कैलालीको घोडाघोडी नगरपालिका–८ मा शुक्रबार राति आपसी विवादका क्रममा एक युवकको घाँटी रेटेर हत्या गरिएको छ।
प्रहरीका अनुसार सुर्खेतको चौकुने गाउँपालिका–३ निवासी २८ वर्षीय केशरसिंह बुढाको स्थानीय खाजाघरमा हत्या भएको हो।
जिल्ला प्रहरी कार्यालय कैलालीका प्रवक्ता डीएसपी राजकुमार सिंहका अनुसार, घटनामा संलग्न घोडाघोडी–८ का १८ वर्षीय बलबहादुर बि.क. र १९ वर्षीय गंगा बुढा क्षेत्रीले राति नै इलाका प्रहरी कार्यालय सुखडमा आत्मसमर्पण गरेका छन्।
प्रहरीका अनुसार, ती तिनै जना खाजाघरमा बसेर मदिरा सेवन गरिरहेका बेला विवाद भयो। विवाद क्रमशः झगडामा र हिंसामा बदलियो। सोही क्रममा बलबहादुर र गंगाले धारिलो हतियार प्रयोग गरी बुढाको घाँटी रेटेर हत्या गरेका थिए।
हत्या गरेपछि दुवैले बुढाको टाउको बोकेर प्रहरी कार्यालयमा पुगेर आत्मसमर्पण गरेका थिए।
हाल दुवैलाई नियन्त्रणमा लिएर थप अनुसन्धान भइरहेको प्रहरीको भनाइ छ।
मृतकका आफन्त सुर्खेतबाट घटनास्थलतर्फ आइरहेका छन् भने प्रहरीले घटनास्थल सुरक्षित राख्दै शव उठाउने तयारी गरिरहेको छ।
प्रहरीले प्रारम्भिक अनुसन्धानमा यो घटना मदिरा सेवनपछिको आकस्मिक विवादका कारण भएको अनुमान गरेको छ।
