स्वादको सहर नेपालगन्जमा ‘मेहफिल–ए–उद्यम ः द रोयल बिजनेस ग्यादरिङ’ आयोजना हुने भएको छ ।
नेपाली युवा उद्यमी मञ्च (एनवाइइएफ) नेपालगन्ज च्याप्टरले शनिबार यहाँका उद्यमी, उद्योगपति तथा व्यवसायिक अगुवाहरूलाई एउटै मञ्चमा ल्याउने उद्देश्यसहित भव्य कार्यक्रमको घोषणा गरेको हो ।
विहीवार पत्रकार सम्मेलनमार्फत नेपाली युवा उद्यमी मञ्च (एनवाइइएफ) नेपालगन्ज च्याप्टरका कार्यबाहक अध्यक्ष इ. अर्शद कमल सिद्दीकीले नेपालगन्जको व्यावसायिक क्षेत्रका लागि नयाँ सुरुवातका रूपमा व्याख्या गरे । उनले नेपालगन्जको उद्यमशील समुदायलाई एकताबद्ध गर्ने विश्वास व्यक्त गर्दै ‘नेपालगन्जमा यति ठूलो समूहमा व्यावसायिक नेटवर्किङ र शाही आतिथ्यको संयोजन पहिलो पटक हुँदैछ ।’
आयोजकका तर्फबाट सिद्दीकीले प्रेस विज्ञप्तिमार्फत भनेका छन्, ‘मेहफिल–ए–उद्यम नेपालगन्जका उद्यमीहरूको एकता, ऊर्जा र महत्त्वाकांक्षाको प्रतीक हो । हामी चाहन्छौँ कि यो कार्यक्रमबाट निर्मित सम्बन्धहरू व्यापारिक भागीदारी र दीर्घकालीन विकासका आधार बनून् ।’
व्यवसायिक सम्बन्ध विस्तार, ज्ञान आदानप्रदान र सहकार्यका अवसर सिर्जना गर्ने लक्ष्यसहित आयोजना गर्न लागिएको कार्यक्रममा ३ सय जनासम्म उद्यमी, उद्योगपति तथा व्यवसायिक नेतृत्वको सहभागिता रहने अपेक्षा गरिएको आयोजकले जनाएको छ ।
भारतीय सीमासँग प्रत्यक्ष जोडिएको नेपालगन्जलाई देशकै प्रमुख व्यापारिक केन्द्रमध्ये एक मानिए पनि यहाँका व्यवसायीबीच नियमित र संगठित नेटवर्किङको अवसर सीमित रहेको अनुभवका आधारमा कार्यक्रमको अवधारणा अघि सारिएको बताइएको छ । आयोजकको विश्वास छ, यसले उद्यमीहरूबीच नयाँ साझेदारी, सहकार्य र व्यावसायिक सम्बन्ध विस्तारका सम्भावना बढाउनेछ ।
कार्यक्रममा सहभागीहरूले अनुभवी उद्योगपतिसँग प्रत्यक्ष संवाद गर्ने अवसर पनि पाउनेछन् । ‘उद्यम की बात’ शीर्षकमा आयोजना गरिने विशेष टक शो मार्फत वरिष्ठ उद्योगपति र नयाँ पुस्ताका उद्यमीबीच अनुभव साझा हुने सिद्दीकीले बताए ।
सांस्कृतिक र आतिथ्य पक्षलाई पनि विशेष प्राथमिकता दिइएको आयोजकले जनाएको छ । कार्यक्रममा काकोरी कबाब, गलावटी कबाब, चिकेन बिरयानी, दाल मखनी, लाइभ पास्ता काउन्टर, चाट काउन्टरलगायतका विभिन्न परिकारसहित शाही मुगलाई स्वादको व्यवस्था गरिएको छ ।
‘लाइभ गजल, शायरी, सांस्कृतिक प्रस्तुति कार्यक्रमका थप विशेषता हुनेछन्,’ का.बा. अध्यक्ष सिद्दीकीले भने ।
नेपाली युवा उद्यमी फोरम नेपालका युवा उद्यमीहरूको सक्रिय तथा प्रभावशाली संस्थाका रूपमा परिचित छ । बाँकेलाई केन्द्र बनाएर सञ्चालन भइरहेको नेपालगन्ज च्याप्टरले उद्यमशीलता प्रवर्धन, क्षमता विकास, नेटवर्क विस्तार तथा व्यवसायमैत्री वातावरण निर्माणका लागि विभिन्न कार्यक्रम सञ्चालन गर्दै आएको छ ।
पत्रकार सम्मेलनमा मञ्चका द्वितीय उपाध्यक्षसमेत रहेका कार्यक्रम संयोजक अल्ताफ बगवान, कुनाल देववंशी, बसन्त भण्डारी, सिद्धान्त जस्रोतिया, सिद्धान्त अग्रवाल लगायतका पदाधिकारीहरुले कार्यक्रमबारे आफ्ना धारणा राखेका थिए । ‘यसले नेपालगन्जको पहिचानमा थप नयाँपन ल्याउनेछ,’ उनीहरुले भने ।
