भारतको रूपईडीहा डिपोका कर्मचारी निजी सवारीसाधनको अवैध सञ्चालनविरुद्ध सडकमा उत्रिएका छन्। रूपईडीहा–नानपारा–बहराइच सडक खण्डमा भइरहेको डग्गेमारीले सरकारी राजस्वमा क्षति पुर्याउनुका साथै रोडवेजका कर्मचारीको रोजीरोटीसमेत संकटमा पारेको भन्दै उनीहरूले बिहीबार प्रदर्शन गरेका हुन्।
रूपईडीहा डिपोका सम्पूर्ण कर्मचारी सहभागी प्रदर्शनमा उनीहरूले हातमा रातो ब्यानर बोकेर नाराबाजी गरेका थिए। ब्यानरमा ‘कर्मचारी एकता जिन्दावाद, डग्गेमारी बन्द करो’ लेखिएको थियो। कर्मचारीहरूले अवैध रूपमा यात्रु ओसारपसार गर्ने निजी सवारीसाधनमाथि नियन्त्रण गर्न माग गरेका छन्।
संविदा कर्मचारी एकता संघका अध्यक्ष आफताब अहमद कुरैशीले संकटका बेला रोडवेजका कर्मचारीले जोखिम मोलेर पनि आफ्नो जिम्मेवारी पूरा गर्दै आएको बताए। तर, डग्गेमारीका कारण कर्मचारीको परिवारको जीविकोपार्जनमै समस्या उत्पन्न भएको उनको भनाइ छ।
‘जब–जब संकट आउँछ, तब–तब रोडवेजका कर्मचारी आफ्नो ज्यान जोखिममा राखेर अगाडि आउँछन्। तर, डग्गेमारीका कारण उनीहरूका परिवारको रोजीरोटीमा संकट आएको छ,’ कुरैशीले भने।
‘समस्त कर्मचारी गण’को ब्यानरमा आयोजित आन्दोलनमा विभिन्न कर्मचारी संगठनले सामूहिक रूपमा सहभागिता जनाएका थिए। प्रदर्शनमा ठूलो संख्यामा रोडवेज कर्मचारी उपस्थित थिए।
प्रदर्शनकारीले निजी डग्गेमार सवारीसाधनको अवैध सञ्चालन रोक्न र नियमविपरीत यात्रु ओसारपसार गर्ने सवारीसाधनमाथि कडा कारबाही गर्न परिवहन विभागसँग माग गरेका छन्। उनीहरूका अनुसार यस्तो गतिविधिले सरकारी यातायात सेवाको आम्दानीमा असर पारिरहेको छ। त्यसको प्रत्यक्ष प्रभाव रोडवेजमा कार्यरत कर्मचारीको रोजगारी र जीविकोपार्जनमा परेको छ।
रूपईडीहा नेपाल–भारत सीमावर्ती बजार भएकाले त्यहाँको यातायात गतिविधिले नेपालगन्जसँगको आवागमनमा समेत चासो राख्ने गर्छ। डग्गेमारी नियन्त्रणको माग गर्दै भएको कर्मचारी आन्दोलनले सीमावर्ती क्षेत्रमा सार्वजनिक यातायात सञ्चालन, नियमको पालना र सरकारी यातायात सेवाको संरक्षणसम्बन्धी विषयलाई पुनः चर्चामा ल्याएको छ।
