नेपालगन्जको प्रसिद्ध शक्तिपीठ बागेश्वरी मन्दिरमा नेपाल तथा भारतका श्रद्धालुहरू आउने गर्दछन् । मन्दिर क्षेत्रमा रहेको जुंगे महादेव मन्दिरको मर्मत, सम्भार तथा जीर्णोदार कार्य ढिलाई हुदा दुई बर्षदेखि दर्शनार्थीले जुंगे महादेवको दर्शन गर्न पाएका छैनन् । साउन, तीज तथा फागुन महिनामा भगवान शिवको विशेष पुजाअर्चन हुने गर्दछ । सोही समयमा जुंगे महादेवको स्थपित मन्दिर तयार नहुँदा सामाजिक सञ्जालमा विभिन्न टिकाटिप्पणी हुँदै आएका छन् ।
बागेश्वरी जुंगे महादेव जाने पुल कमजोर भएको बर्षौपछि नेपालगन्ज उपमहानगरपालिकाले त्यसको जीर्णोदारका लागि बजेट विनियोजन गर्दै टेण्डर आव्हान गरेको थियो । ठेकेदार कम्पनीसँग पुलका लागि २०७९ चैत्र ९ गते सम्झौता हुँदा २०८० चैत्र १ गते निर्माण सक्ने भनिएको थियो । तर, २०८१ माघ ३० हुँदै २०८२ असार २२ सम्मका लागि निर्माण म्याद उपमहानगरपालिकाको कार्यपालिकाको बोर्ड बैठकले गरेको थियो ।
पुल निर्माणका क्रममा जुंगे महादेवको मूर्ति झिक्नुपर्ने भयो, बर्षौ पुरानो महादेवको मूर्ति झिक्ने क्रममा विभिन्न ठाउँमा खण्डित भयो । त्यसपछि बनाइएको नयाँ मूर्ति सामाजिक सञ्जालमा सार्वजनिक भएपछि विभिन्न टिका टिप्पणी भए । त्यसपछि बागेश्वरी मन्दिरमा अष्टधातुले बनेको जुंगे महादेवको मूर्ति राखिएको छ । महादेवको मूर्ति प्राण प्रतिष्ठासँगै दर्शनार्थी भक्तजनका लागि खुला गरिने भएको छ ।
बागेश्वरी मन्दिर गुठी व्यवस्थापन समितिका सचिव गोपाल प्रसाद अधिकारले १५ लाख लागतमा अष्टधातुको जुंगे महादेवको मूर्ति राखिएको जानकारी दिएका छन् । ‘साउन ५ गते सोमबार मूर्तिको प्राण प्रतिष्ठा गरी दर्शनार्थीका लागि खुला गरिनेछ’, उनले भने, ‘जुंगे महादेव स्थापित मन्दिरको पूर्वाधारहरू सबै साउन ५ अगावै सकिन्छ ।’
जुंगे महादेव मन्दिरका सन्दर्भमा नेपालगन्ज उपमहानगरपालिकाका प्रमुख प्रशान्त विष्ट सँग गरिएको संवाद
जुंगे महादेवको मन्दिर दर्शनका लागि कसरी खुला हुँदैछ ?
प्राविधिक कारणले गर्दा डेढ बर्षको ठेक्का ८/९ महिना ढिलो हुन गयो, तलाउमा काम गर्नुपर्ने, मूर्तिका विषयमा प्राविधिक रिपोर्ट र बागेश्वरी समितिको निर्णय गर्न अलि ढिलो गरेका कारण । अष्टधातुको मूर्ति निर्माण गर्नका लागि पनि समय लाग्यो । अब सम्पूर्ण काम चाहीँ सकिइसकेको अवस्था छ । साउन ५ गते सोमवार हामीले मूर्तिको प्राण प्रतिष्ठा गर्छौं । प्राण प्रतिष्ठापछि सम्पूर्ण भक्तजनले दर्शन गर्ने अवसर पाउनु हुनेछ ।
तीन÷तीन वटा मूर्ति चर्चामा आयो, खासमा कुरा के हो ?
यो खासै विषय होइन । धेरै बर्ष अगाडि वि.सं. २००७ सालमा बनेको यसको संरचना र मूर्तिसँगै रहेको इतिहासका कारण, हाराहारी ७५ बर्ष भैसकेपछि एउटा सिमेन्टको पनि आयु हुन्छ । सबै कुराको आयु हुन्छ । माया, भावना एउटा कुरा जोडिएको हुन्छ । तर, आयु त हुन्छ नि ! मूर्ति भनेको हाम्रो भावना सँग जोडिएको हुन्छ । सम्पूर्ण मन्दिर पुनःनिर्माण हुँदा मूर्ति मात्रै गरिएन भने २÷४ बर्षपछि गर्र्नै पर्ने हुन्छ ।
पुस्तांैसम्म रहोस् भनेर धातुको मूर्ति बनाइएको हो । यो नेपालगन्जको ऐतिहासिक कुरा हो । हामीले खडेश्वर जुंगे महादेव कै आकारमा रहेर भक्तजनको आग्रहमा अष्टधातुको मूर्ति राखिएको हो । सिमेन्टको नै बनाउनु पर्ने हो भने किन परिवर्तन गरिएको ? भन्ने कुरा आएपछि धातुकै बनाउँदा लामो समयसम्म पनि रहने र मन्दिर पनि पूर्ण रुपमा पुनः निर्माण भएकाले भक्तजनको आग्रहमा मूर्ति बनाइएको हो ।
बागेश्वरी छेवैमा एक सय आठ फिटको हनुमानको मूर्ति पनि बन्दैछ नि ! यसलाई लिएर धार्मिक कोरिडर बनाउने योजना पनि छ ?
हामीले गएको कार्यपालिकाको बैठकको निर्णय हेर्नुहुन्छ भने विपीचोकबाट सुरु भएर इदगाह, गुरुद्वारा हुँदै धम्बोझीसम्म आउँदा बागेश्वरी मन्दिर गेट, घरबारीटोल पिपलबोट हुँदै गुम्बा हुँदै त्रिवेणीमोड देखि लिएर खानेपानी नजिक एक सय आठ फिट हनुमान मन्दिरलाई धार्मिक सद्भाव करिडोरको नीति लिएका छौं । नेपालगन्ज भनेको सबै धर्म मान्नेहरुको बासस्थान हो । सबैको धार्मिक स्थल जोडेर धार्मिक कोरिडरका रुपमा विकास गर्न सकियो भने सद्भाव पनि विकास गर्न सकिन्छ भन्ने विश्वास हो ।
