ब्रह्माकुमारीज बैजनाथले आयोजना गरेको रक्तदान कार्यक्रममा २१ पिन्ट रगत संकलन भएको छ । बैजनाथ गाउँपालिका–६ स्थित सम्झना बजारमा भएको कार्यक्रममा गाउँपालिका उपाध्यक्ष निर्मला रोकाया, वडाध्यक्ष भूपाल पुनसहित जनप्रतिनिधि, राजनीतिक दलका प्रतिनिधि, कर्मचारी र स्थानीयले रक्तदान गरेका थिए ।
ब्रह्माकुमारी ईश्वरीय विश्वविद्यालयकी अन्तर्राष्ट्रिय पूर्व मुख्य प्रशासिका राजयोगिनी डा. दादी प्रकाशमणिको १९औँ पुण्य स्मृति तथा विश्व बन्धुत्व दिवसका अवसरमा राष्ट्रिय रूपमा सञ्चालन गरिएको विश्व बन्धुत्व रक्तदान अभियानअन्तर्गत सम्झना बजारमा विशेष रक्तदान कार्यक्रम आयोजना गरिएको हो ।
कार्यक्रममा रक्तदान गर्न स्थानीय तथा विभिन्न क्षेत्रका व्यक्तिको उत्साहजनक सहभागिता रहेको थियो । जनप्रतिनिधि र कर्मचारीले समेत रक्तदान गरेपछि सहभागीहरू थप उत्साहित भएका थिए ।
बैजनाथ गाउँपालिका उपाध्यक्ष निर्मला रोकाया, बैजनाथ गाउँपालिका–६ का वडाध्यक्ष भूपाल पुन, वडा सचिवद्वय निमबहादुर थापा र जितेन्द्र लामिछाने लगायतले रक्तदान गरेका थिए । कार्यक्रममा राष्ट्रिय स्वतन्त्र पार्टी बैजनाथका अध्यक्ष धनबहादुर बस्नेत, नेपाली कांग्रेस बैजनाथका अध्यक्ष देवबहादुर केसी, नेपाल कम्युनिस्ट पार्टी एमालेका वडा अध्यक्ष दिलबहादुर विश्वकर्मा लगायतको पनि उपस्थिति थियो ।
ब्रह्माकुमारी ईश्वरीय विश्वविद्यालयका केन्द्रीय उपाध्यक्ष एवं क्षेत्रीय प्रमुख राजयोगिनी ब्रह्माकुमारी दुर्गा दिदीले दादी प्रकाशमणिको समाज सेवाप्रतिको भावनालाई निरन्तरता दिने उद्देश्यले रक्तदान अभियान अघि बढाइएको बताइन्। उनले संस्थाकी पूर्व प्रशासकीय प्रमुख स्वर्गीय राजयोगिनी दादी डा. प्रकाशमणिको जीवनी र समाज सेवाप्रतिको भावनालाई अझ मूर्त रूप दिन समाज सेवा विभाग, नेपालले रक्तदान महाअभियान सञ्चालन गरेको जानकारी दिइन् ।
’गत वर्ष यस संस्था मार्फत ११ हजार ९१६ पिन्ट रगत संकलन भएको थियो,’ दुर्गा दिदीले भनिन्, ’यस वर्ष भदौ ५ देखि ९ गतेसम्म सञ्चालन गरिएको महाअभियानमा भदौ ५ गते १ हजार ९७ पिन्ट र भदौ ६ गते ३ हजार १०६ पिन्ट रगत संकलन भएको छ ।’
रक्तदान अभियानलाई देशव्यापी रूपमा सञ्चालन गरिएको उनले बताइन् । मानव सेवासँग जोडिएको रक्तदानलाई दादी प्रकाशमणिको समाज सेवाको भावनासँग जोडेर अभियान अघि बढाइएको उनको भनाइ थियो ।
कार्यक्रमकी प्रमुख अतिथि निर्मला रोकायाले रक्तदानको महत्व बुझेर सर्वसाधारणलाई पनि सहज रूपमा रगत उपलब्ध हुने वातावरण निर्माण गर्नुपर्नेमा जोड दिइन् । उनले रक्तदानलाई नियमित सामाजिक सेवाका रूपमा अघि बढाउन सबै पक्षको सहयोग आवश्यक रहेको बताइन् ।
कार्यक्रममा रेडक्रस ब्लड बैंक कोहलपुरका इन्चार्ज राजेन्द्रकुमार महतरा, पत्रकार कुशल दर्लामी, राजनीतिक दलका प्रतिनिधि, स्थानीय जनप्रतिनिधि, रक्तदाता तथा अन्यको उपस्थिति थियो। रक्तदान कार्यक्रममा सहभागी रक्तदातालाई अभियानका क्रममा मानवीय सेवामा योगदान पु¥याएको भन्दै उत्साहित गरिएको थियो ।
कार्यक्रमको अध्यक्षता ब्रह्माकुमारी ईश्वरीय विश्वविद्यालयका केन्द्रीय उपाध्यक्ष एवं क्षेत्रीय प्रमुख राजयोगिनी ब्रह्माकुमारी दुर्गा दिदीले गरेकी थिइन् । शाखा प्रमुख ब्रह्माकुमारी आशाले कार्यक्रम सञ्चालन गरेकी थिइन् ।
