो । सहभागीहरूले परम्परागत छविबाट बाहिर निस्कँदै प्रविधिमा आधारित छिटो, सहज र भरपर्दो सेवा प्रवाह आजको अपरिहार्य आवश्यकता भएको औंल्याए ।
कार्यक्रममा बोल्दै जिल्ला हुलाक कार्यालय बाँकेका प्रमुख गजेन्द्रप्रकाश थारूले हुलाकले द्रुत डाँक सेवा लामो समयदेखि सञ्चालन गर्दै आए पनि अपेक्षाअनुसार यसको विस्तार हुन नसकेको स्वीकार गरे । यस्ता अन्तरक्रिया कार्यक्रमले सेवाको पहुँच विस्तार र प्रभावकारिता अभिवृद्धिमा महत्वपूर्ण योगदान पु¥याउने उनको विश्वास थियो ।
जिल्ला प्रशासन कार्यालय बाँकेका सहायक प्रमुख जिल्ला अधिकारी महेशकुमार गुरुङले हुलाक सेवालाई समयअनुकूल परिमार्जन गर्दै अगाडि बढ्नुपर्नेमा जोड दिए । उनले सेवाप्रदायक र सेवाग्राहीबीचको समन्वय र सहकार्य बलियो बनाउन सकेमा मात्र सार्वजनिक सेवामा विश्वसनीयता कायम रहने बताए ।
उनले भने, ‘हुलाक सेवा प्रविधिमैत्री, चुस्तदुरुस्त र छिटो छरितो हुनुपर्छ। सेवाग्राहीको आवश्यकता र अपेक्षाअनुसार सेवा सुधार गर्दै लैजानु आजको आवश्यकता हो ।’
कार्यक्रमका प्रमुख अतिथि, जिल्ला समन्वय समिति बाँकेका प्रमुख ज्ञानेन्द्रकुमार चौधरीले हुलाकको खस्किँदो प्रयोगप्रति चिन्ता व्यक्त गर्दै यसको पुनःविश्वास निर्माणमा सबै पक्ष जिम्मेवार हुनुपर्ने बताए । उनले सरकारी कार्यालयहरूले नै हुलाक सेवा प्रयोगमा प्राथमिकता दिनुपर्ने र आम नागरिकसम्म हुलाकका सेवाबारे प्रभावकारी सूचना प्रवाह गर्नुपर्नेमा जोड दिए ।
उनले निजी कम्पनीहरूतर्फ सेवाग्राही आकर्षित हुनुका कारणको गम्भीर समीक्षा गर्न पनि आग्रह गरे ।
हुलाक सेवा विभागका शाखा अधिकृत शालिकराम बस्यालले द्रूत सेवामार्फत देशभित्र ४५ जिल्ला र विश्वका ३९ देशका ४२ स्थानमा सेवा प्रदान भइरहेको जानकारी दिए। उनले समयको मागअनुसार छिटो, सुरक्षित र भरपर्दो सेवा दिन हुलाक प्रतिबद्ध रहेको उल्लेख गर्दै सेवाग्राहीलाई हुलाकप्रति विश्वास गर्न आग्रह गरे ।
त्यसैगरी विभागका निर्देशक लीलाराम पौडेलले हुलाक सेवाको विस्तृत सञ्जाल, अनुभवी जनशक्ति र न्यून शुल्कमा सेवा प्रदान गर्ने विशेषताबारे प्रकाश पार्दै देशका ९३ गन्तव्यमा वैदेशिक हुलाक सेवा नियमित सञ्चालनमा रहेको जानकारी दिए । सुरक्षित र किफायती सेवा भएकाले हुलाकप्रति ढुक्क हुन उनले आग्रह गरे ।
कार्यक्रमको अध्यक्षता गरिरहेकी हुलाक सेवा विभागका महानिर्देशक मनमाया भट्टराई पङ्गेनीले सीमित स्रोत र साधनका बीच पनि हुलाकले विश्वसनीय सेवा प्रदान गर्दै आएको बताइन्। उनले हुलाकलाई अझ गतिशील र प्रतिस्पर्धी बनाउन राज्यका विभिन्न निकायबीच सहकार्य आवश्यक रहेको उल्लेख गरिन् ।
उनका अनुसार हाल २०१९ सालको ऐनअनुसार सञ्चालन भइरहेको हुलाक सेवा अब नयाँ ऐनमार्फत थप सुदृढ र व्यवस्थित हुने अपेक्षा गरिएको छ ।
महानिर्देशक पङ्गेनीले हुलाक सेवालाई आधुनिकीकरण तथा व्यावसायिक बनाउने क्रममा सूचना प्रविधिको विस्तार, सफ्टवेयर विकास, पूर्वाधार निर्माण, दक्ष जनशक्ति व्यवस्थापन, अन्तरनिकाय समन्वय र ई–कमर्शजस्ता सेवाको विकास अझै चुनौतीका रूपमा रहेको औंल्याइन् ।
कार्यक्रममा सहभागीहरूले सेवा विस्तार, जनचेतना अभिवृद्धि, डिजिटल प्रविधिको अधिकतम प्रयोग तथा स्थानीय तहसँगको सहकार्य सुदृढ गर्दै हुलाक सेवालाई पुनः प्रभावकारी बनाउने सुझाव दिएका थिए ।
समग्रमा, अन्तरक्रिया कार्यक्रमले हुलाक सेवाको वर्तमान अवस्थाको समीक्षा गर्दै भविष्यमा यसलाई प्रविधिमैत्री, छरितो र जनकेन्द्रित सेवाका रूपमा रूपान्तरण गर्ने स्पष्ट मार्गचित्र प्रस्तुत गरेको निष्कर्ष निकालिएको छ ।
