नेपाल निर्यातका २ सय ५० भन्दा बढी ट्रक रोकिए
नेपाल –भारत सीमास्थित रुपईडीहा एकीकृत जाँच चौकी आईसीपीमा देखिएको अव्यवस्था र दुव्र्यवहारको विरोध गर्दै कस्टम हाउस एजेन्ट सीएचए संघ र ट्रक चालकहरुले सोमबार हड्ताल गरेका छन् । हड्तालका कारण नेपालतर्फ निर्यातका लागि पुगेका २५० भन्दा बढी मालवाहक ट्रक आईसीपी गेटमै रोकिएका छन् । ‘त्यसले निर्यात प्रक्रिया नै प्रभावित बनेको छ,’ रुपैडिहास्थित भारतीय पत्रकार सुरेन्द्र मधेसियाले दैनिक नेपालगन्जसँग भने ।
पत्रकार मधेसियाका अनुसार, सीएचए प्रतिनिधि र चालकहरुले सीमा शुल्क कार्यालय आईसीपीका सहायक आयुक्तलाई इमेलमार्फत ९ बुँदे मागपत्र पठाउँदै समस्या समाधानको माग गरेका छन् । उनीहरुले ल्यान्ड पोर्ट अथोरिटी अफ इन्डियाको स्थानीय व्यवस्थापनले निर्यात–आयातमा संलग्न एजेन्ट र चालकमाथि असहयोगी व्यवहार गरेको आरोप लगाएका छन् । गेट पास जारी गर्न अनावश्यक ढिलाइ गरिने र त्यसकै कारण पार्किङ शुल्क बढेर निर्यातकर्ताले आर्थिक नोक्सानी बेहोर्नुपरेको उनीहरुको भनाइ छ ।
हड्तालका कारण सोमबार बिहानैदेखि आईसीपी परिसर बाहिर लामो ट्रक लाइन लागेको थियो । नेपाल पठाउन तयारी अवस्थामा रहेका खाद्यान्न, इन्धन र अन्य सामग्री बोकेका सवारीसाधन घण्टौं रोकिएपछि व्यवसायी पनि चिन्तित बनेका छन् । सीएचए प्रतिनिधिहरुले ‘समस्या समाधान नभएसम्म आन्दोलन जारी रहने’ चेतावनी दिएका छन् ।
मागपत्रमा शिपिङ बिल नभए पनि सवारीसाधनलाई आईसीपी परिसरभित्र प्रवेश दिनुपर्ने उल्लेख गरिएको छ । लेट एक्सपोर्ट अर्डर जारी भएपछि ट्रकलाई २ देखि ३ घण्टासम्म रोक्नुको सट्टा बढीमा आधा घण्टाभित्र प्रवेश दिनुपर्ने माग गरिएको छ । गेट पासमा शिपिङ बिल नम्बर सच्याउन सीएचएको मौखिक वा लिखित अनुरोधलाई स्वीकार गर्नुपर्ने विषय पनि मागपत्रमा समेटिएको छ ।
सीएचए पदाधिकारीहरुले आईसीपीभित्र चालकका लागि आधारभूत सुविधा समेत नरहेको बताएका छन् । पिउने पानी, शौचालय, विश्रामस्थल र क्यान्टिनको अभाव रहेको उनीहरुको गुनासो छ । चालकहरुले ट्रकमुनि खाना पकाउँदा १ हजार भारतीय रुपैयाँ जरिवाना तिराइने गरेको आरोप समेत लगाइएको छ । पार्किङ क्षेत्रमा बस्ने ठाउँ र पिउने पानीको समेत उचित व्यवस्था नरहेको चालकहरुको भनाइ छ ।
सीएचए प्रतिनिधि हसीब अहमदले दैनिक करिब ५० वटा डिजेल, पेट्रोल र एभिएसन टर्बाइन फ्युल एटीएफ बोकेका ट्यांकर बिहानै आईसीपी गेटमा पुग्ने गरेको बताए । तर शिपिङ बिल नहुँदा ती ट्यांकरलाई परिसरभित्र प्रवेश नदिइने गरेको उनको भनाइ छ । उनले ‘ज्वलनशील पदार्थ बोकेका ट्यांकर सडकमा घण्टौं रोकिनु गम्भीर सुरक्षा जोखिम हो’ भने ।
मागपत्रमा डाटा इन्ट्री अपरेटर नीरज झामाथि चालक र सीएचए कर्मचारीसँग अभद्र व्यवहार गर्ने तथा गालीगलौज गर्ने आरोप पनि लगाइएको छ । सीएचए पक्षले उनको तत्काल सरुवा माग गरेको छ । पार्किङ शुल्क उठाउने कर्मचारीहरुले नियतवश प्रक्रिया ढिला गराएर समयसीमा कटाउने र दोब्बर शुल्क असुल्ने गरेको आरोप समेत उनीहरुले लगाएका छन् ।
हड्तालमा सहभागी चालक चन्दन वर्मा, मोहम्मद हफीज, जगदीश, इन्द्रपाल सिंह, कलीम, शमशेर र अजयलगायतले आईसीपीभित्र न्यूनतम सुविधा समेत नपाएको गुनासो गरेका छन् । उनीहरुले ‘पानी, शौचालय र बस्ने ठाउँको समेत अभाव छ’ भने ।
मागपत्रमा हसीब अहमद, तरुण शर्मा, राम कोहली, नरेन्द्र कुमार र धीरज कुमार गिरीसहित अन्य प्रतिनिधिहरुको हस्ताक्षर रहेको छ ।
यस विषयमा आईसीपी प्रबन्धक तरनजीत सिंहसँग सम्पर्क गर्ने प्रयास भए पनि उनको प्रतिक्रिया प्राप्त हुन सकेन ।
