राष्ट्रिय निजी तथा आवासीय विद्यालय एसोसिएसन नेपाल (नेशनल प्याव्सन) बाँकेको अध्यक्षमा चिरञ्जीवी चन्द निर्विरोध निर्वाचित भएका छन् । नेपालगन्जमा आइतवार भएको संघको १० औं जिल्ला अधिवेशनले चन्दको अध्यक्षतामा १५ सदस्यीय जिल्ला कार्यसमिति चयन गरेको हो ।
नवनिर्वाचित अध्यक्ष चन्दले शिक्षा ऐनसँगै शिक्षा क्षेत्रमा देखिएका विकृति र समस्यालाई प्राथमिकतामा राखेर काम गर्ने बताएका छन् । उनले आफ्नो नेतृत्वमा रहेको नयाँ कार्यसमितिले तत्कालै बाढीपीडितका लागि राहत तथा सहयोगको काम अघि बढाउने जानकारी दिए ।
‘शिक्षा ऐनका विषयमा आवश्यक पहल गर्नुपर्नेछ । शिक्षा क्षेत्रमा देखिएका विकृति हटाउन पनि काम गर्नुपर्छ,’ चन्दले निर्वाचित भएलगत्तै दैनिक नेपालगन्जसँग भने, ‘अहिले बाढीबाट प्रभावित नागरिकलाई सहयोग गर्नु पनि हाम्रो दायित्व हो । त्यसका लागि कार्यसमितिले तत्कालै काम अघि बढाउँछ ।’
नेशनल प्याव्सन बाँकेमा जिल्लाभरका ७२ वटा निजी तथा संस्थागत विद्यालय आबद्ध रहेका छन् । विद्यालयहरुको संख्या ठूलो रहेकाले संगठनलाई थप व्यवस्थित बनाउँदै सदस्य विद्यालयका साझा समस्या समाधानमा पहल गर्ने चुनौती नयाँ कार्यसमितिसामु रहेको छ ।
अधिवेशनबाट वरिष्ठ उपाध्यक्षमा गोविन्द बहादुर रावत, उपाध्यक्षमा धन बहादुर वली, सचिवमा धन बहादुर शाही, सहसचिवमा रमेश यादव, कोषाध्यक्षमा लोकराज डाँगी र सहकोषाध्यक्षमा प्रशान्त रिजाल निर्विरोध चयन भएका छन् ।
त्यस्तै वरिष्ठ सदस्यमा धन बहादुर खड्का चयन भएका छन् । सदस्यहरुमा रोशन बस्नेत, विजया चौधरी, निशा शर्मा, महेन्द्र कार्की, मनोज वर्मा, राम कुमारी चौधरी र डम्बर खत्री निर्वाचित भएका छन् ।
नवनिर्वाचित कार्यसमितिलाई सफल कार्यकालको शुभकामना दिँदै अधिवेशनले निजी तथा संस्थागत विद्यालयका समस्या, शैक्षिक क्षेत्रमा देखिएका विकृति र विद्यालय शिक्षासँग सम्बन्धित नीतिगत विषयमा प्रभावकारी भूमिका निर्वाह गर्नुपर्नेमा जोड दिएको थियो ।
अधिवेशनको उद्घाटन नेशनल प्याव्सनका केन्द्रीय वरिष्ठ उपाध्यक्ष सुवोध कुमार डाँगीले गरेका थिए । अधिवेशनबाट नयाँ नेतृत्व चयन भएपछि बाँकेमा नेशनल प्याव्सनको आगामी कार्यदिशा तय गर्ने जिम्मेवारी चन्द नेतृत्वको समितिमा आएको छ ।
नयाँ कार्यसमितिले तत्कालका लागि बाढीपीडितलाई राहत सहयोग गर्ने विषयलाई प्राथमिकतामा राखेको अध्यक्ष चन्दले बताए । त्यसपछि शिक्षा ऐन र शिक्षा क्षेत्रमा देखिएका विकृति तथा समस्याका विषयमा आवश्यक पहल र छलफल अघि बढाउने उनले बताए ।
अध्यक्ष चन्दले निजी तथा संस्थागत विद्यालयसँग सम्बन्धित विषयलाई संस्थागत रुपमा उठाउने र जिल्लामा आबद्ध ७२ विद्यालयबीच समन्वय बढाउने विश्वास दिलाएका छन् ।
