नेपालगन्जमा शनिवार सुरु भएको चौथो नेपालगन्ज मेयर कप रेटिङ चेस प्रतियोगिताको पहिलो दिन तीन चरणका खेल सकिँदा १५ खेलाडीले समान ३ अंक जोड्दै अग्रता लिएका छन् ।
लुम्बिनी, सुदूरपश्चिम र कर्णाली प्रदेशका १२३ खेलाडी सहभागी प्रतियोगितामा बाँके च्याम्पियन आयुष डेमनरौरा, रुपन्देहीका राष्ट्रिय खेलाडी सुमन श्रेष्ठ र हुम्लाका गगनबहादुर शाहीसहित १५ खेलाडीले शतप्रतिशत नतिजा निकालेका हुन् ।
नेपालगन्ज उपमहानगरपालिकाको आर्थिक सहयोग तथा बाँके जिल्ला बुद्धिचाल संघको आयोजनामा प्रतियोगिता शनिबारदेखि नेपालगन्ज–२ स्थित जय बागेश्वरी माध्यमिक विद्यालयमा सुरु भएको हो । स्विस लिग प्रणालीमा ७ चरणमा खेलाइने प्रतियोगिताको चौथो चरणका खेल आइतबारदेखि पुनः सञ्चालन हुनेछन् ।
पहिलो दिनको खेलपछि अग्रस्थानमा रहने अन्य खेलाडीमा बाँकेकी साविक छात्रा नेपाल च्याम्पियन इशा गिरी, बाँके चेस संघका सचिव मदन वली र तेस्रो नेपालगन्ज मेयर कपका च्याम्पियन खिमबहादुर पुन पनि छन् । तीन चरणका खेल सकिँदा उनीहरूसहित १५ खेलाडीले समान ३ अंक बनाएका हुन् ।
प्रतियोगितामा विभिन्न विधातर्फ उत्कृष्ट हुने ३५ खेलाडीलाई नगद पुरस्कार प्रदान गरिने आयोजकले जनाएको छ । त्यसका लागि कुल १ लाख १३ हजार रुपैयाँ पुरस्कार छुट्याइएको छ । विजेताका लागि ३० थान ट्रफी तथा मेडलको समेत व्यवस्था गरिएको छ ।
प्रतियोगितामा लुम्बिनी, सुदूरपश्चिम र कर्णाली प्रदेशका विभिन्न जिल्लाबाट खेलाडी नेपालगन्ज आएका छन् । तीन प्रदेशका १२३ खेलाडीको सहभागिताले प्रतियोगितालाई क्षेत्रीय स्तरको प्रतिस्पर्धाका रूपमा अघि बढाएको आयोजकको भनाइ छ ।
बाँके चेस संघका सचिव मदन वलीले पहिलो दिनको तीन चरणको प्रतिस्पर्धाबाट खेलाडीबीच कडा प्रतिस्पर्धा देखिएको बताए । ‘तीन चरणपछि १५ खेलाडीले ३ अंक जोडेर अग्रता लिएका छन् । बाँकी चरणका खेलसँगै उपाधिका लागि प्रतिस्पर्धा थप रोचक बन्नेछ,’ उनले भने ।
‘आइतबार चौथो चरणका खेल सञ्चालन हुनेछन्, त्यसपछि बाँकी चरणका प्रतिस्पर्धा पनि स्विस लिग प्रणालीअनुसार अघि बढाइनेछ,’ कार्यक्रमको नेतृत्व गरिरहेका प्रशिक्षक पशुपतिनाथ योगीले दैनिक नेपालगन्जसँग भने ।
