नेपालमै निजी क्षेत्रबाट कागज उद्योग सञ्चालनको पहल लिएको एक्सिलेन्ट पेपर रिसाइकल कन्सर्न प्रा.लि. प्रस्तावित एक्सिलेन्ट पेपर मिल कम्पनी लिमिटेडको सञ्चालक टिमले लुम्बिनीका मुख्यमन्त्री जोख बहादुर महरा सहितको सरकारी टोलीसँग बुधबार छलफल गरेको छ । उद्योगका अध्यक्ष ज्योतिलाल भण्डारीका अनुसार, आगामी नीति तथा कार्यक्रम र बजेटमा औद्योगिक सवाललाई प्राथमिकता दिन तथा रोजगारमूलक उद्योगका लागि सहयोगी भूमिकाका लागि सरकारलाई सुझाव दिन छलफल गरिएको हो ।
मुख्यमन्त्री कार्यालय दाङ्गमा भएको भेटघाटमा मुख्यमन्त्री महरासँगै उद्योगमन्त्री खड्ग बस्नेत, प्रदेशसभा सदस्य निवर्तमान मन्त्री कृष्णा केसी लगायतको टोलीले रिसाइकल प्लान्ट जडान भई उत्पादन सुरु भैसकेको एक्सिलेन्टको वर्तमान अवस्था र पेपर मिलको आगामी योजनाबारे बृहत छलफल
गरिएको अध्यक्ष भण्डारीले जानकारी दिए ।
एक्सिलेन्टका निर्देशक राजेन्द्र चौधरी, घरेलु तथा साना उद्योग महासंघ बाँकेका अध्यक्ष मधु् खड्का लगायतको टोलीले उत्पादनमूलक क्षेत्रलाई प्राथमिकता दिनेगरी आगामी नीति तथा कार्यक्रम ल्याउन र सोही अनुसार बजेट समेतको व्यवस्थापनका लागि मुख्यमन्त्री, उद्योगमन्त्री लगायतलाई सुझाव दिइएको अध्यक्ष भण्डारीको भनाइ छ । ‘राप्तीसोनारी क्षेत्र मात्र नभई लुम्बिनी प्रदेशमै बहुसंख्यक कृषकलाई आयस्तरसँग जोड्न सकिने गरी एक्सिलेन्ट पेपर मिलको अवधारणा आएकाले त्यसबारे सरकारको सकारात्मक भूमिका आवश्यक हुन्छ’, भण्डारीले रिसाइकल प्लान्टले गरेको उत्पादन मुख्यमन्त्रीलाई हस्तान्तरण गर्न पाउँदा उत्साहित भएको प्रसंग उठाउँदै भने, ‘हामीलाई विश्वास छ, प्रदेश सरकारले उद्योग मन्त्री नीति तथा कार्यक्रम र बजेट ल्याउनेछ ।’
यसअघि रिसाइकल प्लान्टको अवलोकन र पेपर मीलको अवधारणा बुझ्न उद्योग स्थल राप्तीसोनारी पुगेकी प्रदेशसभा सदस्य नमूनाको नेतृत्वमा उद्योग सम्बन्धित टोली प्रदेश सरकारका मुख्यमन्त्री, उद्योगमन्त्री लगायतको सरकारीटोलीसँग छलफलका लागि दाङ्ग पुगेको हो । ‘आफै श्रमिक, आफै मालिक ः उत्पादन हाम्रै नेपालको’ भन्ने अवधारणाले पनि सामूदायिक स्तरमा स्थापना भैरहेको यो उद्योगलाई सरकारले आवश्यक सहजीकरण गरिदिनुपर्छ भन्ने हामीलाई लागेको छ’, सांसद नमूनाले दैनिक नेपालगन्जसँग उद्योग क्षेत्र अवलोकन पछि भनिन् ।
