बाँके कला केन्द्र, नेपालगन्जको आयोजना तथा नेपालगन्ज उप-महानगरपालिकाको आर्थिक सहयोगमा यही जेठ १५ गते ‘प्रथम मेयर सांस्कृतिक कप’ आयोजना हुने भएको छ । गणतन्त्र दिवसको अवसर पारेर आयोजना गर्न लागिएको यो कार्यक्रम एक अन्तर माध्यमिक विद्यालय स्तरीय सामूहिक लोक नृत्य प्रतियोगिता हो ।
बिहीबार पत्रकार सम्मेलन गरी आयोजकले कार्यक्रमको विस्तृत विवरण सार्वजनिक गरेको छ ।
नेपालगन्ज उप-महानगरपालिका भित्रका सामुदायिक तथा संस्थागत विद्यालयका कक्षा ६ देखि १२ सम्मका विद्यार्थीहरू सहभागी हुने प्रतियगितामा
विभिन्न जातजातिका मौलिक संस्कृति झल्किने सामूहिक लोक नृत्य प्रस्तुत हुने कार्यक्रम संयोजक वीरेन्द्र यादवले बताए ।
आयोजक यादवका अनुसार, प्रत्येक समूहमा कम्तिमा ६ देखि बढीमा १२ जना कलाकारले समूहमा प्रतिस्पर्धा गर्ने छन्।
प्रतियोगितामा उत्कृष्ट हुने समूहहरूका लागि आकर्षक नगद पुरस्कार र ट्रफीको व्यवस्था गरिएको केन्द्रका उपाध्यक्ष समेत संयोजक यादवले प्रष्ट पारे।
यसका साथै, नेपालगन्जमा बसेर कलाकारिता क्षेत्रमा विशेष योगदान पुर्याउने एक जना वरिष्ठ कलाकारलाई ‘विशेष सम्मान’ अर्पण गरिने केन्द्र द्वारा जारी प्रेस नोटमा उल्लेख छ ।
कार्यक्रमलाई भव्य रूपमा आयोजना गर्नका लागि बाँके कला केन्द्रका उपाध्यक्ष विरेन्द्र यादवलाई कार्यक्रम संयोजकको जिम्मेवारी दिइएको हो । स्थानीय कला र संस्कृतिको प्रवर्द्धन गर्ने उद्देश्यले आयोजित यसलाई आगामी वर्षमा अझै भव्य रूपमा आयोजना गर्ने गरी सोच बनाएको केन्द्रका अध्यक्ष सुन्दर गुरुङले बताए।
