अग्रज खेलाडी र खेलकर्मी सम्मान गर्दै महेन्द्र पुस्तकालय
खेलकुदले समाज निर्माणमा खेल्ने भूमिकामाथि व्यापक बहस गर्दै बाँकेका अग्रज खेलाडी तथा खेलकर्मीलाई नेपालगन्जमा आगामी शनिवार सम्मान गरिने भएको छ । महेन्द्र पुस्तकालयले आगामी शनिबार ‘खेलकुदले बनाउने समाज’ विषयमा ‘समाज मन्थन’ आयोजना गर्दै खेल क्षेत्रका योगदानकर्तालाई एकै मञ्चमा ल्याउने तयारी गरेको हो ।
कार्यक्रममा खेलकुदको सामाजिक प्रभाव, खेल पूर्वाधारको उपयोग, खेल संस्कृतिको विस्तार तथा नेपालगन्जको खेलकुद भविष्यबारे बहस हुने आयोजकले जनाएको छ । त्यसअघि बाँकेमा लामो समयदेखि खेल क्षेत्रको विकासमा योगदान पु¥याएका अग्रज खेलाडी तथा खेलकर्मीलाई बृहत सम्मान गरिनेछ ।
कार्यक्रमको तयारी महेन्द्र पुस्तकालयको सामाजिक सरोकार उपसमितिले गरिरहेको छ । जुमा स्पोट्र्स क्लबले कार्यक्रमको सहकार्य गरिरहेको हो ।
सामाजिक सरोकार उपसमितिका संयोजक नरेन्द्रजंग पिटरले समाज र खेलकुदबीचको सम्बन्धलाई नयाँ ढंगले उठान गर्न ‘समाज मन्थन’ आयोजना गरिएको बताए । उनका अनुसार, खेलकुद प्रतियोगितामा सीमित नभई सामाजिक सद्भाव, अनुशासन, सहकार्य र समुदाय निर्माणसँग प्रत्यक्ष जोडिने विषय भएकाले त्यसबारे गम्भीर छलफल आवश्यक ठानिएको हो ।
उनले भने, ‘नेपालगन्ज सद्भावको सहर हो । खेलकुदले सामाजिक सद्भाव अभिवृद्धिमा महत्वपूर्ण भूमिका खेल्छन् । त्यसैले यस खालको बहस आयोजना गरिएको र खेल क्षेत्रमा महत्वपूर्ण योगदान गर्नेहरुलाई सम्मान गर्न खोजिएको हो ।’
आयोजकका अनुसार, सम्मानसँगै हुने बहसमा पुराना खेलाडीदेखि नयाँ पुस्ताका खेलकर्मी तथा खेल क्षेत्रमा योगदान पु¥याइरहेका व्यक्तित्व सहभागी हुनेछन् । बहसमा ओलम्पियन सुरेन्द्र हमाल, अजित कुमार शर्मा, रतन कुमार टण्डन, सम्सुद्दिन सिद्धिकी शान्तिसिंह क्षेत्री, टीएस ठकुरी र बालकृष्ण थारुलगायतले आफ्ना धारणा राख्नेछन् ।
पुस्तकालयले नेपालगन्जलाई लुम्बिनी प्रदेशकै खेलाडी उत्पादन गर्ने सहरका रूपमा चिनाउँदै पछिल्ला वर्षमा खेल पूर्वाधारको पर्याप्त उपयोग हुन नसकेको अवस्थालाई पनि बहसको प्रमुख विषय बनाएको छ । पर्याप्त संरचना निर्माण भए पनि अपेक्षित रूपमा प्रतियोगिता सञ्चालन हुन नसक्दा धेरै खेल पूर्वाधार सुनसान बन्दै गएको निष्कर्षसहित त्यसको समाधानबारे समाजका विभिन्न क्षेत्रबीच साझा छलफल गरिने जनाइएको छ ।
आयोजकका अनुसार, खेल पूर्वाधारको प्रभावकारी उपयोग कसरी गर्ने, खेलकुद गतिविधिलाई नियमित कसरी बनाउने र खेल विकासमा समुदाय, सरोकारवाला तथा विभिन्न क्षेत्रको भूमिका कसरी बढाउने भन्ने विषयमा बहस केन्द्रित हुनेछ । यही उद्देश्यले खेलकुदसँग प्रत्यक्ष वा अप्रत्यक्ष रूपमा जोडिएका व्यक्तित्वलाई एउटै मञ्चमा ल्याउन लागिएको हो ।
कार्यक्रम संयोजक पिटरले पुस्तकालयप्रतिको परम्परागत बुझाइ परिवर्तन गर्नु पनि कार्यक्रमको अर्को उद्देश्य रहेको बताए । उनका अनुसार, पुस्तकालय केवल पुस्तक पढ्ने वा साहित्यकारको मात्रै साझा थलो नभई समाजका सबै क्षेत्रका नागरिकको अभिलेखालय र साझा बौद्धिक केन्द्र हो । उनले दैनिक नेपालगन्जसँग भने, ‘पुस्तकालय खेलाडीको पनि हो, साहित्यकारको पनि हो, समाजका सबै व्यापारीदेखि राजनीतिकर्मी सबैको हो ।’ उनका अनुसार, यही सन्देश स्थापित गर्न पनि समाज मन्थनलाई खेलकुदसँग जोडिएको हो ।
जुमा स्पोट्र्स क्लबका अध्यक्ष डा. उदय अधिकारीले शनिबार हुने बहस तथा अग्रज खेलाडी–खेलकर्मी सम्मान कार्यक्रमलाई भव्य बनाउन आवश्यक तयारी तीव्र पारिएको बताए । खेल क्षेत्रका विभिन्न पुस्तालाई एउटै मञ्चमा ल्याउने प्रयासले आगामी दिनमा खेलकुद विकासबारे साझा निष्कर्ष निकाल्न सहयोग पुग्ने विश्वास पनि उनले व्यक्त गरे ।
