नेपालगन्ज उपमहानगरपालिका वडा नं २ मा रहेको न्यू श्रीस डिष्टीब्यूटर्सलाई बुधबार बजार अनुगमनका क्रममा रु. १० हजार जरीवाना गरिएको छ ।
जिल्ला प्रशासन कार्यालय, बाँकेका सहायक प्रमुख जिल्ला अधिकारी महेश कुमार गुरुङको नेतृत्वमा गएको संयुक्त बजार अनुगमन टोलीले कर बिजक नराखेको भन्दै सो जरिवाना गरिएको हो । सो डिष्टीब्यूटर्सले भेरी ग्याँसको बेचविखन गर्दै आएको छ ।
उक्त संयुक्त टोलीले नेपालगन्ज १८ स्थित आकाश राइस तथा फ्लोर मिलबाट गएको बजारमा गएको करिब ३० किलो अखाद्य मासको कालो दाल नष्ट गरेको छ । सो दाल अखाद्य रङको मिसावट भएको र खानयोग्य समेत नभएकाले दाल नष्ट गरिएको बाँकेका सहायक प्रमुख महेश कुमार गुरुङले जानकारी दिए । उनका अनुसार सो राइस मिललाई कागजात समेत देखाउन नसकेकाले जिल्ला प्रशासनमा हाजिर हुन समेत निर्देशन दिइएको छ ।
राइस मिलबाट गएको सो कालो दाल नेपालगन्जको राहुल खाद्यान्न तथा किराना पसलमा फेला परेको थियो । अनुगमन टोलीमा खाद्य प्रविधि तथा गुण नियन्त्रण कार्यालय, नेपालगन्जकी अधिकृत नेत्रा बोगटी, नेपालगन्ज उपमहानगरपालिकाबाट प्रविण कुमार राना, उपभोक्ता हित संरक्षण मञ्चका केन्द्रिय सचिव बसन्त गौतम लगायत थिए ।
