बुटवलको नेपालगन्ज रोडस्थित एक पसलबाट ६ लाख २२ हजार रुपैयाँ बराबरका नक्कली नेपाली नोट, नोट छाप्न प्रयोग हुने विभिन्न उपकरण तथा सामग्री बरामद गर्दै प्रहरीले ६ जनालाई पक्राउ गरेको छ । घटनामा संलग्न रहेको आरोपमा पक्राउ परेकामाथि मुद्रासम्बन्धी कसुर मुद्दामा अनुसन्धान अघि बढाइएको प्रहरीले जनाएको छ ।
इलाका प्रहरी कार्यालय बुटवलका प्रमुख एवं प्रहरी नायब उपरीक्षक निशान्त श्रीवास्तवका अनुसार पक्राउ परेकाहरूलाई हिरासतमा राखेर थप अनुसन्धान भइरहेको छ । उनले भने, ‘घर तथा कोठा खानतलासीका क्रममा नक्कली नेपाली नोटसहित नोट छाप्न प्रयोग हुने विभिन्न उपकरण र सामग्री बरामद गरेका छौं । पक्राउ परेकामाथि मुद्रासम्बन्धी कसुरमा थप अनुसन्धान भइरहेको छ ।’
प्रहरीले घर तथा कोठामा गरेको खानतलासीका क्रममा १ हजार दरका ६ सय २२ थान नक्कली नेपाली नोट फेला पारेको थियो। ती नोटको कुल मूल्य ६ लाख २२ हजार रुपैयाँ रहेको प्रहरीले जनाएको छ । त्यससँगै फोटोकपी मेसिन, डेल कम्पनीको ल्यापटप, प्रिन्टर, नक्कली नोट छाप्न प्रयोग हुने १ कार्टुन कागज, लेमिनेसन मेसिन, केमिकल, प्लास्टिक पेपर, नक्कली नोट काट्न प्रयोग हुने मेसिन तथा ६ थान मोबाइलसमेत बरामद गरिएको प्रहरीले जनाएको छ ।
यस प्रकरणमा पक्राउ पर्नेमा बुटवल उपमहानगरपालिका–११ की ३६ वर्षीया गंगा कुमारी, पोखरा महानगरपालिका–१ का किरणकृष्ण तिवारी (कृष्ण), कपिलवस्तुको बाणगंगा नगरपालिका–१ का सञ्जय थारू, भक्तपुरको चाँगुनारायण नगरपालिका–१ का ४१ वर्षीय रामचन्द्र खत्री, दोलखाको शैलुङ गाउँपालिका–४ का ३८ वर्षीय पासाङ तामाङ तथा भारतको पश्चिम बंगाल राज्यअन्तर्गत सिलिगुडीको भक्तिनगर थाना घर भएका ४९ वर्षीय वासुमित्र आनन्द रहेका छन् ।
प्रहरीका अनुसार, नक्कली नेपाली नोट उत्पादन तथा प्रयोगसँग सम्बन्धित गतिविधिबारे सूचना प्राप्त भएपछि अनुसन्धान अघि बढाइएको थियो। त्यसक्रममा गरिएको खानतलासीबाट नक्कली नोट र त्यसको उत्पादनमा प्रयोग हुने सामग्री फेला परेपछि सबैलाई नियन्त्रणमा लिइएको हो । बरामद भएका सामग्रीको प्राविधिक परीक्षणका साथै घटनामा अन्य व्यक्तिको संलग्नता रहेको वा नरहेको विषयमा पनि अनुसन्धान जारी रहेको प्रहरीले जनाएको छ ।
