लुम्बिनी प्रदेशको प्रमुख सचिवको जिम्मेवारी विनोदबहादुर कुँवरलाई दिइने भएको छ । संघीय सरकारले बिहीबार गरेको निर्णयअनुसार कुँवरलाई लुम्बिनी प्रदेशको प्रमुख सचिवको जिम्मेवारी दिन लागिएको हो ।
लुम्बिनीका विभिन्न जिल्लाको प्रशासनिक अनुभव संगालेका कुँवर यसअघि राष्ट्रिय समावेशी आयोगका सचिवका रूपमा कार्यरत थिए । संघीय सरकारको निर्णयसँगै उनलाई लुम्बिनी प्रदेशको प्रशासनिक नेतृत्व सम्हाल्ने जिम्मेवारी दिइने भएको हो ।
यसअघि लुम्बिनी प्रदेशको प्रमुख सचिव रहेका कृष्णप्रसाद काप्रीको निर्वाचन आयोगमा सरुवा भएको छ । गत मंसिर १ गते प्रदेशको प्रमुख सचिवको जिम्मेवारी सम्हालेका काप्रीले ९ महिना २६ दिन प्रदेशको प्रशासनिक नेतृत्व गरे ।
सरुवा भएर निर्वाचन आयोग जान लागेका काप्रीलाई शुक्रबार मुख्यमन्त्री तथा मन्त्रिपरिषद्को कार्यालय राप्ती उपत्यका देउखुरीमा आयोजित कार्यक्रममा मुख्यमन्त्री चेतनारायण आचार्यले बिदाइ गरेका छन् ।
बिदाइ कार्यक्रममा मुख्यमन्त्री आचार्यले काप्रीको नेतृत्वमा प्रदेशमा केही नयाँ कामको थालनी भएको बताए। प्रशासनिक सुधारका क्षेत्रमा पनि उनले महत्वपूर्ण भूमिका निर्वाह गरेको आचार्यको भनाइ थियो । ‘यो अवधिमा प्रशासनिक सुधारका क्षेत्रमा महत्वपूर्ण काम भएको छ,’ आचार्यले भने ।
काप्रीले आफ्नो कार्यकालमा मन्त्रालयको संख्या घटाउने, सरकारी खर्चमा मितव्ययिता कायम गर्ने र सुशासन प्रवद्र्धनका क्षेत्रमा काम गरिएको बताए । प्रदेशले सुशासनका क्षेत्रमा धेरै नयाँ काम गरेको उनको भनाइ थियो ।
आफ्नो सेवा यात्राबारे जानकारी दिँदै काप्रीले विद्यालय निरीक्षक पदबाट सरकारी सेवामा प्रवेश गरेको बताए ।
