नेपालगन्ज उपमहानगरपालिका वडा नं. १८ का विपन्न तथा आर्थिक रूपमा कमजोर परिवारलाई लक्षित गरी निःशुल्क स्वास्थ्य बीमा कार्ड वितरण गर्ने अभियान अघि बढाइएको छ।
वडा कार्यालयले विभिन्न टोलमा बसोबास गर्ने आर्थिक रूपमा विपन्न परिवारमध्ये पहिलो चरणमा १०० परिवारलाई स्वास्थ्य बीमा कार्ड निःशुल्क उपलब्ध गराउने तयारी गरेको हो।
वडाध्यक्ष दिपक कुमार बर्माका अनुसार आर्थिक अभावका कारण कुनै पनि नागरिक आधारभूत स्वास्थ्य सेवाबाट वञ्चित हुन नपरोस् भन्ने उद्देश्यले अभियान सञ्चालन गर्न लागिएको हो। उनले स्वास्थ्य सुरक्षा नागरिकको आधारभूत अधिकार भएकाले विपन्न परिवारको स्वास्थ्य सुरक्षालाई प्राथमिकतामा राखेर कार्यक्रम अघि बढाइएको बताए।
वडाध्यक्ष बर्माले राजनीति जनताको जीवनसँग जोडिनुपर्ने र जनप्रतिनिधिले नागरिकको सुख–दुःखमा साथ दिनुपर्ने मान्यताका साथ स्वास्थ्य बीमा अभियान सञ्चालन गरिएको उल्लेख गरे। उनका अनुसार यो कार्यक्रम केवल स्वास्थ्य बीमा कार्ड वितरणमा सीमित नभई आर्थिक रूपमा कमजोर परिवारको स्वास्थ्य सुरक्षाप्रतिको सामाजिक जिम्मेवारी र मानवीय संवेदनाको प्रयास हो।
वडाध्यक्ष बर्माले आगामी महिनादेखि थप आवश्यक परिवारको स्वास्थ्य बीमा कार्ड बनाउने प्रक्रिया अघि बढाइने जानकारी दिए। आवश्यकता र पहुँचका आधारमा अभियानलाई विस्तार गर्दै थप विपन्न परिवारलाई स्वास्थ्य बीमाको दायरामा समेट्ने योजना रहेको उनको भनाइ छ।
“जनताको सेवा नै हाम्रो प्राथमिकता र स्वास्थ्य सुरक्षा नै हाम्रो प्रतिबद्धता हो,” वडाध्यक्ष बर्माले भने।
