१३ औं अन्तर्राष्ट्रिय महिनावारी दिवसको अवसरमा नेपालगन्जमा महिला तथा किशोरीहरुलाई महिनावारी चक्र, स्वच्छता र व्यवस्थापनबारे अभिमुखिकरण प्रदान गरिएको छ । कार्यक्रममा सहभागीहरुलाई ब्रासलेट बनाउन सिकाएर उनीहरुले तयार पारेका ब्रासलेटसमेत वितरण गरिएको थियो ।
महिनावारीसँग जोडिएका भ्रम हटाउने, स्वच्छता अभ्यासबारे जानकारी दिने तथा किशोरी र महिलामा आत्मविश्वास बढाउने उद्देश्यले कार्यक्रम आयोजना गरिएको आयोजकले जनाएको छ । उनीहरुका अनुसार, कार्यक्रममा ३० जना महिला तथा किशोरीको सहभागिता रहेको थियो ।
अभिमुखिकरण सत्रमा परियोजना व्यवस्थापक रमिता शाह र शिक्षा पर्सन मिना घर्तिमगरले महिनावारी चक्रका विभिन्न पक्षबारे सहजीकरण गरेका थिए । उनीहरुले महिनावारीको नियमित चक्र, सरसफाइ, स्वास्थ्य सावधानी र व्यवहारिक व्यवस्थापनका विषयमा सहभागीहरुसँग अन्तरक्रियासमेत गरेका थिए ।
सहजीकरणका क्रममा महिनावारीलाई लुकाएर हेर्ने सामाजिक प्रवृत्ति अझै रहेको उल्लेख गर्दै सहभागीहरुलाई खुला रुपमा स्वास्थ्यसम्बन्धी विषयमा छलफल गर्न प्रेरित गरिएको थियो । ‘महिनावारी प्राकृतिक प्रक्रिया हो । यसलाई लाजको विषय होइन, स्वास्थ्य सचेतनाको विषयका रुपमा बुझ्न आवश्यक छ,’ सहजीकरणका क्रममा प्रशिक्षकहरुले बताएका थिए ।
अभिमुखिकरणपछि सहभागीहरुलाई ब्रासलेट बनाउने तालिम दिइएको थियो । तालिममा सहभागी किशोरी तथा महिलाले आफ्नै हातले विभिन्न डिजाइनका ब्रासलेट तयार गरेका थिए । तालिम सकिएपछि उनीहरुले बनाएका ब्रासलेट सहभागीहरुमै वितरण गरिएको थियो ।
एफकेबी युकेको सहयोग र बास नेपालको आयोजनामा सञ्चालन भइरहेको ‘नेपालमा बसोबास गर्ने महिला तथा किशोरीहरुलाई महिनावारी स्वच्छता तथा व्यवस्थापन परियोजना’ अन्तर्गत उक्त कार्यक्रम गरिएको हो ।
कार्यक्रमको अन्त्यमा बास नेपालका निर्देशक हेमराज भट्टले सहभागीहरुलाई ब्रासलेट वितरण गरेका थिए । उनले महिनावारी स्वास्थ्यसम्बन्धी सचेतना समुदायस्तरसम्म विस्तार गर्न यस्ता कार्यक्रम उपयोगी हुने बताए । ‘महिलाको स्वास्थ्य र सम्मानसँग जोडिएको विषय भएकाले महिनावारीबारे खुला छलफल र सचेतना आवश्यक छ,’ उनले भने ।
