सिटी बचत तथा ऋण सहकारी संस्था लिमिटेड नेपालगन्जका पीडित निक्षेपकर्तालाई जाहेरी दरखास्त दिन जिल्ला प्रहरी कार्यालय बाँकेले आग्रह गरेको छ ।
सहकारीका सञ्चालक तथा कर्मचारीले निक्षेपकर्ताको रकम अपचलन तथा ठगी गरेको आरोपमा दर्ता भएको मुद्दाको अनुसन्धानका क्रममा प्रहरीले पीडितलाई जाहेरी दिन आग्रह गरेको हो ।
सहकारी दर्ता अधिकारीको कार्यालय दाङको पत्र जाहेरीका आधारमा नेपाल सरकार वादी र सुशिल कुमार नेपालीसमेत प्रतिवादी रहेको उक्त मुद्दा जिल्ला प्रहरी कार्यालय बाँकेमा दर्ता भई अनुसन्धान भइरहेको प्रहरीले जनाएको छ ।
जिल्ला प्रहरी कार्यालय बाँकेका सूचना अधिकारी प्रहरी नायब उपरीक्षक प्रतित सिंह राठौरका अनुसार उक्त सहकारीका सञ्चालक अध्यक्ष दण्डबहादुर चन्द र प्रबन्धक सुशिल कुमार नेपाली पक्राउ परिसकेका छन् । उनीहरूमाथि अनुसन्धान जारी रहेको प्रहरीले जनाएको छ ।
यसअघि जाहेरी दरखास्त दिन छुटेका सिटी बचत तथा ऋण सहकारी संस्थाका निक्षेपकर्तालाई आफ्नो बिगो रकम खुल्ने पासबुक तथा भौचरको प्रतिलिपिसहित जिल्ला प्रहरी कार्यालय बाँकेमा जाहेरी दरखास्त पेस गर्न आग्रह गरिएको छ ।
नेपालगन्जस्थित मुख्य कार्यालयसँगै सहकारीका कोहलपुर, राँझा र रिमझिम सेवाकेन्द्रका पीडित निक्षेपकर्ताले समेत आवश्यक कागजातसहित जाहेरी दिन सक्ने प्रहरीले जनाएको छ ।
