आगामी चैत १९ गतेदेखि सञ्चालन हुने माध्यमिक शिक्षा परीक्षा (एसईई) का लागि बाँके जिल्लामा सम्पूर्ण तयारी पूरा भएको छ । जिल्ला शिक्षा विकास तथा समन्वय इकाईका प्रमुख धनसुधन चौलागाईंले यस वर्ष परीक्षा व्यवस्थापनलाई अझ व्यवस्थित, सुरक्षित र पारदर्शी बनाइएको जानकारी दिए ।
सोमवार आयोजित एउटा कार्यक्रममा चौलागाईंले परीक्षा सम्बन्धी विस्तृत विवरण सार्वजनिक गर्दै यस वर्ष कुल ९ हजार ६८३ विद्यार्थी एसईई परीक्षामा सहभागी हुने बताए । उनका अनुसार, नियमिततर्फ ७ हजार ९८१ विद्यार्थी सहभागी हुनेछन् भने ग्रेड वृद्धि (इम्प्रुभमेन्ट) तर्फ १ हजार ७०२ विद्यार्थी रहेका छन् ।
विषयगत रूपमा हेर्दा प्राविधिक धारमा २७० र साधारण धारमा ७ हजार ७११ विद्यार्थी परीक्षा दिनेछन् । परीक्षा सञ्चालनका लागि जिल्लाभर ३६ वटा परीक्षा केन्द्र निर्धारण गरिएको छ, जसमा २८ सामुदायिक तथा ८ संस्थागत विद्यालय समावेश छन् ।
‘सञ्चार संवाद’ द्वारा आयोजित पत्रकार भेटघाट कार्यक्रममा प्रमुख अतिथि परीक्षा केन्द्र निर्धारण गर्दा भौगोलिक सहजता, पूर्वाधार तथा सुरक्षा अवस्थालाई प्राथमिकता दिइएको प्रमुख चौलागाईंले जानकारी दिए । उनका अनुसार, परीक्षा शान्त, निष्पक्ष र मर्यादित रूपमा सञ्चालन गर्न सुरक्षा निकायसँग समन्वय गरी कडा निगरानी व्यवस्था मिलाइएको छ । ‘प्रश्नपत्र चुहावट, नक्कल तथा अन्य अनियमितता रोक्न विशेष रणनीति अपनाइएको छ,’ सञ्चार संवादमा चौलागाईंले भने, ‘कुनै पनि किसिमको त्रुटि वा अनियमितता पाइएमा तत्काल कारबाही गरिने स्पष्ट पारिएको छ ।’
उनका अनुसार, परीक्षा सञ्चालनमा खटिने निरीक्षक, सुपरिवेक्षक तथा केन्द्राध्यक्षहरूको छनोट योग्यता र अनुभवका आधारमा गरिएको छ । साथै, शिक्षकहरूलाई परीक्षा सञ्चालनसम्बन्धी आवश्यक अभिमुखीकरणसमेत प्रदान गरिएको छ ।
विद्यार्थीहरूको मानसिक दबाब कम गर्न परामर्श कार्यक्रम सञ्चालन गरिएको छ भने अपाङ्गता भएका विद्यार्थीहरूका लागि विशेष सुविधा तथा दुर्गम क्षेत्रका विद्यार्थीका लागि आवश्यक सहुलियतको व्यवस्था गरिएको जनाइएको छ ।
सञ्चार संवादका अध्यक्ष डा. डक्टप्रसाद धितालको अध्यक्षतामा पत्रकार भेटघाट गरिएको हो ।
