सजल गैरे
बाँकेको राप्तीसोनारीमा पहिलो पटक लुम्बिनी प्रदेशस्तरीय तेक्वान्दो प्रतियोगिता आयोजना हुने भएको छ । प्रतियोगितामा प्रदेशका १२ वटै जिल्लाबाट १४४ जना खेलाडी सहभागी हुनेछन् । राप्तीसोनारी गाउँपालिका–५ स्थित राप्तीसोनारी रंगशालामा आगामी मंसिर ४ देखि ६ गतेसम्म तीन दिन प्रतियोगिता सञ्चालन हुनेछ ।
आदर्श तेक्वान्दो डोजाङ नेपालगन्ज र भृकुटी तेक्वान्दो डोजाङ नेपालगन्जले संयुक्त रुपमा राप्तीसोनारीको आर्थिक सहयोगमा प्रतियोगिता आयोजना गर्न लागेका हुन् । प्रतियोगिताबारे आयोजकले शुक्रबार नेपालगन्जमा पत्रकार सम्मेलन गरी जानकारी दिएको हो ।
प्रतियोगितामा प्रत्येक जिल्लाबाट १२ जनाका दरले खेलाडी सहभागी हुने तेक्वान्दो प्रशिक्षक चन्द्रप्रकाश श्रेष्ठले बताए । खेलाडीसँगै प्रत्येक जिल्लाबाट एक जना प्रशिक्षक पनि सहभागी हुनेछन् । यसअनुसार प्रतियोगितामा १२ जना प्रशिक्षकको सहभागिता रहनेछ ।
प्रतियोगिता पुम्से र क्युरुगी गरी दुई विधामा सञ्चालन गरिनेछ । खेललाई व्यवस्थित रुपमा सम्पन्न गर्न २१ जना रेफ्री, चार जना ज्यूरी र १० जना प्राविधिक परिचालन गरिने आयोजकले जनाएको छ ।
तेक्वान्दो खेलको विकास र विस्तारसँगै नयाँ खेलाडी उत्पादन गर्ने उद्देश्यले प्रतियोगिता आयोजना गर्न लागिएको बाँके जिल्ला तेक्वान्दो संघका अध्यक्ष प्रकाश लामिछानेले बताए । उनका अनुसार, प्रदेशस्तरमा पहिलो पटक हुन लागेको प्रतियोगिताले खेलाडीको प्रतिभा पहिचान गर्न र क्षमता अभिवृद्धि गर्न सहयोग पु¥याउने अपेक्षा गरिएको छ ।
’लुम्बिनी प्रदेशमा तेक्वान्दो खेलको विकासका लागि प्रतियोगिता महत्वपूर्ण अवसर बन्नेछ । यसले युवामा तेक्वान्दोप्रतिको आकर्षण बढाउनुका साथै नयाँ प्रतिभालाई अगाडि ल्याउन सहयोग गर्नेछ,’ लामिछानेले भने ।
प्रतियोगिता सम्पन्न गर्न करिब १५ लाख रुपैयाँ खर्च हुने अनुमान गरिएको छ। प्रतियोगितालाई सफल बनाउन राप्तीसोनारी गाउँपालिकासहित बाँकेका आठवटै स्थानीय तह, विभिन्न वडा र संघसंस्थाले आर्थिक सहयोग गर्ने प्रतिबद्धता जनाएको लामिछानेले जानकारी दिए ।
’प्रतियोगिता सफल बनाउन स्थानीय तह, वडा र विभिन्न संघसंस्थाबाट सहयोगको प्रतिबद्धता आएको छ,’ उनले भने । प्रतियोगिताको तयारी र व्यवस्थापनका लागि आयोजकले आवश्यक समन्वय गरिरहेको जनाएको छ ।
’स्वास्थ्यका लागि खेलकुद, अनुशासनका लागि तेक्वान्दो’ भन्ने नारासहित आयोजना हुन लागेको प्रतियोगिताले प्रदेशमा तेक्वान्दो खेलको प्रवद्र्धन गर्न सहयोग पुग्ने आयोजकको विश्वास छ । प्रतियोगिताले खेलाडीको क्षमता विकास र खेलकुद गतिविधिको विस्तारमा समेत योगदान पु¥याउने अपेक्षा गरिएको छ ।
पत्रकार सम्मेलनमा तेक्वान्दो संघका केन्द्रीय सदस्य श्रीमान थापा मगर, जिल्ला सदस्य उमादेवी थापा, चन्द्रबहादुर श्रेष्ठ र खगेन्द्र श्रीष मगरलगायतको उपस्थिति थियो ।
