दैलेखी समाज बाँकेले आफ्नै भवन निर्माण गर्ने अभियान अघि बढाएको छ । नवनिर्वाचित अध्यक्ष पूर्णदेव गिरीले भवन निर्माणका लागि व्यक्तिगत रूपमा ५१ हजार १११ रुपैयाँ सहयोग गर्ने घोषणा गरेसँगै समाजले आफ्नै भवन बनाउने अभियानलाई अघि बढाउने भएको हो ।
समाजसँग हाल आफ्नै जग्गा नभएकाले पहिलो चरणमा उपयुक्त स्थानमा जग्गा खोजिने अध्यक्ष गिरीले बताए। जग्गा व्यवस्थापन भएपछि भवन निर्माणको काम अघि बढाइने उनले जानकारी दिए । भवन निर्माणका लागि समाजसँग जोडिएका दाता, शुभेच्छुक र समाजसेवीलाई सहयोग गर्न उनले आग्रह गरे ।
गिरीले भवन निर्माणका साथै बाँकेका विभिन्न स्थानमा रहेका दैलेखी बस्तीमा समाजको सदस्यता विस्तार गर्ने योजना पनि अघि सारेका छन् । उनले आजीवन सदस्यता बढाउने र वडा तहसम्म समाजको संगठन विस्तार गर्ने घोषणा गरे । समाजलाई थप व्यवस्थित र बलियो बनाउने उद्देश्यले सदस्यता तथा संगठन विस्तारलाई प्राथमिकतामा राखिने उनको भनाइ छ ।
अध्यक्ष गिरीले सहयोग घोषणा गरेलगत्तै कोहलपुर निवासी समाजसेवी कमला मल्लले पनि भवन निर्माणका लागि ५० हजार रुपैयाँ सहयोग गर्ने घोषणा गरिन् । भवन निर्माण अभियानमा थप सहयोग जुटाउने उद्देश्यले दैलेखी समाजसँग आबद्ध सबै दाता, शुभेच्छुक तथा समाजसेवीलाई गिरीले सहयोगका लागि आह्वान गरे ।
यसैबीच, दैलेखी समाज बाँकेको नवनिर्वाचित कार्यसमितिले शनिबार पद तथा गोपनीयताको शपथ लिएर पदभार ग्रहण गरेको छ । समाजको १७ साउनमा सम्पन्न आठौँ अधिवेशनबाट पूर्णदेव गिरीको नेतृत्वमा १६ सदस्यीय कार्यसमिति सर्वसम्मत निर्वाचित भएको थियो । नेपालगन्जमा शनिबार आयोजित कार्यक्रममा निर्वाचन समितिका संयोजक तथा अधिवक्ता श्याम गौतमले नवनिर्वाचित पदाधिकारी तथा सदस्यलाई पद तथा गोपनीयताको शपथ गराए ।
दोस्रो कार्यकालका लागि अध्यक्षमा निर्वाचित गिरीसँगै वरिष्ठ उपाध्यक्षमा सुरेश थापा, उपाध्यक्षमा पूर्णकुमारी थापा, सचिवमा गणेशबहादुर खड्का, सहसचिवमा हिरामणि दाहाल र कोषाध्यक्षमा शिवप्रसाद पाण्डेय चयन भएका छन् ।
कार्यसमिति सदस्यमा धर्मराज सुनार, इन्द्रबहादुर कार्की, विना थापा मगर, दीपक थापा, शंकरप्रसाद खनाल, विष्णुप्रसाद उपाध्याय, आशा लम्साल, देवबहादुर खड्का, पुष्कर सिजापती र प्रेमप्रकाश बीसी निर्वाचित भएका छन् ।
पदभार ग्रहण गरेपछि बसेको नवनिर्वाचित कार्यसमितिको पहिलो बैठकले समाजको आगामी कार्यदिशाबारे निर्णयसमेत गरेको छ । बैठकले संस्थागत विकास, सदस्यता विस्तार र संगठन सुदृढीकरणलाई प्राथमिकताका साथ अघि बढाउने प्रतिबद्धता जनाएको छ ।
बैठकले समाजको आठौँ अधिवेशन सफल बनाउन सहयोग गर्ने अतिथि, निर्वाचन समिति तथा प्रतिनिधिहरूप्रति धन्यवाद ज्ञापन गरेको छ । अधिवेशनबाट नयाँ कार्यसमिति चयन भएसँगै समाजको संस्थागत गतिविधिलाई थप व्यवस्थित बनाउने र बाँकेमा रहेका दैलेखी समुदायलाई समाजसँग जोड्ने अभियानलाई प्रभावकारी रूपमा अघि बढाउने निर्णयसमेत गरिएको छ ।
