बाँके युनेस्को क्लबले बर्दियाका तीन स्थानीय तहलाई विपद् जोखिम न्यूनीकरण तथा पूर्वतयारीका सामग्री हस्तान्तरण गरेको छ । क्लबले मधुवन नगरपालिका, गुलरिया नगरपालिका र बढैयाताल गाउँपालिकालाई २ लाख ३५ हजार ८ सय रुपैयाँ बराबरका सहयोग सामग्री उपलब्ध गराएको हो ।
प्लान इन्टरनेशनल नेपालको साझेदारीमा सञ्चालन भइरहेको बालिका सशक्त परियोजना अन्तर्गत ती सामग्री हस्तान्तरण गरिएको क्लबले जनाएको छ । स्थानीय तहको विपद् प्रतिकार्य क्षमता बलियो बनाउने, समुदायको उत्थानशीलता बढाउने र सम्भावित विपद्का बेला प्रभावकारी तयारी गर्न सहयोग पुग्ने उद्देश्यले सामग्री वितरण गरिएको बाँके युनेस्को क्लबका अध्यक्ष प्रवेज अलि सिद्दिकीले बताए ।
त्यसबारे उनले दैनिक नेपालगन्जसँग भने, ‘स्थानीय सरकार र समुदायलाई विपद्का बेला छिटो र प्रभावकारी रूपमा काम गर्न सक्ने बनाउने लक्ष्यसहित सामग्री सहयोग गरिएको हो ।’ उनका अनुसार, परियोजनाले सामग्री वितरणमा मात्रै सीमित नभई समुदायस्तरमा सचेतना र क्षमता विकासका कार्यक्रमसमेत सञ्चालन गर्दै आएको छ ।
परियोजना अन्तर्गत युवाहरूलाई विभिन्न तालिम र क्षमता विकास कार्यक्रममार्फत सक्रिय बनाइएको क्लबले जनाएको छ । प्रशिक्षित युवा स्वयंसेवकहरूले समुदायमा विपद् पूर्वतयारी, जोखिम न्यूनीकरण र जनचेतनामूलक अभियान सञ्चालन गर्दै आएका छन् । उनीहरूले स्थानीय स्तरमा विपद् सम्बन्धी सचेतना विस्तारमा भूमिका खेलिरहेको क्लबको भनाइ छ ।
विपद् जोखिम न्यूनीकरणका विषयलाई स्थानीय तहको नियमित छलफलको एजेन्डा बनाइएको पनि जनाइएको छ । मासिक समन्वय बैठकमार्फत पूर्वतयारी योजना, जोखिम व्यवस्थापन, सरोकारवालाबीचको सहकार्य र सञ्चालन भइरहेका गतिविधिको समीक्षा हुँदै आएको क्लबले जनाएको छ ।
बाँके युनेस्को क्लब र प्लान इन्टरनेशनल नेपालले स्थानीय सरकारसँग निरन्तर सहकार्य गर्दै विपद् जोखिम न्यूनीकरणका कार्यक्रमलाई स्थानीय नीति, योजना र विकास कार्यक्रमसँग जोड्ने प्रयास गरिरहेको जनाइएको छ । समुदायस्तरमा दिगो र उत्थानशील संरचना निर्माणका लागि समन्वयलाई अझ प्रभावकारी बनाइएको क्लबले उल्लेख गरेको छ ।
मधुवन नगरपालिकामा आयोजित सामग्री हस्तान्तरण कार्यक्रममा नगरप्रमुख तेजबहादुर भाट, प्रमुख प्रशासकीय अधिकृत धर्मराज न्यौपाने, बाँके युनेस्को क्लबका उपकार्यकारी निर्देशक गोविन्दप्रसाद लामिछाने र कार्यक्रम अधिकृत विजय शर्माको सहभागिता रहेको थियो ।
त्यसैगरी गुलरिया नगरपालिकामा आयोजित कार्यक्रममा उपप्रमुख सबित्रा गौतम, वरिष्ठ सामाजिक विकास अधिकृत तथा डिआरआर फोकल पर्सन मुकुन्द अर्यालसहित सरोकारवालाको उपस्थिति रहेको थियो ।
बढैयाताल गाउँपालिकामा प्रमुख प्रशासकीय अधिकृत अर्जुन थारु, डिआरआर फोकल पर्सन तथा बाँके युनेस्को क्लबका प्रतिनिधिहरू सहभागी भएका थिए ।
सामग्री हस्तान्तरण कार्यक्रममा सहभागी जनप्रतिनिधि र सरोकारवालाहरूले विपद् जोखिम न्यूनीकरण प्रणालीलाई अझ प्रभावकारी बनाउने प्रतिबद्धता व्यक्त गरेका छन् । उनीहरूले दिगो र उत्थानशील समुदाय निर्माणका लागि सहकार्यलाई निरन्तरता दिने बताएका छन् ।
कार्यक्रममा सहभागीहरूले ‘आज गरिएको पूर्वतयारीले भोलिको सुरक्षित समाज निर्माणमा महत्वपूर्ण योगदान पु¥याउँछ’ भन्ने धारणा राखेका थिए । विपद् जोखिम न्यूनीकरण र समुदायको उत्थानशीलता अभिवृद्धिका लागि आगामी दिनमा पनि निरन्तर सहकार्य गर्ने प्रतिबद्धता उनीहरूले जनाएका छन् ।
