बेवास्ता गर्ने मालिकमाथि कडा कारबाहीको संकेत
नेपालगन्ज उपमहानगरपालिकाले नगर क्षेत्रलाई सुरक्षित, व्यवस्थित र स्वच्छ बनाउने लक्ष्यसहित छाडा पशु चौपाया नियन्त्रण अभियानलाई थप कडाइका साथ अघि बढाएको छ । पछिल्लो अभियानअन्तर्गत सोमवार बिहान सबेरैदेखि सञ्चालन गरिएको कारबाहीमा ३८ वटा पशु नियन्त्रणमा लिइएका छन्, जसलाई वडा नं. २१ स्थित विर्ता कान्जी हाउसमा राखिएको छ ।
उपमहानगरपालिकाका अनुसार, नियन्त्रणमा परेका पशुहरूमध्ये ३० वटा गाई, बाच्छाबाच्छी तथा साँढे रहेका छन् भने ८ वटा घोडा–घोडी छन् । यसअघि शनिबार मात्रै ४३ वटा पशु नियन्त्रणमा लिइएको तथ्यले अभियान अझै तीव्र र निरन्तर भइरहेको स्पष्ट देखिन्छ ।
नगर प्रहरी निरीक्षक सूर्यबहादुर बोगटीका अनुसार, अब पशु छाडा छोड्ने प्रवृत्तिलाई सह्य नहुने स्पष्ट संकेत दिइएको छ । ‘पशु सडकमा छाड्ने मालिक पहिचान भएमा कानुनी कारबाहीको दायरामा ल्याइनेछ,’ उनले चेतावनी दिए ।
छाडा पशुका कारण सवारी दुर्घटना बढ्नु, ट्राफिक अव्यवस्थित हुनु र सडक सरसफाइमा गम्भीर असर पर्नुजस्ता समस्या देखिएपछि उपमहानगरपालिकाले यो अभियानलाई ‘जनसुरक्षा अभियान’का रूपमा अघि बढाएको जनाएको छ ।
स्थानीयवासीलाई आफ्ना पशुहरू व्यवस्थित रूपमा पाल्न, सडकमा नछोड्न र नगरको नियम पालना गर्न अपिल गरिएको छ । अन्यथा, आगामी दिनमा जरिवाना, नियन्त्रण तथा थप कानुनी कारबाही तीव्र पारिने उपमहानगरपालिकाको चेतावनी छ । यो अभियानले अब केवल नियन्त्रण मात्रै होइन, जिम्मेवारीबोध गराउने र नियम उल्लंघन गर्नेलाई कारबाहीको डर सिर्जना गर्ने उद्देश्य लिएको सम्बद्ध कर्मचारी बताउँछन् ।
