TVS मोटर कम्पनीले नेपालमा आफ्नो नयाँ TVS Apache RTR 160 4V मोटरसाइकल सार्वजनिक गरेको छ। नेपालगन्जस्थित होटल सिद्धार्थमा आयोजित कार्यक्रममा मिडियाकर्मी, अटोमोबाइल समीक्षक, इन्फ्लुएन्सर तथा बाइक पारखीहरूको उपस्थितिमा मोटरसाइकल सार्वजनिक गरिएको हो।
कम्पनीका अनुसार नयाँ Apache RTR 160 4V मा यस सेग्मेन्टमै पहिलो पटक प्रोजेक्टर हेडल्याम्प, USD सस्पेन्सन र ५ इन्चको TFT डिजिटल क्लस्टर समावेश गरिएको छ। रेसिङ प्रविधिमा आधारित यो मोटरसाइकलमा १७.५५ पीएस शक्ति उत्पादन गर्ने इन्जिन रहेको छ भने स्पोर्ट, अर्बन र रेन गरी तीनवटा राइड मोड उपलब्ध छन्।
कार्यक्रममा नेपालगन्जका लागि जगदम्बा मोटर्स प्रालिका आधिकारिक बिक्रेता ग्रेस एन्ड ग्लोबल ट्रेडिङका सञ्चालक रण बहादुर शाही र विवेक पराजुलीले TVS Apache ले नेपालका युवा राइडरमाझ प्रदर्शन, शैली र प्रविधिका कारण विशेष लोकप्रियता हासिल गरेको बताए। नयाँ मोडलमा थपिएका आधुनिक फिचरहरूले राइडिङ अनुभव अझ उत्कृष्ट बनाउने उनीहरूको भनाइ थियो।
त्यसैगरी, जगदम्बा मोटर्सका प्रिमियम सेल्स हेड बिपिन बोगटीले १५ वर्षभन्दा बढी समयदेखि TVS Apache ले नेपालसहित ६० भन्दा बढी देशका ७० लाखभन्दा बढी राइडरको विश्वास जितेको उल्लेख गर्दै नयाँ Apache RTR 160 4V ले १६० सीसी सेग्मेन्टमा नयाँ मापदण्ड कायम गर्ने विश्वास व्यक्त गरे।
कम्पनीका अनुसार मोटरसाइकल म्याट ब्ल्याक, रेसिङ रेड र मरिन ब्लु गरी तीन रङमा उपलब्ध हुनेछ। यसको एक्स–शोरूम मूल्य रु. ४ लाख २९ हजार ९ सय तोकिएको छ। हाल छानिएका डिलरशिपमा उपलब्ध रहेको यो मोडल जुलाई २०२६ भित्र देशभरका TVS डिलरमार्फत बिक्रीका लागि उपलब्ध गराइने कम्पनीले जनाएको छ।
नेपालमा TVS मोटर कम्पनीको आधिकारिक वितरक जगदम्बा मोटर्स प्रालिले देशभर फैलिएको बिक्री तथा बिक्रीपछिको सेवा सञ्जालमार्फत TVS का आधुनिक सवारीसाधन नेपाली बजारमा उपलब्ध गराउँदै आएको छ।
