बाँकेका दुई वटा स्थानीय तहले अतिक्रमित सार्वजनिक जग्गा खाली गर्न सूचना जारी गरेका छन् । बाँकेको नरैनापुर गाउँपालिकाले संघीय मामिला तथा सामान्य प्रशासन मन्त्रालयको प्राप्त पत्र अनुसार अतिक्रमित सार्वजनिक जग्गा खाली गर्न सूचना जारी गरेको हो ।
पालिकाका अध्यक्ष इस्तियाक अहमद शाहले सार्वजनिक गरेको सूचना अनुसार, एक साता भित्र पालिका ६ वटै वडा क्षेत्रभित्र रहेका सरकारी, सार्वजनिक तथा ऐलानी जग्गा अनाधिकृत अवैध कब्जा गरी घर, टहरा कम्पाउण्ड निर्माण भएको उल्लेख छ । अध्यक्ष शाहले तोकिएको मितिभित्र अतिक्रमण नहटाए पालिकाले हटाउने र सोमा लाग्ने सम्पूर्ण खर्च समेत अतिक्रमणकारीबाट असुल गर्ने चेतावनी दिएका छन् ।
त्यस्तै कोहलपुर नगरपालिकाले पनि नगर क्षेत्रका १५ वटै वडामा भएको अनाधिकृत कब्जा छाड्न चेतावनी दिएको छ । पालिकाका निमित्त प्रमुख प्रशासकीय अधिकृत कर्ण बहादुर थापाले सूचना जारी गर्दै बैशाख २५ गते साँझ ७ बजेसम्म अतिक्रमित क्षेत्र खाली गर्न सूचित गर्दै त्यसो नगरे अतिक्रमित क्षेत्र बैशाख २६ गते नगरपालिका आफैले हटाउने उल्लेख गरेका छन् । कोहलपुर वडा नं. ११ नगर विकास समिति समितिको मातहतमा रहेको क्रिकेट मैदान आसपासमा रहेका जमिन समेतमा रहेको अतिक्रमण खाली गर्न कोहलपुर नगरपालिकाले सूचना जारी गरेको छ ।
‘७ सय ५१ जनाले क्रिकेट मैदानको जग्गा अतिक्रमण गरेका छन्’, कोहलपुर नगर प्रमुख पूर्ण आचार्यले भने, ‘त्यसबाहेक अन्य वडामा पनि अतिक्रमण छ ।’ कोहलपुर नगरपालिकामा २२ हजारको हाराहारीमा भूमिहीन, सुकुम्बासी, दलितले लालपुर्जाका लागि यसअघि फारम भरेको बताइन्छ ।
