पौडी खेल्ने क्रममा हुन सक्ने दुर्घटना न्यूनीकरण तथा आपत्कालीन अवस्थामा प्रभावकारी उद्धारका लागि पहिलो पटक नेपालगन्जमा लाइफगार्ड प्रशिक्षण सञ्चालन गरिएको छ ।
नेपालगन्ज स्वीमिङ क्लबले नेपाल पौडी संघको समन्वयमा व्यावसायिक पौडी पोखरीमा दक्ष जनशक्ति उत्पादन गर्ने उद्देश्यले पाँचदिने प्रशिक्षण सञ्चालन गरेको हो । पौडी पोखरीमा पौडी खेल्ने व्यक्तिको सुरक्षा सुनिश्चित गर्न, डुब्ने जोखिममा रहेका व्यक्तिको समयमै उद्धार गर्न र दुर्घटनापछिको प्राथमिक उपचार उपलब्ध गराउन लाइफगार्डको भूमिका महत्वपूर्ण हुने भएकाले प्रशिक्षण आयोजना गरिएको क्लबले जनाएको छ ।
क्लबका अध्यक्ष केशवराज न्यौपानेका अनुसार, प्रशिक्षणमा यस क्षेत्रका विभिन्न तारे होटलका पौडी प्रशिक्षक, खेलाडी, सुरक्षाकर्मी तथा विद्यालयका पौडी प्रशिक्षक गरी २१ जनाको सहभागिता छ । पाँच दिनसम्म सञ्चालन हुने प्रशिक्षणमा नेपाल पौडी संघका पाँच जना वरिष्ठ प्रशिक्षकले सहजीकरण गर्नेछन् ।
प्रशिक्षणमा सहभागीलाई पौडी पोखरीको सुरक्षा व्यवस्थापन, पानीमा डुबिरहेका व्यक्तिको उद्धार, आपत्कालीन अवस्थाको सामना तथा आवश्यक प्राथमिक उपचारसम्बन्धी सीप प्रदान गरिनेछ । यसले पौडी पोखरीमा हुने सम्भावित दुर्घटनाको जोखिम कम गर्नुका साथै दुर्घटना भइहालेमा तत्काल उद्धार र उपचारको व्यवस्था गर्न सहयोग पुग्ने अपेक्षा गरिएको छ ।
विशेषगरी होटल, विद्यालय तथा व्यावसायिक पौडी पोखरीमा लाइफगार्डको उपस्थितिले पौडी खेल्न आउने बालबालिका, किशोरकिशोरी तथा अन्य व्यक्तिको सुरक्षा सुनिश्चित गर्न मद्दत पुग्नेछ । ‘पौडी खेलको विस्तारसँगै सुरक्षा व्यवस्थालाई पनि प्राथमिकता दिनुपर्ने आवश्यकता बढ्दै गएकाले दक्ष लाइफगार्ड उत्पादनमा प्रशिक्षणले योगदान पु¥याउने विश्वास गरिएको छ,’ क्लब अध्यक्ष न्यौपानेले भने ।
अध्यक्ष न्यौपानेले प्रशिक्षणको अन्त्यमा सहभागीको सीप परीक्षण गरिने र सफल प्रशिक्षार्थीलाई लाइफगार्डको प्रमाणपत्र प्रदान गरिने जानकारी दिए । उनका अनुसार, यस क्षेत्रका पौडी पोखरीमा आवश्यक पर्ने दक्ष जनशक्तिको अभाव पूर्ति गर्न पनि तालिम उपयोगी हुनेछ ।
