नेपालगन्जकाे मेरो टुकी प्रज्ञालय, आधारभूत विद्यालयले ‘ब्रिजिङ होम एन्ड स्कुल’ नामक अभिभावक कार्यशाला आयोजना गरेको छ। घर र विद्यालयको शिक्षण शैली, व्यवहार र सिद्धान्तहरूमा एकरूपता आओस् भन्ने उद्देश्यले उक्त कार्यशाला गरिएको विद्यालयले जनाएको छ।
‘ब्याक टु स्कुल: बि अ चाइल्ड अगेन’ नामक पहिलो सत्र विद्यालयमा अध्यापन हुने नेपाली तथा अंग्रेजी भाषामा पुस्तकैपिच्छे देखिने फरक र यसले अभिभावक र शिक्षकमा देखिने अन्योललाई हटाउने उद्देश्यमा केन्द्रित थियो। सहभागी अभिभावकले पुनः बच्चा बनेर भाषा र गणितको आधारभूत एकाइको मौखिक र लिखित परीक्षा दिएका थिए। उक्त सत्रमा नेपाली, संस्कृत र अंग्रेजीका अक्षर, उच्चारण र शुद्ध मानक कसरी छुट्याउने भन्ने प्रशिक्षण दिइएको थियो।
कार्यशालामा बालबालिकाको मनोविज्ञान, बहुबौद्धिक क्षमता र गुणहरू पहिचानका लागि ‘नो योर चाइल्ड’ र विद्यालयबारे समग्र जानकारी दिने उद्देश्यले ‘नो योर स्कुल’ नामक सत्र राखिएका थिए। अन्तिम सत्रमा अध्यक्ष र प्रिन्सिपलबाट अभिभावकका प्रश्न र जिज्ञासाहरूको समाधान गरिएको थियो।
कार्यशालापछि आफू धेरै विषयमा स्पष्ट भएको अभिभावक शारदा भण्डारीले बताइन्।
‘आफू नर्सरी पढ्दा जानअनजान कति धेरै अमानक उच्चारण पढिएको रहेछ,’ उनले भनिन्, ‘फेरि नर्सरीको परीक्षा दिएर मानक उच्चारण र अक्षर सिक्न पाउँदा खुसी लाग्यो।’ वर्तमान शिक्षाका सीमा चिर्न र अभिभावक–विद्यालय सम्बन्ध बलियो बनाउन कार्यशालाले महत्त्वपूर्ण भूमिका खेलेको विद्यालयका अध्यक्ष तथा कार्यशालाका सहजकर्ता भोजराज शर्माले बताए। बालबालिकासँगै अभिभावकलाई समेत ‘स्कुलिङ’ होस् तथा विद्यालय–अभिभावकबीच ‘सिनर्जी’ सिर्जना होस् भनेर विद्यालयले ‘प्रज्ञालय प्यारेन्ट्स एकेडेमी’ नामक फोरम स्थापना गरेको प्रज्ञालयकी संस्थापक प्रिन्सिपल कल्पना शर्माले बताइन्। फोरम कुशल अभिभावकत्व, बाल मनोविज्ञान, बालशिक्षाका आयामहरू र भाषाको मानक प्रयोगसम्बन्धी अभिभावक-शिक्षामा केन्द्रित रहने जनाइएको छ।
