नेपालगंज उपमहानगरपालिका क्षेत्रमा तातो हावा लु पूर्वतयारी तथा प्रतिकार्यसंग सम्बन्धित संचालित गतिविधिहरुको बारेमा उच्च स्तरीय अनुगमन तथा अवलोकन भएको छ ।
अवलोकनका क्रममा नेरेसो बाँकेद्वारा तातो हावा सम्बन्धी संचालित गतिविधिहरुको प्रस्तुतीकरण, स्थानीय सरकार नेपालगंज उपमहानगरपालिकासंग र रेडक्रस बीचको साझेदारी र सहकार्यमा संचालन भएका कार्यहरुको बारेमा अन्तरक्रिया, शितलन केन्द्र (कुलिङ्गसेन्टर) को अवलोकन र समुदायमा संचालन भएका गतिविधिहरुको स्थलगत अवलोकन गरियो ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका (एन.डी.आर.आर.एम) कार्यकारी प्रमुख ई.दिनेश भट्टले विभिन्न विपद् मध्ये तातो हावा पनि एक हो । नेपालगंजमा तातो हावा प्रतिकार्यका गतिविधिहरु केही वर्ष देखि नमुनाका रुपमा संचालन भइरहेको बताउँदै प्राधिकरणले योजनाबद्ध कार्य गरी रहेको जानकारी दिनु भयो ।
अनुगमन तथा अवलोकन कार्यक्रममा रेडक्रस तथा रेडक्रिसेन्ट सोसाइटीहरुको अन्तराष्ट्रिय महासंघका (आई.एफ.आर.सी.) नेपाल प्रतिनिधि टोलीका प्रमुख डेविट फिसर, राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख ई.दिनेश भट्ट, सहसचिव अमृत श्रेष्ठ, उपसचिव राजेन्द्र शर्मा, उपसचिव सुरेश सुनार, अमेरिकन रेडक्रसका नेपाल प्रतिनिधि हरिबहादुर कार्की, कार्यक्रम संयोजक उपमा ओझा र नेरेसो केन्द्रका उपनिर्देशक अमरमणि पौडेल लगायतको सहभागिता रहेको थियो ।
अन्तरक्रिया कार्यक्रम नेरेसो बाँके शाखाका सभापति गोवर्धन सिंह सम्झनाको अध्यक्षता सम्पन्न कार्यक्रममा शाखाका उपनिर्देशक दोलखबहादुर डाँगीले विगत देखि हालसम्म संचालन भएका गरेका तातो हावाको असर न्यूनीकरण सम्बन्धी गरिएका गतिविधिको बारेमा प्रस्तुती गर्नु भएको थियो ।
यसैगरी नेपालगंज उपमहानगरपालिकाका मेयर प्रशान्त विष्टको अध्यक्षतामा भएको कार्यक्रममा रेडक्रस र नेपालगंज उपमहानगरपालिकाको सहकार्यमा संचालन भएका गतिविधिको बारेमा मेयर विष्टबाट जानकारी गराइएको थियो । ने.ग.उपमहानगरपालिकाका प्रमुख प्रशासकीय अधिकृत रामहरि शर्माले रेडक्रसलाई सघीय सरकारले समेत विपद् व्यवस्थापन कार्यका लागि प्राथमिकतामा राखेको र नेपालगंज उपमहानगरपालिकाले आप्mनो विभिन्न विषयगत क्षेत्रमा सहकार्य गर्दै आएको बताउनु भयो ।
कार्यक्रमा नेरेसो बाँके शाखाका मन्त्री अजीज अहमद सिद्दिकी, कोषाध्यक्ष राकेशबहादुर श्रीवास्तव, विपद् व्यवस्थापन समिति संयोजक नरेन्दकुमार पौडेल, सदस्य खगेसरी भण्डारी, नेपालगंज उपमहानगरपालिका पालिका शाखा तदर्थ समितिका संयोजक शिवकुमार वर्मा लगायतको सहभागिता रहेको थियो भने कार्यक्रम संचालन नेरेसो बाँकेका तातो हावाका कार्यक्रम फोकल पर्सन झवीलाल शर्माले गर्नु भएको थियो । नेरेसोका स्वयंसेवक र कर्मचारीहरुको सभागिता रहेको थियो ।
