रसुवामा भएको विपत्तिमा परेका तथा बेपत्ता भएकाको खोजी र उद्धारका लागि मदन बाबा भक्ति केन्द्रले ३ लाख ४० हजार रुपैयाँ सहयोग गरेको जनाएको छ । केन्द्रले दिएको जानकारी अनुसार, प्रधानमन्त्री दैवीप्रकोप उद्धार कोषमा ३ लाख रुपैयाँ जम्मा गरिएको हो ।
केन्द्रकी गंगा न्यौपानेले दिएको जानकारी अनुसार, रसुवामा कार्यरत रहेर बेपत्ता भएका आशिष कुमार थारुको खोजीका लागि थप ४० हजार रुपैयाँ सहयोग गरिएको बताइन् ।
केन्द्रका अनुसार बारबर्दिया–१, जमुनिया, बर्दियाका मानबहादुर थारुका छोरा आशिष कुमार थारु पावर चाइना सिनो हाइड्रो ड्याम साइट, रसुवामा कार्यरत थिए । उनी हालसम्म बेपत्ता छन् ।
‘मानबहादुर थारु मदन बाबा भक्ति केन्द्रको अभियानमा निरन्तर आबद्ध भएर काम गर्दै आएका छन्,’ न्यौपानेले दैनिक नेपालगन्जसँग भनिन्, ‘उनको आर्थिक अवस्था विपन्न रहेको र छोरा आशिष बेपत्ता भएपछि परिवार थप समस्यामा परेको केन्द्रले जनाएको छ ।’ सोही अवस्थालाई ध्यानमा राखेर संस्थागत निर्णयबाट खोजी कार्यका लागि रकम उपलब्ध गराइएको केन्द्रका केन्द्रीय अध्यक्ष शारदा तिवारीले बताइन् ।
यसैबीच, कैलाली घर भएका सुवास रावल पनि रसुवाबाट बेपत्ता भएको केन्द्रले जनाएको छ । उनी हाल एनएमबि बैंक, रसुवामा कार्यरत थिए । केन्द्रले रावलसहित विपत्तिका क्रममा सम्पर्कविहीन तथा बेपत्ता भएका सबैको तत्काल खोजी गर्न सम्बन्धित निकायसँग अपिल गरेको छ ।
केन्द्रका अध्यक्ष तिवारीका अनुसार, सद्गुरुदेव मदन बाबाको सदिच्छाअनुसार विपत्तिमा परेका नागरिकलाई सहयोग गर्ने अभियानअन्तर्गत प्रधानमन्त्री दैवीप्रकोप उद्धार कोषमा ३ लाख रुपैयाँ जम्मा गरिएको हो । ‘विपदमा परेका सदस्य तथा परिवारलाई आवश्यक सहयोग पुर्याउने उद्देश्यले संस्थाले सहयोगलाई निरन्तरता दिएको हो’, उनले बताइन् ।
प्रधानमन्त्री दैवीप्रकोप उद्धार कोषमा जम्मा गरिएको रकम सद्गुरुदेव मदन बाबा र मदन बाबा भक्ति केन्द्रसँग आबद्ध सदस्यहरुले जुटाएका हुन् । केन्द्रले विपत्तिको समयमा प्रभावित परिवारको साथमा रहनु आफ्नो सामाजिक दायित्व भएको जनाएको छ ।
