नेपाल–भारत सीमा क्षेत्रमा लागुऔषध तस्करी र अन्य अवैध गतिविधिविरुद्ध थप कडाइ गर्न भारतको देवीपाटन मण्डलका प्रहरी उपमहानिरीक्षक (डीआईजी) अशोक कुमारले निर्देशन दिएका छन् ।
बहराइच जिल्लास्थित नेपाल सीमावर्ती रूपईडीहा कोतवालीको वार्षिक निरीक्षणका क्रममा विहीवार उनले सीमा क्षेत्रमा ‘जिरो टोलरेन्स’को नीति अपनाएर निगरानी र कारबाही प्रभावकारी बनाउन मातहतका प्रहरी अधिकारीलाई निर्देशन दिएका हुन् ।
निरीक्षणका क्रममा डीआईजी कुमारले सीमा क्षेत्रको सुरक्षा अवस्था, शान्ति सुरक्षाको व्यवस्थापन, अपराध नियन्त्रण, तस्करी रोक्न सञ्चालन गरिएका अभियान तथा अनुसन्धानाधीन मुद्दाहरूको समीक्षा गरेका थिए । उनले भारत–नेपाल सीमामा विशेष सतर्कता अपनाउन, लागुऔषध तस्करी, अवैध गतिविधि र फरार अपराधीविरुद्ध निरन्तर अभियान सञ्चालन गर्न निर्देशन दिए ।
पत्रकारसँगको कुराकानीमा उनले रूपईडीहा क्षेत्रमा रहेको एक मेडिकल स्टोरबाट हालै बरामद गरिएको प्रतिबन्धित लागुऔषधसम्बन्धी घटनाबारे पनि जानकारी लिएका थिए । उक्त घटनाको निष्पक्ष र गहिरो अनुसन्धान गर्न निर्देशन दिँदै एक साताभित्र अनुसन्धान सम्पन्न गर्न आदेश दिइएको उनले बताए ।
लागुऔषधको आपूर्ति कहाँबाट भइरहेको थियो र त्यसको सञ्जालमा को–को संलग्न छन् भन्ने विषयमा अनुसन्धान केन्द्रित रहेको उनले स्पष्ट पारे । घटनामा संलग्न देखिने जोसुकैविरुद्ध कडा कानुनी कारबाही गरिने उल्लेख गर्दै उनले लागुऔषधको अवैध कारोबार कुनै पनि अवस्थामा स्वीकार्य नहुने बताए ।
डीआईजी कुमारले सीमा क्षेत्रमा प्रहरी, सशस्त्र सीमा बल (एसएसबी) तथा अन्य सुरक्षा निकायबीचको समन्वय अझ प्रभावकारी बनाइएको जानकारी दिए । तस्करी तथा अन्य आपराधिक गतिविधिमाथि प्रभावकारी नियन्त्रण कायम गर्न संयुक्त निगरानीलाई थप सुदृढ बनाइएको उनको भनाइ थियो ।
वार्षिक निरीक्षणका क्रममा उनले कोतवाली परिसर, अभिलेख, मालखाना, महिला हेल्प डेस्क, ब्यारेक, शस्त्रागार, हिरासत कक्ष तथा सरसफाइको अवस्थाको समेत निरीक्षण गरेका थिए । निरीक्षणपछि उनले सेवा प्रवाह र सुरक्षा व्यवस्थालाई अझ प्रभावकारी बनाउन आवश्यक निर्देशन दिएका थिए ।
निरीक्षणमा क्षेत्राधिकारी, कोतवाली प्रमुखसहित प्रहरी विभागका अन्य अधिकारी तथा प्रहरी कर्मचारीको उपस्थिति रहेको रुपैडिहास्थित पत्रकार सन्तोषकुमार शुक्लले जानकारी दिए ।
