नेपाल–भारत आवागमनमा नयाँ ढोका
भारतको बहराइचदेखि नानपारा हुँदै नेपालगन्ज रोडसम्मको नवनिर्मित तथा विद्युतीकृत ब्रोडगेज रेलमार्ग सोमवारदेखि औपचारिक रूपमा सञ्चालनमा आएको छ ।
७ सय ३० करोड भारतीय रुपैयाँ लागतमा निर्माण भएको ५६ किलोमिटर रेलमार्गसँगै वाराणसी र गोरखपुरबाट नेपालगन्ज रोडसम्मको रेल सेवा विस्तार गरिएको हो ।
रेलमार्गको लोकार्पणसँगै वाराणसी–बहराइच एक्सप्रेस, वाराणसी सिटी–गोरखपुर एक्सप्रेस तथा गोन्डा–बहराइचबीच सञ्चालन हुँदै आएका दुई डेमू रेललाई नेपालगन्ज रोडसम्म विस्तार गरिएको हो । ‘यसबाट नेपाल–भारतबीचको आवागमन थप सहज हुने अपेक्षा गरिएको छ,’ भारतीय पत्रकार सन्तोष शुक्लले भने ।
नेपालगन्ज रोड रेलवे स्टेसनमा आयोजित कार्यक्रममा रेल सेवा शुभारम्भ गर्नुअघि नेपालमा आएको बाढीबाट मृत्यु भएकाप्रति दुई मिनेट मौनधारण गरिएको थियो । भारत उत्तरप्रदेशका मुख्यमन्त्री योगी आदित्यनाथले विपत्तिमा ज्यान गुमाएका नेपालीसहित भारत र अन्य देशका नागरिकप्रति श्रद्धाञ्जली व्यक्त गरे ।
उनले भने, ‘दुःखको यस घडीमा हामी नेपालसँगै छौं,’ भोटेकोशी नदीमा आएको आकस्मिक बाढीबाट नेपालसहित भारत र विभिन्न देशका नागरिक प्रभावित भएको उल्लेख गर्दै उनले पीडित परिवारप्रति गहिरो समवेदना व्यक्त गरे ।
मुख्यमन्त्रीले भारत सरकारको सहयोगलाई पनि उल्लेख गरे । ‘प्रधानमन्त्री नरेन्द्र मोदीको मार्गदर्शन र नेतृत्वमा भारत सरकारले मित्र राष्ट्र नेपालको सहयोगका लागि तत्काल कदम चालेको छ’, मुख्यमन्त्री योगीले भने ।
उनका अनुसार, नेपाल भारतका लागि केवल राजनीतिक मित्र राष्ट्र नभई साझा सांस्कृतिक विरासत बोकेको मुलुक हो । पशुपतिनाथदेखि काशी विश्वनाथ, गोरखादेखि गोरखपुर तथा जनकपुरदेखि अयोध्यासम्मको सम्बन्धले दुई देशको सांस्कृतिक निकटता झल्काउने उनले बताए ।
रेल सेवा विस्तारलाई उनले दशकौं पुरानो सपना पूरा भएको रूपमा व्याख्या गरे । उनका अनुसार, यसअघि क्षेत्रको रेल सेवा सीमित थियो र मीटरगेजमा निर्भर थियो । भारतीय पत्रकार सुरेन्द्र मधेसियाका अनुसार, ब्रोडगेज र विद्युतीकरणपछि नेपालगन्जसँग सीधा रेल सम्पर्क स्थापित भएको छ ।
‘कनेक्टिभिटी भएपछि गति आउँछ । गति सकारात्मक दिशामा बढेपछि त्यसले प्रगतिको आधार तयार गर्छ’, रेलवे उद्घाटनमा बोल्दै मुख्यमन्त्री योगीले भने । नयाँ रेल सम्पर्कले उद्योग, व्यापार, कृषि र पर्यटनमा समेत सकारात्मक प्रभाव पार्ने उनको भनाइ थियो ।
मुख्यमन्त्री योगीले नयाँ रेल सम्पर्कले सुरक्षा र सुविधा मात्रै नभई क्षेत्रीय समृद्धिको आधारसमेत तयार गर्ने बताए । ‘पटरी ठूलो भएपछि बाटो ठूलो हुन्छ, बाटो ठूलो भएपछि बजार ठूलो हुन्छ र बजार ठूलो भएपछि अवसर पनि ठूलो हुन्छ’, उनले भने ।
रेलमार्गले नेपालगन्जलाई वाराणसी, अयोध्या र गोरखपुरजस्ता धार्मिक तथा महत्वपूर्ण सहरसँग जोड्नेछ । कतर्नियाघाटका कारण बहराइचमा पर्यटनको ठूलो सम्भावना रहेको भन्दै उनले नयाँ रेल सेवाले त्यसलाई थप गति दिने बताए ।
मुख्यमन्त्रीले बहराइच–खलीलाबाद नयाँ रेलमार्गको काम पनि अघि बढिरहेको जानकारी दिए । गोरखपुरबाट बलरामपुर हुँदै बहराइच र नेपालगन्जसम्म नयाँ रेल सेवा विस्तार गर्ने योजना रहेको उनले बताए ।
कार्यक्रममा रेलमन्त्री अश्विनी वैष्णवले भर्चुअल सम्बोधन गर्दै मुख्यमन्त्रीसँगै रिमोटमार्फत रेलमार्गको लोकार्पण गरे र रेललाई रवाना गरेका थिए ।
