नेपाली कांग्रेसको १५औँ महाधिवेशनअन्तर्गत भएको मतदानको मतगणना आइतवार पनि जारी छ ।
यो समाचार तयार गरिरहँदा सभापति चयनपछि पार्टीका अन्य पदाधिकारी र केन्द्रीय सदस्यको मतगणना जारी छ । ५ हजार ५०० मत गणना हुँदा खुला उपसभापतितर्फ डा. चन्द्रकान्त भण्डारी र खुला महामन्त्रीतर्फ प्रदीप पौडेलले अग्रता लिएका छन् । उपसभापतिमा भण्डारीले २ हजार ८३४ मत पाउँदा उनका निकटतम प्रतिस्पर्धी इन्जिनियर मधु आचार्यले १ हजार ७३२ मत प्राप्त गरेका छन् । त्यस्तै, महामन्त्रीमा पौडेलले ३ हजार १७७ मतसहित अग्रता बनाएका छन् । उदयशमशेर राणाले १ हजार ७९४ र डा. सुनिलकुमार शर्माले १ हजार ७१५ मत पाएका छन् ।
खुला उपसभापतिका अन्य उम्मेदवारमध्ये गोविन्द भट्टराईले १ हजार ४३५, सुरेन्द्रराज पाण्डेले १ हजार ३५० मत प्राप्त गरेका छन् ।
समावेशी उपसभापतितर्फ विनोदकुमार चौधरीले १ हजार ३६९ मत पाएका छन् । जीवन परियारले १ हजार २९९ मत प्राप्त गरेका छन् ।
महिला महामन्त्रीतर्फ डा. डिला संग्रौला पन्तले २ हजार ४१८ मतसहित अग्रता लिएकी छन् । महालक्ष्मी उपाध्याय डिनाले २ हजार २२२ र रीता खनालले ५६० मत प्राप्त गरेकी छन् ।
यसअघिनै नेपाली कांग्रेसको सभापतिमा गगनकुमार थापा निर्वाचित भइसकेका छन् । थापाले ६ हजार ५८४ मत प्राप्त गर्दै सभापति पदमा जित हासिल गरेका हुन् ।
यसैबीच, आइतवार साँझदेखि सहमहामन्त्रीका विभिन्न समूह र महिला केन्द्रीय सदस्य खुलातर्फको मतगणना पनि सुरु भएको निर्वाचन समितिले जनाएको छ । पार्टी केन्द्रीय कार्यालय सानेपामा भइरहेको मतगणना विभिन्न ६ स्थानमा सञ्चालन गरिएको छ ।
सहमहामन्त्री खुलातर्फ नौ जना उम्मेदवार चुनावी प्रतिस्पर्धामा छन् । यस समूहबाट दुई जना निर्वाचित हुनेछन् । सहमहामन्त्री महिला र महिला केन्द्रीय सदस्य खुलातर्फको मतगणना पनि सँगसँगै अघि बढाइएको छ ।
कांग्रेसको १५औँ महाधिवेशनअन्तर्गत असोज २३ गते मतदान भएको थियो । कुल ७ हजार ३१७ महाधिवेशन प्रतिनिधि रहेकामा ७ हजार ३९ जनाले मतदान गरेको निर्वाचन समितिले जनाएको छ । सभापति पदको मतगणना शनिबार बिहान सकिएको थियो ।
यसअघि कांग्रेसको वरिष्ठ उपसभापतिमा विश्वप्रकाश शर्मा र महिला उपसभापतिमा पुष्पा भुसाल निर्विरोध निर्वाचित भइसकेका छन् ।
