सजल गैरे
प्रतिनिधिसभा सदस्यले विहीवार पद तथा गोपनियताको शपथ लिएपछि शुक्रबार नयाँ सरकार गठन हुने तयारीसँगै देशभरि जनअपेक्षा तीव्र रूपमा बढेको छ । ‘भोट फर चेन्ज’ अभियानमार्फत आएको नयाँ जनमतले बालेन्द्र शाह (बालेन) नेतृत्वको सरकारप्रति आशा र दबाब दुवै सिर्जना गरेको छ । व्यवसायी, विद्यार्थी, सहकारीकर्मी र महिला प्रतिनिधिहरूले आ–आफ्ना क्षेत्रगत समस्या समाधान गर्न तत्काल प्रभावकारी कदम चाल्न सरकारसँग आग्रह गरेका छन् ।
दैनिक नेपालगन्जसँगको संवादमा धेरैजसोका आशा उत्साहजनक छन्, ‘अब पक्कै राम्रो हुन्छ ।’ (भिडियो रिपोर्ट हेर्न सक्नुहुन्छ, दैनिक नेपालगन्जको फेसबुक पेजमा) उनीहरुलाई विश्वास छ, अबको सरकारले उनीहरुका कुरा सुन्छ ।
नेपालगन्जका कपडा व्यवसायी बृजेश वैश्यको भनाइ छ, ‘खुला सिमाना र उच्च भन्सार दरका कारण स्थानीय व्यापार संकटमा परेको छ ।’ ग्राहकहरू भारतको रुपैडिया पुगेर सस्तोमा किनमेल गर्ने प्रवृत्तिले यहाँका व्यापारी कमजोर बन्दै गएको उनको भनाइ छ । ‘हजार रुपैयाँको सामानमा भन्सार जोडिँदा लागत १२५० पुग्छ, नाफा राखेर बेच्दा ग्राहकले महँगो भन्छन्,’ उनले गुनासो गरे । अब बन्ने सरकारसँग वैश्यले भन्सार दर घटाउने र सीमाबाट आउने अवैध सामान नियन्त्रण गर्न माग गरेका छन् ।
त्यस्तै, नेपालगन्ज सुनचाँदी व्यवसायी सङ्घका महासचिव सुकनारायण सुनारले गहनामा लगाइएको उच्च कर हटाउनुपर्ने बताए । ‘भारतमा कर करिब ६ प्रतिशत हुँदा नेपालमा १० प्रतिशत छ, यसले प्रतिस्पर्धा कमजोर बनाएको छ,’ उनले दैनिक नेपालगन्जसँग भने । ग्राहक र व्यवसायी दुवै मारमा परेको उल्लेख गर्दै उनले कर दर समायोजन गर्न सरकारलाई आग्रह गरे ।
व्यापारीमात्रै होइन, सहकारी क्षेत्र पनि अब सुधार हुने अपेक्षा गरिएको छ । भरोसा बहुद्देश्यीय सहकारी संस्थाका अध्यक्ष बमबहादुर रावलले साना लगानीकर्तालाई प्रोत्साहन गर्ने नीति आवश्यक रहेको बताए । सहकारी र बैंकबीच सहुलियत ऋणमा सहकार्य हुनुपर्नेमा जोड दिँदै उनले ठगी गर्ने सहकारीलाई कडा कारबाही गर्नुपर्ने धारणा राखे । ‘राम्रो काम गर्ने सहकारीलाई सरकारले सम्मान गर्नुपर्छ,’ उनले दैनिक नेपालगन्जसँग भने । साथै, भ्रष्टाचारविरुद्धका कदम व्यवहारमै देखिनुपर्ने उनको माग छ ।
यता युवापुस्ताबाट पनि सशक्त आवाज उठिरहेको छ । लुम्बिनी विश्वविद्यालयका विद्यार्थी अर्जुन धितालले परिवर्तनका आन्दोलनमा युवाको बलिदान भए पनि प्रतिफल नपाइने अवस्था अन्त्य हुनुपर्ने बताए । ‘यदि समयमै ठोस परिवर्तन आएन भने हाम्रो पुस्ता इतिहासमै सीमित हुनेछ,’ उनले चेतावनी शैलीमा प्रतिक्रिया दिए ।
धितालमात्रै होइन, ब्राइटल्याण्ड कलेजका विद्यार्थी वीर गुप्ताले सीपअनुसारको रोजगारी देशमै उपलब्ध गराउनुपर्ने माग राखे । अर्की विद्यार्थी मुस्कान चलाउनेले स्नातक सक्नेबित्तिकै रोजगारी सुनिश्चित हुने वातावरण चाहिएको बताइन् । महेन्द्र बहुमुखी क्याम्पसकी विद्यार्थी स्वेच्छा रावतले सरकारी विद्यालयमा पनि निजीसरह सुविधा उपलब्ध गराउनुपर्नेमा जोड दिइन् । नवयुवा आफ्ना सबै भावना अबको सरकारले बुझ्नेमा विश्वस्त छन्, उनीहरु ।
महिला नवयुवा नेतृत्वबाट पनि अपेक्षा उस्तै बलियो देखिएको छ । खजुरा गाउँपालिका स्तरीय बाल सञ्जालकी अध्यक्ष प्रियङ्का चौधरीले ३३ प्रतिशत महिला सहभागिता भएको सन्दर्भमा महिलामैत्री नीति कार्यान्वयन हुने आशा व्यक्त गरिन् । उनले शिक्षा र रोजगारीमा समान अवसर सुनिश्चित गर्न तथा महिलालाई आत्मनिर्भर बनाउने वातावरण सिर्जना गर्न सरकारसँग आग्रह गरिन् ।
‘नयाँ सरकारप्रति जनताको अपेक्षा स्पष्ट छ, ‘आर्थिक सुधार, रोजगारी सिर्जना, शिक्षा प्रणालीमा आमूल परिवर्तन र सुशासन,’ जेनजी आन्दोलनलाई नजिकैबाट नियालेकी लुम्बिनी विश्व विद्यालयकी छात्रा सन्ध्या गैरे दैनिक नेपालगन्जसँग भन्छिन्, ‘अब हेर्न बाँकी छ, जनमतबाट स्थापित नेतृत्वले यी अपेक्षालाई कत्तिको व्यवहारमा उतार्छ ।’ उनले यो सरकारलाई जनअपेक्षा विपरित जाने छुट नरहेको धारणा राखिन् ।
