शशिराम कार्कीलाई तुलसीराम स्मृति पुरस्कार
साहित्य सिर्जना र नेपालको संस्थागत साहित्य विकासमा पु¥याएको योगदानको कदर गर्दै पूर्णिमा साहित्य प्रतिष्ठान कोहलपुरले साहित्यकार डा अमर गिरीलाई ‘पूर्णिमा साहित्य रत्न सम्मान तथा पुरस्कार’ प्रदान गरेको छ । शनिवार आयोजित कार्यक्रममा प्रतिष्ठानले २०८१ सालका लागि प्रदान गरेको उक्त सम्मानसँगै गिरीलाई २५ हजार ५५५ रुपैयाँ नगद, सम्मानपत्र र दोसल्ला प्रदान गरिएको हो ।
सोही समारोहमा ‘तुलसीराम स्मृति पुरस्कार’ साहित्यकार शशिराम कार्कीलाई दिइएको छ । २०८१ सालका लागि प्रदान गरिएको पुरस्कारको राशि ७ हजार ७७७ रुपैयाँ नगद रहेको छ । कार्कीलाई पनि दोसल्ला र सम्मानपत्रसहित पुरस्कृत गरिएको हो ।
हाम्रो पूर्णिमा साहित्य प्रतिष्ठान कोहलपुरको आयोजनामा शनिबार भएको कार्यक्रममा साहित्य सिर्जनासँगै नेपाली साहित्यको संस्थागत विकासमा योगदान पु¥याएका स्रष्टालाई सम्मान गरिएको थियो । कार्यक्रममा साहित्यकार तथा स्रष्टाहरूको उल्लेख्य सहभागिता रहेको थियो । डा इन्द्र भण्डारी, जित बहादुर शाह, सुमित्रा न्यौपाने, प्रदीप भट्टराई, कपिल अन्जान, विष्णु पादुका, चरित्रा शाहलगायत ६ दर्जनभन्दा बढी साहित्यकार कार्यक्रममा सहभागी थिए ।
सम्मान तथा पुरस्कार प्रदान गर्ने क्रममा कार्यक्रमका प्रमुख अतिथि वरिष्ठ साहित्यकार समसामयिक सनत रेग्मी, पूर्णिमाका अध्यक्ष डा पुष्कर रिजाल, तुलसीराम स्मृति पुरस्कारकी संरक्षक पवित्रा ढकाल र पूर्णिमाका सल्लाहकार महानन्द ढकालले संयुक्त रूपमा दुवै स्रष्टालाई सम्मान तथा पुरस्कार अर्पण गरेका थिए ।
प्रमुख अतिथि रेग्मीले कार्यक्रममा नेपाली साहित्यसम्बन्धी गहन विमर्शसमेत भएको भन्दै कार्यक्रमलाई ओजपूर्ण रहेको बताएका थिए । उनले सम्मानित स्रष्टाहरू देशकै गौरव भएको धारणा राखेका थिए ।
सम्मानित दुवै स्रष्टाले पूर्णिमा साहित्य प्रतिष्ठानजस्तो देशकै सक्रिय र आशलाग्दो साहित्यिक संस्थाबाट सम्मानित हुन पाउँदा गौरवको अनुभव भएको बताए । उनीहरूले सम्मान र पुरस्कारका लागि प्रतिष्ठानसहित कार्यक्रममा सहभागी सबैप्रति धन्यवाद व्यक्त गरे ।
कार्यक्रममा प्रतिष्ठानका सल्लाहकार दामोदर पौडेलले सम्मानित तथा पुरस्कृत स्रष्टाको परिचय र साहित्यिक योगदानबारे चर्चा गरेका थिए । त्यस क्रममा दुवै स्रष्टाले नेपाली साहित्यमा पु¥याएको योगदान र उनीहरूको सिर्जनात्मक यात्राका विभिन्न पक्ष प्रस्तुत गरिएको थियो ।
कार्यक्रमको पहिलो चरणमा पूर्णिमाका सचिव तथा कवि केशव निमेषको कविता संग्रह ‘मृत्युगञ्जको मौनता’ को गृहविमोचन गरिएको थियो । कृतिको विमोचन साहित्यकार डा अमर गिरी, कवि निभा शाह, कवि निमेषका मातापिता र धर्मपत्नीले संयुक्त रूपमा गरेका थिए ।
विमोचनपछि ‘मृत्युगञ्जको मौनता’ माथि विमर्श गरिएको थियो । प्यानल छलफलका क्रममा डा अमर गिरी र कवि निभा शाहले कृतिका विभिन्न पक्षबारे धारणा राखेका थिए । उनीहरूले निमेषका केही कविताबाहेक अधिकांश रचना वैचारिक हिसाबले अब्बल रहेको बताएका थिए ।
कृति विमोचन तथा विमर्शका क्रममा पूर्णिमाका सल्लाहकार सागर गैरेले अतिथिहरूको स्वागत गरेका थिए । उनले विमोचित कृति र कृतिकार केशव निमेषका बारेमा जानकारीसमेत दिएका थिए । पहिलो चरणको कार्यक्रमलाई कवि हेम मञ्जिल र लक्ष्मण मानवले सहजीकरण गरेका थिए ।
दुई चरणमा भएको कार्यक्रमको दोस्रो चरण सम्मान तथा पुरस्कार अर्पणमा केन्द्रित थियो । यही चरणमा डा अमर गिरी र शशिराम कार्कीलाई क्रमशः पूर्णिमा साहित्य रत्न सम्मान तथा पुरस्कार र तुलसीराम स्मृति पुरस्कार प्रदान गरिएको हो ।
हाम्रो पूर्णिमा साहित्य प्रतिष्ठान कोहलपुरले साहित्यिक गतिविधिलाई निरन्तरता दिँदै स्रष्टा सम्मान र कृति विमोचनलाई एउटै मञ्चमा जोडेको थियो । कार्यक्रममा उपस्थित साहित्यकारहरूले कृति विमोचनसँगै स्रष्टाको योगदानको मूल्यांकन र सम्मानले साहित्यिक गतिविधिलाई थप ऊर्जा दिने धारणा राखेका थिए ।
संस्थाका अध्यक्ष डा पुष्कर रिजालको अध्यक्षतामा भएको औपचारिक समारोहको सञ्चालन पूर्णिमाका सहसचिव प्रकाश मरासिनीले गरेका थिए ।
