स्पाका गतिविधि नियमन गर्न पुसभित्रै कार्यविधि ल्याउँदै नेपालगन्ज उपमहानगर
दशै तिहार शुभकामना आदानप्रदानसँगै विहीवार आयोजना गरिएको एउटा अन्तरक्रियामा नेपालगन्जका तमाम बेथिति र व्यापारिक क्षेत्रले भोगेका समस्याबारे चर्चा गरिएको छ ।
नेपालगन्ज उद्योग वाणिज्य संघले आयोजना गरेको कार्यक्रममा कार्यक्रममा सहभागी व्यवसायीले नेपालगन्जको बजारमा देखिएका विभिन्न बेथिति र व्यवस्थापकीय कमजोरीबारे प्रशासन तथा स्थानीय सरकारको ध्यानाकर्षण गराएका थिए । उनीहरूले बजार अनुगमनको प्रभावकारितामाथि प्रश्न उठाए । ट्राफिक व्यवस्थापन अस्तव्यस्त रहेको भन्दै त्यसलाई सुधार गर्न पनि माग गरे ।
नगर प्रमुख, प्रमुख जिल्ला अधिकारी, कर प्रशासक, भन्सार प्रमुख, वाणिज्य कार्यालय, घरेलु उद्योग कार्यालय प्रमुख, वडा प्रहरी प्रमुख लगायतका जिम्मेवार अधिकारीलाई सम्बोधन गर्दै व्यवसायीले बेथिति र आफुले भोगेका समस्यामा चर्चा गरेका हुन् । समाधानको अपेक्षासहित उनीहरुले नेपालगन्जको ट्राफिक अस्तव्यस्तताबारे प्रशासनले के गरिरहेको छ भन्ने प्रश्न उठाएका थिए । बजार अनुगमन प्रभावकारी हुन नसकेको गुनासो पनि उनीहरूले गरे । अटोको अराजक गतिविधि र झोले व्यापारीका कारण व्यवसायीले भोग्नुपरेका समस्याबारे समेत उनीहरूले प्रशासन र स्थानीय सरकारको ध्यानाकर्षण गराए ।
त्यसक्रममा नेपालगन्जमा स्पाको संख्या बढेसँगै अमर्यादित गतिविधि भइरहेको गुनासो आएपछि नेपालगन्ज उपमहानगरपालिकाले कार्यविधि बनाएर नियमन गर्ने भएको जानकारी दिइएको छ । उपमहानगरपालिकाका नगर प्रमुख प्रशान्त विष्टले आगामी पुसभित्र नगरसभाबाट स्पा सञ्चालनसम्बन्धी कार्यविधि ऐन ल्याउने बताए ।
विष्टका अनुसार सुरुमा २–४ वटा स्पाले अनुमति लिएर सेवा सञ्चालन गरेका थिए । पछिल्लो समय यस्ता व्यवसायको संख्या बढेको छ । स्पाका नाममा अमर्यादित तथा असामाजिक गतिविधि भइरहेको गुनासो पनि आउन थालेको छ । त्यसैले व्यवस्थित सञ्चालन र निगरानीका लागि कार्यविधि बनाएर अघि बढ्न लागिएको उनले बताए ।
छलफलमा व्यापारीले घरबहाल कर घरधनीले नै तिर्नुपर्ने व्यवस्था कार्यान्वयनमा जोड दिएका थिए । त्यसमा नगर प्रमुख विष्टले सकारात्मक जवाफ दिए । घर बनाएपछि मात्र नक्सा पास गर्ने प्रवृत्तिलाई पनि निरुत्साहित गर्न उपमहानगरपालिका लागिपरेको पनि उनको भनाइ थियो ।
कार्यक्रममा लुम्बिनी प्रदेशका आन्तरिक मामिला, कानुन, उद्योग तथा यातायातमन्त्री भण्डारीलाल अहिरले प्राकृतिक स्रोतको दोहन रोक्नुपर्नेमा जोड दिए । भ्रष्टाचार गर्नेहरूको सम्पत्ति कानुन बनाएर जफत गर्नुपर्ने धारणा पनि उनले राखे ।
नेपालगन्ज उद्योग वाणिज्य संघका अध्यक्ष चिरन्जीवी वलीले गैरकानुनी गतिविधि गर्ने व्यवसायीलाई कुनै पनि हालतमा उन्मुक्ति दिन नहुने बताए । व्यवसायीले पनि आफ्नो जिम्मेवारी पूरा गर्नुपर्ने उनको भनाइ थियो । ‘हामी व्यवसायीहरूले पनि गलत काम गर्नु हुँदैन, गलत काम भइरहेको छ भने त्यसलाई निरुत्साहित गर्नुपर्छ,’ वलीले भने ।
उनले नेपालगन्जका उद्योगी तथा व्यवसायीको हकहित संरक्षण र व्यवसाय प्रवद्र्धनमा संघको वर्तमान नेतृत्व सधैँ प्रतिबद्ध रहेको बताए । बजारलाई व्यवस्थित बनाउने काम सरकार वा प्रशासनको मात्र नभई व्यवसायीको पनि साझा दायित्व भएको उनले उल्लेख गरे ।
अध्यक्ष वलीले बजारका समस्या समाधान गर्न प्रशासनिक निकाय र व्यवसायीबीच समन्वय, सहकार्य तथा आपसी समझदारी आवश्यक रहेको बताए। प्रचलित कानुनको पूर्ण पालना गर्ने र गराउने विषयमा सबै पक्ष जिम्मेवार हुनुपर्ने उनको भनाइ थियो । प्रशासनिक निकायले कानुन कार्यान्वयनमा प्रभावकारी भूमिका निर्वाह गर्नुपर्ने र व्यवसायीले पनि आफ्नो जिम्मेवारी इमानदारीपूर्वक पूरा गर्नुपर्ने उनले बताए ।
‘नेपालगन्जको बजारलाई व्यवस्थित, प्रतिस्पर्धी र आर्थिक रूपमा सबल बनाउन हामी सबैले आ–आफ्नो ठाउँबाट मेहनत गर्नुपर्छ,’ वलीले भने । बजारमा हुने गैरकानुनी गतिविधि नियन्त्रण गर्ने र कानुन कार्यान्वयन गराउने जिम्मेवारी सम्बन्धित प्रशासनिक निकायको भए पनि व्यवसायीले आफ्नो तर्फबाट बजार व्यवस्थापनमा सहयोग गर्नुपर्ने उनले बताए ।
पछिल्लो समय भन्सार प्रक्रियामा भएका सुधारले नेपाली व्यवसायीलाई केही हदसम्म राहत पुगेको संघले महसुस गरेको वलीले उल्लेख गरे । अब नेपालगन्जको बजारलाई चलायमान बनाउने, उपभोक्ताले उचित मूल्यमा गुणस्तरीय वस्तु तथा सेवा पाउने वातावरण बनाउने र स्थानीय उत्पादनको बिक्री प्रवद्र्धन गर्ने दिशामा काम गर्नुपर्ने उनले बताए ।
‘हामी व्यवसायीहरूको दायित्व भनेको उचित मूल्यमा सामान बिक्री गर्नु, उपभोक्ताको हितलाई ध्यान दिनु र नेपाली उपभोक्ताले स्वदेशमै सहज रूपमा आवश्यक वस्तु प्राप्त गर्न सक्ने वातावरण निर्माण गर्नु हो,’ वलीले भने । व्यवसायी र प्रशासनबीच प्रभावकारी सहकार्य हुन सके नेपालगन्जको व्यापारिक गतिविधिलाई थप व्यवस्थित र सुदृढ बनाउन सकिने उनको भनाइ थियो ।
कार्यक्रममा लुम्बिनी प्रदेशसभा सदस्य मिना श्रेष्ठ, प्रमुख जिल्ला अधिकारी दिलकुमार तामाङ, भन्सार प्रमुख जनार्दन पौडेल र आन्तरिक राजस्व कार्यालयका प्रमुख पूर्ण न्यौपानेलगायतले नेपालगन्जको बजारलाई व्यवस्थित बनाउन सबै पक्ष जिम्मेवार हुनुपर्ने बताए । सहरलाई व्यवस्थित र सुन्दर बनाउन प्रशासन, स्थानीय सरकार, जनप्रतिनिधि तथा व्यवसायीबीच सहकार्य आवश्यक रहेको उनीहरूको भनाइ थियो ।
नेपालगन्ज उद्योग वाणिज्य संघले आयोजना गरेको शुभकामना आदानप्रदान तथा अन्तरक्रियामा स्थानीय उद्योगी तथा व्यवसायीले बजार व्यवस्थापन, व्यापार सञ्चालन, कानुन कार्यान्वयन र उपभोक्ता हितसँग सम्बन्धित विभिन्न विषय उठाएका थिए ।संघका महासचिव विष्णु श्रेष्ठले सहजीकरण गरेको कार्यक्रममा बजारका समस्या पहिचान गरी समाधानका लागि सम्बन्धित निकायले प्रभावकारी भूमिका निर्वाह गर्नुपर्नेमा जोड दिइएको थियो ।
