एक किलोबढी अफीमसहित नेपाली महिला पक्राउ
एक नेपाली महिला सीमावर्ती भारतीय बजार रुपैडिहामा पक्राउ परेकी छन् । प्रहरी र सशस्त्र सीमा बलको संयुक्त टोलीले चेकजाँचका क्रममा एक किलोबढी अफीमसहित उनी पक्राउ परेको भारतीय सुरक्षाकर्मीले जनाएका छन् । पक्राउ पर्नेमा रुकुमकी ३८ वर्षीया मनिषा बुढ़ाथोकी हुन् ।
नेपाल–भारत सीमा क्षेत्रमा लागुऔषधविरुद्ध चलाइएको अभियानका क्रममा रुपईडीहा चेकपोस्टबाट १.२९० किलोग्राम अफीमसहित ती नेपाली महिलाई पक्राउ गरिएको भारतीय प्रहरीको भनाइ छ । प्रहरीले उनलाई तस्करका रुपमा बुझेको देखिन्छ । जबकी लागुऔषधका अन्तर्राष्ट्रिय कारोबारी तस्करले महिलाहरुलाई पटक–पटक भरिया बनाउने गरेका घटना नेपाल–भारत दुवैतिर प्रकाशमा आउने गरेको छ ।
प्रहरीका अनुसार, बरामद अफीमको अन्तर्राष्ट्रिय बजार मूल्य करिब १५ लाख भारतीय रुपैयाँ रहेको छ । पक्राउ परेकी मनिषा पुथा उत्तरगंगा गुनमा–४, जिल्ला रुकुम, नेपालकी हुन् । प्रहरी भन्छ्, उनी धर्मजीत विश्वकर्माकी पत्नी हुन् । उनी त्यति ठुलो परिमाणको लागुऔषध अफीम बोकेर जमुनाह चौकी कसरी पार गरिन् भन्ने कुरालाई भारतीय प्रहरीले प्रश्न गरेको त्यहाँका पत्रकार सुरेन्द्र मधेसियाले बताए ।
रुपईडीहा थाना र सशस्त्र सीमा बलको संयुक्त टोलीले मंगलवार रुपईडीहा चेकपोस्टमा नियमित चेकजाँच गरिरहेको थियो । सोही क्रममा शंकास्पद अवस्थामा रहेकी मनिषाको जाँच गर्दा उनको साथबाट अफीम फेला परेको प्रहरीले जनाएको छ ।
पक्राउपछि उनलाई रुपईडीहा थानामा ल्याइएको थियो । प्रहरीले मनिषाविरुद्ध मु०अ०सं० २७५÷२०२६ अन्तर्गत धारा ८÷१८(सी) एनडीपीएस एक्टमा मुद्दा दर्ता गरेको छ। आवश्यक कानुनी प्रक्रिया पूरा गरी उनलाई बहराइचस्थित अदालतमा पठाइएको प्रहरीले जनाएको छ ।
प्रहरीले सीमा क्षेत्रमा लागूऔषधको ओसारपसार नियन्त्रणका लागि संयुक्त चेकजाँच र निगरानीलाई निरन्तरता दिइने जनाएको छ । प्रहरीका अनुसार, मादक पदार्थको ओसारपसार तथा तस्करी नियन्त्रण गर्न बहराइच प्रहरीको अभियान जारी छ । प्रहरी अधीक्षक बहराइच विश्वजीत श्रीवास्तवको निर्देशनमा सञ्चालन भइरहेको अभियानअन्तर्गत सीमा क्षेत्रमा निगरानी र चेकजाँचलाई कडाइ गरिएको छ ।
अभियानलाई अपर पुलिस अधीक्षक ग्रामीण दुर्गा प्रसाद तिवारी र क्षेत्राधिकारी नानपारा चित्रांशु गौतमले अनुगमन गरिरहेका छन्। रुपईडीहा थानाका प्रभारी निरीक्षक हरेन्द्र कुमार मिश्रको नेतृत्वमा सीमा क्षेत्रमा चेकजाँच भइरहेको प्रहरीले जनाएको छ ।
