नेपालगन्जमा भ्रष्टाचारविरुद्ध सक्रिय संस्था बास नेपालले आफ्नो २५ वर्षे यात्रा पार गर्दै रजत वर्षको सुरुआत बुधवार भव्य समारोहका साथ मनाएको छ ।
भव्य सहभागितामा भएको विशेष समारोहले संस्थाको दुई दशक लामो संघर्ष, अभियान र जनसहभागिताको इतिहासलाई मात्र सम्झिएन, सुशासनको मार्गमा अघि बढ्ने नयाँ ऊर्जा पनि प्रदान ग¥यो ।
कर्णाली प्रदेशका सामाजिक विकास मन्त्री घनश्याम भण्डारीको प्रमुख आतिथ्यमा भएको कार्यक्रम संस्थाका केन्द्रीय अध्यक्ष शिवकुमार वर्माको अध्यक्षतामा गरिएको हो ।
प्रमुख अतिथि, मन्त्री भण्डारीले सुशासनको मुटुमा बस्ने मूल्यहरूलाई जोगाउन नागरिक स्तरमै जागरण आवश्यक रहेको उल्लेख गर्दै बास नेपालले सुरु गरेको युवा–केन्द्रित अभियानले देशभरी सकारात्मक प्रभाव छरेको बताए । भ्रष्टाचारविरुद्धको यात्रामा प्रत्येक नागरिकले आफ्नो भूमिका आत्मसात् गर्नुपर्नेमा उनले जोड दिए ।
समारोहमा राष्ट्रिय सूचना आयोगका पूर्व प्रमुख आयुक्त तथा बास नेपालका सल्लाहकार कृष्णहरी बास्कोटाले संस्था स्थानीय र संघीय संरचनासँग सहकार्य गर्दै ७७ वटै जिल्लामा प्रभावकारी उपस्थिति बनाउन सफल भएको उल्लेख गरे । सुशासनका सवालमा बासले सरकारले गुमाउँदै लगेका संवेदनशीलताहरूलाई फेरि समुदायसम्म पु¥याउने काम गरिरहेको टिप्पणी गर्दै उनले संस्थाको आगामी यात्राप्रति गहिरो विश्वास व्यक्त गरे । पत्रकारिता क्षेत्रका अग्रणी पात्र, नेपाल पत्रकार महासंघका पूर्व सभापति तारानाथ दाहालले बास नेपालको अभियानलाई ‘राज्यलाई सही बाटोमा फर्काउने चेतनाको बल’ भन्दै प्रशंसा गरे । विभाजन र अविश्वास बढ्दै गएको राजनीतिक वातावरणमा बास जस्ता संस्थाले समाजलाई पुनः संयम, आस्था र पारदर्शितातर्फ अघि बढाउन मद्दत गरिरहेको सूचना अभियन्ता समेत रहेका उनले टिप्पणी गरे ।
कार्यक्रमका अर्का आकर्षण, भ्रष्टाचारविरुद्धका अभियन्ता केदार खड्काले बास नेपालको २५ वर्षे यात्रा देशभर सुशासनका आन्दोलनमा युवाहरूको उदयको कथा भएको उल्लेख गरे । ‘जहाँ जहाँ भ्रष्टाचार देखिन्छ, त्यहीँ बास पुग्छ,’ उनले भने—यही ऊर्जा र निर्भिकताले संस्थालाई राष्ट्रिय परिचय दिलाएको हो । समारोहका बीच बास नेपालका केन्द्रीय महासचिव कल्पना अधिकारीले कार्यक्रम सञ्चालन गरे जसमा ३५० भन्दा बढीको सहभागिताले वातावरण उत्साहपूर्ण बनेको थियो ।
व्यक्तित्व सम्मान
रजत वर्षको अवसरमा विभिन्न क्षेत्रका व्यक्तित्वलाई सम्मानित गरिएको थियो । भ्रष्टाचारविरुद्ध नागरिक सम्मान सूचनाको हकका अग्रणी अभियन्ता तारानाथ दाहाललाई प्रदान गरिएको छ । सूचनाको हकलाई जनस्तरसम्म पु¥याउँदै पारदर्शिताको संस्कृति निर्माणमा दिएको योगदानका कारण उनलाई दोसल्ला र सम्मानपत्र प्रदान गरिएको हो ।
भव्य समारोहबीच, शिक्षा, स्वास्थ्य, साहित्य, पत्रकारिता, संगीत, वातावरण, सडक सुरक्षा तथा समुदाय विकासमा महत्वपूर्ण योगदान पु¥याएका व्यक्तिहरूलाई सामाजिक उत्तरदायित्व सम्मान प्रदान गरियो । यसअन्तर्गत बिजय लामा, डा. एम. किदवाई, सनत रेग्मी, झलक गैरे, मैमुना सिद्धिकी, कमल बिके निर्मोही, समिरमान श्रेष्ठ, शिव वास्ताकोटी, चक्रबहादुर चन्द, रबिन्द्र लामिछाने तथा तेजविक्रम शाह सम्मानित भए । साथै पूर्व प्रमुख आयुक्त कृष्णहरी बास्कोटाद्वारा लेखिएको पुस्तक ‘खुसीको गारेटो’ लाई पनि विशेष सम्मान प्रदान गरियो ।
यस वर्ष उत्कृष्ट कर्मचारीका रूपमा बास नेपालका प्रशासकीय अधिकृत शुद्धप्रसाद चौधरी र प्रशासन सहायक मिना घर्ती मगर सम्मानित भए । उत्कृष्ट शाखाको रूपमा दैलेख शाखाले नगद पुरस्कारसहित सम्मान पायो भने बाँके, बर्दिया र दार्चुला शाखाले क्रमशः द्वितीय, तृतीय र सान्त्वना सम्मान प्राप्त गरे। कार्यक्रमका बीच कर्मचारी मिना घर्ती मगर, शोभा चौधरी, सबिना रोका मगर र कृष्णा बिकका सांगीतिक प्रस्तुतिले माहोललाई उत्साहपूर्ण बनायो ।
रजत वर्ष प्रवेशसँगै बास नेपालले सुशासन र पारदर्शिता प्रवद्र्धनमा अझ सशक्त रूपमा अघि बढ्ने प्रतिबद्धता व्यक्त गरेको कार्यकारी निर्देशक नमस्कार शाहले बताए । २५ वर्षको यात्राले दिएको आत्मविश्वास, समुदायको भरोसा र युवाको साथलाई आधार बनाउँदै बासले भ्रष्टाचारविरुद्धको देशव्यापी अभियानलाई नयाँ उचाइमा पु¥याउने संकेत दिएको छ ।
