जयबागेश्वरी, मंगल र साइनिङस्टार अन्तिम चारमा, सेमिफाइनलको अन्तिम स्थानका लागि मोडेल र सेन्ट जेभियर्स भिड्ने
बाँके जिल्ला स्तरीय मेयर कप अन्तर विद्यालय छात्र (यु–१८) फुटबल प्रतियोगिताको सेमिफाइनल समीकरण लगभग पूरा भएको छ । बुधबार भएका क्वाटरफाइनल खेलमा जयबागेश्वरी, मंगलप्रसाद मावि र साइनिङस्टार विजयी हुँदै अन्तिम चारमा पुगेका छन् । सेमिफाइनलको बाँकी एक स्थानका लागि अब नेपालगन्ज मोडेल एकेडेमी र नेपालगन्ज सेन्ट जेभियर्सबीच प्रतिस्पर्धा हुनेछ ।
बाँके जिल्ला फुटबल संघको आयोजनामा भइरहेको प्रतियोगिताअन्तर्गत बुधबार भएका खेलहरूमा जयबागेश्वरीले ज्ञानोदय माविलाई, मंगलप्रसाद माविले होलिल्याण्डलाई तथा साइनिङस्टारले ज्ञानज्योतिलाई पराजित गर्दै सेमिफाइनल यात्रा तय गरेका हुन् ।
दिनको पहिलो खेल निकै प्रतिस्पर्धात्मक रह्यो। जयबागेश्वरी र ज्ञानोदयबीच निर्धारित समयसम्म दुवै टोलीले गोल गर्न नसकेपछि खेलको निर्णय टाइब्रेकरबाट गरिएको थियो । टाइब्रेकरमा जयबागेश्वरीले ७–६ को कठिन जित निकाल्यो ।
टाइब्रेकरमा निर्णायक भूमिका खेलेका जयबागेश्वरीका विशेष थारु खेलको उत्कृष्ट खेलाडी घोषित भए । उनलाई जिल्ला खेलकुद विकास समितिका पूर्वअध्यक्ष सन्दिप शाहले पुरस्कार प्रदान गरे ।
दोस्रो खेलमा मंगलप्रसाद माविले होलिल्याण्डमाथि एकतर्फी दबाब बनाउँदै ३–० को जित दर्ता ग¥यो । मंगलका दिलेन्द्र रोकाय उत्कृष्ट खेलाडी चुनिए । उनलाई जिल्ला खेलकुद विकास समितिका पूर्वअध्यक्ष मोहित शाह तथा महेन्द्र बहुमुखी क्याम्पस नेपालगन्जका स्ववियु सभापति केशरजंग शाहीले पुरस्कृत गरे ।
यद्यपि यो खेलपछि होलिल्याण्डले मंगलका एक खेलाडीविरुद्ध प्रोटेस्ट दर्ता गरेको छ । उक्त विषयमा छानबिन प्रक्रिया जारी रहेको जनाइएको छ । होलिल्याण्डले आफ्नो दाबी पुष्टि हुने प्रमाण पेश गर्न सके मंगल प्रतियोगिताबाट बाहिरिन सक्ने अवस्था रहेको आयोजक स्रोतले जनाएको छ ।
तेस्रो खेलमा साइनिङस्टारले ज्ञानज्योतिलाई २–० ले हराउँदै सहज रूपमा सेमिफाइनलमा स्थान सुरक्षित ग¥यो । साइनिङस्टारका स्वयम् विकले दुवै गोल गरे । उत्कृष्ट प्रदर्शन गरेका स्वयम् विक नै खेलको प्लेयर अफ द म्याच घोषित भए । उनलाई नेपालगन्ज न्यूरो अस्पतालका फार्मासिष्ट सुमन चौधरीले पुरस्कार प्रदान गरे ।
दिनको चौथो खेलमा नेपालगन्ज मोडेल एकेडेमीले सम्झना एलिट एकेडेमीलाई २–० ले पराजित गर्दै क्वाटरफाइनलमा प्रवेश ग¥यो । मोडेलका विकास कटुवाल खेलको उत्कृष्ट खेलाडी चुनिए । उनलाई ह्यान्डबल प्रशिक्षक जयन्त शर्माले पुरस्कृत गरे ।
यस जितसँगै मोडेल क्वाटरफाइनलमा पुगेको छ । अब मोडेलले नेपालगन्ज सेन्ट जेभियर्ससँग प्रतिस्पर्धा गर्नेछ । उक्त खेलको विजेता टोलीले सेमिफाइनलमा स्थान बनाउनेछ ।
नेपालगन्ज उपमहानगरपालिकाको सहयोगमा सञ्चालन भइरहेको प्रतियोगितामा जिल्लाका ३७ विद्यालय सहभागी छन् । प्रतियोगिताका विजेताले ३१ हजार रुपैयाँ प्राप्त गर्नेछन् भने उपविजेताले १६ हजार रुपैयाँ पुरस्कार पाउनेछन् । यसैगरी सर्वोत्कृष्ट खेलाडीलाई दुई हजार पाँच सय रुपैयाँ प्रदान गरिने एन्फाका केन्द्रीय सदस्य तथा बाँके जिल्ला फुटबल संघका अध्यक्ष भोजराज शाहीले जानकारी दिए ।
शाहीले ‘प्रतियोगिताले विद्यालयस्तरका खेलाडीलाई आफ्नो प्रतिभा प्रदर्शन गर्ने महत्वपूर्ण अवसर प्रदान गरेको छ’ भन्दै बाँकेमा विद्यालय फुटबलको स्तर उकास्न यस्ता प्रतियोगिता निरन्तर आवश्यक रहेको बताए ।
