अत्यधिक गर्मीबाट हुने स्वास्थ्य तथा अन्य जोखिम न्यूनीकरणका लागि बाँकेमा सरोकारवालाले कार्ययोजना तयार गरेका छन् । नेपाल रेडक्रस सोसाइटी बाँके जिल्ला शाखाको आयोजनामा भएको तीनदिने कार्यशालामा अत्यधिक गर्मीको प्रभाव, त्यसबाट जोगिने उपाय र पूर्वानुमानमा आधारित पूर्वकार्यबारे छलफल गर्दै कार्ययोजना बनाइएको हो ।
सोमबारदेखि बुधबारसम्म नेपालगन्जमा सञ्चालन भएको कार्यशालामा अत्यधिक गर्मीका प्रमुख कारण, यसको न्यूनीकरणका उपाय, सामुदायिक सचेतना, मानव जीवनमा पर्ने असर तथा हिटस्ट्रोकलगायत विषयमा छलफल भएको थियो । छलफलका आधारमा अत्यधिक गर्मीको जोखिम कम गर्न आवश्यक पूर्वकार्यलाई समेटेर कार्ययोजना निर्माण गरिएको हो ।
नेपाल रेडक्रस सोसाइटी र अमेरिकन रेडक्रसको साझेदारीमा सञ्चालित कार्यशालामा नेपालगन्ज उपमहानगरपालिका, वडा कार्यालय, रेडक्रस पालिका शाखा, रेडक्रस उपशाखा, जिल्ला प्रशासन कार्यालय, विद्युत प्राधिकरणलगायतका निकायका प्रतिनिधि सहभागी थिए । शिक्षक तथा रेडक्रसकर्मीलगायतको पनि कार्यक्रममा सहभागिता रहेको थियो ।
अत्यधिक गर्मी मानव स्वास्थ्यसँगै पूर्वाधार र आर्थिक गतिविधिका लागि बढ्दो चुनौतीका रुपमा देखिन थालेको कार्यशालामा सहभागीले बताएका थिए । गर्मीका कारण मृत्युको जोखिम बढ्नुका साथै निद्रामा कमी, मानसिक तनाव तथा अन्य गम्भीर शारीरिक र मानसिक स्वास्थ्य समस्या निम्तिन सक्ने विषयमा छलफल भएको थियो ।
अत्यधिक गर्मीको असरबाट न्यून आय भएका समुदाय बढी प्रभावित हुने जनाइएको छ । बालबालिका, ज्येष्ठ नागरिक, अपांगता भएका व्यक्ति, गम्भीर प्रकृतिका बिरामी तथा सीमान्तकृत समुदाय पनि जोखिममा पर्ने समूहमा रहेको कार्यशालामा जानकारी गराइएको थियो ।
कार्यशालाको पहिलो चरण नेपाल रेडक्रस सोसाइटी बाँकेका सभापति गोवर्धन सिंह सम्झनाको अध्यक्षतामा सम्पन्न भएको थियो । दोस्रो चरणको कार्यक्रम विपद् व्यवस्थापन समितिका उपसंयोजक मीनबहादुर मल्लको अध्यक्षतामा भएको थियो ।
कार्यक्रममा नेपाल रेडक्रस सोसाइटी बाँके शाखाका मन्त्री अजीज अहमद सिद्धिकी, कोषाध्यक्ष राकेशबहादुर श्रीवास्तवलगायत सरकारी तथा गैरसरकारी निकायका प्रतिनिधि र शिक्षकको सहभागिता रहेको थियो ।
कार्यशालाका सहजकर्तामा अमेरिकन रेडक्रसकी कार्यक्रम संयोजक उपमा ओझा, क्ष्ँच्ऋ समृद्धि श्रेष्ठ र नेपाल रेडक्रस सोसाइटी केन्द्रीय कार्यालयका कार्यक्रम संयोजक वीरेन्द्र शाही रहेका थिए । कार्यक्रमको सञ्चालन फोकल पर्सन झवीलाल शर्माले गरेका थिए ।
